الرادود الحسيني ملاهيثم اللامي قصائد وألحان خادم الزهراء ع🎤

لحد اخر نفس    اصيحن ياحسين
نطيته اربعة    واحس يطلبني دين 
...... 
انه الكلبي نُبَض           ( حسين  ) 
رفض غيره ولُفَظ         ( حسين  ) 
تره اخيول الهجر         ( حسين  ) 
ترض ابصدري رض    ( حسين  ) 

امامي وسيدي     انه ام البنين
نطيته اربعة    واحس يطلبني دين 
.....
فكدت الاربعة          ( حسين  )
وسبتني المشرعة      ( حسين  )
ومتت من اسمعت      ( حسين  )
حبيبي ابمصرعة       ( حسين  )

يريت انه فده   لبو القلب الحنين 
نطيته اربعة    واحس يطلبني دين 
...
صرت  دمع و الم      ( حسين  ) 
و جسد أحشائه هم      ( حسين  )
يموت اشباقي الك       ( حسين  )
رماد امن الخيم          ( حسين  )

مثل نار الخيم    اكل عمري الونين 
نطيته اربعة    واحس يطلبني دين 
......
لمن جاني الخبر      ( حسين  )
حسين اصبح وذر    ( حسين  )
اطلعت روحي تره   ( حسين  )
و متت من القهر     ( حسين  )

انه المكتوب الي   اموتن مرتين 
نطيته اربعة    واحس يطلبني دين 
...
شفت زينب اجت        ( حسين  )
بجيت وهم بجت         ( حسين  )
غريبة اعله الهزل       ( حسين  )
احس روحي اطلعت     ( حسين  )

واظن متنه سوه   و عدلنه احنه الثنين 
نطيته اربعة    واحس يطلبني دين 
.....
اموت بكل مسه        ( حسين  )
وعليَّ دهري قسه      ( حسين  )
اسيرة ومركبي          ( حسين  )
ابّحر حزني رسه       ( حسين  )

وانه امضيعة ضوه   فلا اندله وين 
نطيته اربعة    واحس يطلبني دين 
....
انه جروحي سمه      ( حسين )
جبيرة ومظلمة         ( حسين  )
سماي ابلا شمس       ( حسين  )
بحر دمعي ضمه       ( حسين  )

نشف دمعي نشف     ولاضلتلي عين 
نطيته اربعة    واحس يطلبني دين 
....
جروحي اتحيرت         ( حسين )
شجرت عيني شجرت    ( حسين )
التعيش بلا  اهل       ( حسين  )
بلا  موطن صفت       ( حسين  )

متت وله عشت    اشفرق  بلحالتين 
نطيته اربعة    واحس يطلبني دين 
....
زهير الابراهيمي

يوسفنه مارد وين
نسأل ادموع العين
......... .........غايبنه ما جانه
مجلسنه بس حسره
والزهره بي تقره
.................والدمعه عنوانه
*******
جروح الدنيا تاخذ مصدر الايه
علامه اشبعد نحسب صارن اهوايه
نحلفك بالكفيل وصاحب الرايه
تجينه ابرايتك ثق احنه شرايه

نحسبهه جيته امنين
كون ابضريح حسين
......................نتلاكه بحزانه
كل مأتم ايحضره
والزهره بي تقره
...................والدمعه عنوانه
*******
حزنه وياك عايش لوعة امصابك
على الهادي ابدمعنه تارس اعتابك
شفت سامره صارت تنعه بغيابك
يبو صالح دخيلك طمن احبابك

ونك يبچي الليل
ونهدم بيك الحيل...
....................يا لوعة اشجانه
نار اشبعد تبره
والزهره بي تقره
....................والدمعه عنوانه
*******
عجيبه الليل ياخذ دمعة اعيونك
عله جدك والمصايب سيدي اشلونك
اشوف الزهره بيك ومنخطف لونك
عالهادي ابنواعي ذبلت اجفونك

نرجس تون وياك
مشهد حزن تنعاك
................والحسره بوطانه
شكد باقي ننتظره
والزهره بي تقره
.................والدمعه عنوانه
*******
مراسيم المصايب تحسب اصروحك
حكيمه وياك تسمع بالبچي نوحك
متت چم مره وادري بعالم اجروحك
مصاب الهادي ماخذ حيلك وروحك

من صبرك المذبوح
عاشرت بس النوح.
...................والمهجه تعبانه
لا طر صبح فجره
والزهره بي تقره
....................والدمعه عنوانه
*******
حكيمه ابدمعتك ترسم حزن بيها
اظنهه الزهره يمهه اتشد نواعيها
اجت يم نرجس اتنوح البواچيها
اتشوف المهدي حسره بعينه تاليها

يالهادي صوت الاه
جرحك صعب ننساه
.................مجروحه صحبانه
ذاب الگلب صبره
والزهره بي تقره
.............. ...والدمعه عنوانه
*******
كل هذا الجره يمكن سهل امره
عجيبه اشلون گلي المنسحك صدره
انهشم حتى الگلب من حافر المهره
طلع شفنه السهم ياويلي من ظهره

ياويلي طاح احسين
سهم الچبد ثلثين ....
...................ظل يابس اللسانه
ذبح الگفه نحره
والزهره بي تقره
.................... والدمعه عنوانه
*******
تمت بعون الله
#خادمكم......... يوسف الفتلاوي

تعبهه السبي واحبال اديهه
ذبلت من كثر همهه وبچيهه
عالحره الغريبه _ تنعاد المصيبه
ذبلت من كثر همهه وبچيهه
☆☆☆☆
زينب انولدت حزينه وكبرت وياها المحن
بالأحزان وبالنوايب خيّم اعليهه الزمن
ضلع امها وجرح ابوها وفاجعة چبد الحسن
حست بغربه چبيره كالغريب ابلا وطن

ياعمر العقيله هموم واحزان
دولبهه الزمان بفگد الاخوان
عالحره النجيبه _ تنعاد المصيبه
ذبلت من كثر همهه وبچيهه
☆☆☆☆
عاشرت زينب حزنهه والفرح من عدهه مات
كربله اخذت اهلهه الطاحو بصف الفرات
بنينوه شافت كواكب بالدماء امخضبات
الجثه فوگ الجثه شافت بالتراب امچفنات

من كُبر المصيبه صارت العين
دمعه للكفيل ودمعه لحسين
عالجثه السليبه _ تنعاد المصيبه
ذبلت من كثر همهه وبچيهه
☆☆☆☆
للسبي زينب خذوهه وانحنه منهه الظهر
لو گمر عدنان عايش ما يمر بيهه الخطر
والقدر غيّب وليهه وظهر ابو اليمه انكسر
زينب الچانت اميره بيها شمسوي الدهر

هاشم وين من راحت سبيه
هاي أم الخدر والهاشميه
قصتهه عجيبه _تنعاد المصيبه
ذبلت من كثر همهه وبچيهه
☆☆☆☆
تعذبت زينب تراها والسبي ما ينحمل
ترست الدنيا البواچي والدمع ظل ينهمل
شعدهه وياهه النوايب منهه ما تقبل تمل
ماتت أم عون الغريبه واشيلم ذاك الشمل

منو الغمض جفنها أو وسّداها
ومن اخوتها ياهو الي اجاها
بهل الحاله الرهيبه _تنعاد المصيبه
ذبلت من كثر همهه وبچيهه
☆☆☆☆
ياهو ليشيل الجنازه وما بقه عدهه احد
زينب المحد نظرهه والخدر منهه انولد
لا اخو لا ابو يمها لا اخت لا من ولد
بكربله راحوا ولدهه والشمل عنهه ابتعد

ما شال الجنازه شعجب عباس
ينصب خيمه لخته ترفع الراس
والراح شيجيبه _تنعاد المصيبه
ذبلت من كثر همهه وبچيهه
☆☆☆☆☆
حيدر بشار الدراجي

تعنينه بحزن وادموع مدميـــــــه
الكبر الهادي اجينه احنه الحسينيه
واه ويلاه..يا مسموم
واه ويلاه..يا مسموم
..........................................
كل شيعي التعنـه ولابــــس الاســــــود
يدك صدره ودمعتة هامله اعله الخــــد
زحف يكصد ضريح الهادي ابو محمد
ويلكه العسكري وانصاره محنيه
وا ويلاه..يا مسموم
زاه ويلاه..يامسموم
.......................................
هلا وكل الهلا يتلكه زواره
مضيف الزهره عامر باهله وانصاره
كلمن عاف اهله وخالي ضل داره
شفاعه وجاه اله والدار محميه
واه ويلاه..يا مسموم
واه ويلاه..يا مسموم
..................................
كل دمعه التطيح الخاطر العصمه
تسجلها البتول بدفتر الخدمه
شكبرها الخادم امن يموت يلكه اسمه
وعلي بيده يعبره الماهي مكضيه
واه ويلاه..يا مسموم
واه ويلاه..يا مسموم
........................................
شد عزمك يزاير لا تدير العين
الهادي ابن الامامه وعاشر اهل الدين
يا محلى اليجي وبي ريحه من حسين
من ابعيد اشمه وانعش الريه
واه ويلاه..يا مسموم
واه ويلاه..يا مسموم
..........................................
تره الهادي مصابه ألم الزهره
سكوه السم قبل ما ينتهي عمره
مثل عشرة محرم هم اله عشره
يخي عونه الحضر والسوه لطميه
واه ويلاه..يا مسموم
واه ويلاه..يا مسموم
................................
خادم خدمة الحسين
#الشاعر
محمد الموالي

الله اليعينك يالحسن وايعضم أجرك
بدارك دفنته والدك واحزام ضهرك
واه ويلاه يا علي الهادي
....................................
ألأبـو خيمة وسند وافراكة موت
أنفاسه تسبيح وحرز طلسم قنوت
ألفجر وجهـــا ألفجر عجبة يموت
شلت نعشك لو شلت نعشه سكوت
يا حيرة الفاكد أبـــــو ألله اليصبرك
بدارك دفنته والدك واحزام ضهرك
......................................................
يا دمـــع بعيونك أيشافي الجروح
وانته تنضر والـــــدك منك يروح
فــرحة اسنينك طفت ما بيها روح
شيسوه عمره الينكضي بالهم ينوح
حيــــرة والله حيرتك محتار بامرك
بدارك دفنته والدك واحزام ضهرك
...............................................
ألجان يشفي الــوادم بعازة طبيب
يالحسن والسم أكـــل جبده عجيب
ايساعد الله كلبـــــــك أبفكد الحبيب
يالبديت اسنيــــــن عمرك بالمشيب
كل صباح وكل مسه ينذبح عمرك
بدارك دفنته والدك واحزام ضهرك
...............................................
والدك بيـــــــــــن البشر ماله مثيل
جــــــان نعمة ورحمة للوادم خليل
نـــــذر عمره ودمعه لحسينه سبيل
حتى وي موته دمــــــع عينه يسيل
لو نبجي كل هذا العمر مانطفي جمرك
بيدك دفنته والدك واحزام ضهرك
......................................................
يالحسن بدموعنه اتعنينه ليــــك
راية راية عالعهد نمشي ونجيك
نبجي عالهادي لون نبجي عليك
بدارك وكبره حفرته بهاي اديك
ويلي كلبك يالحسن ما يشفي كسرك
بدارك دفنته والدك واحزام ضهرك
.......................................................
خادم خدمة الحسين
الشاعر
محمد الموالي

يروحي    دمع الحزن هويته
يروحي    طف وخيــم لكيته
يروحي    للهادي دم جـريته
يروحي
...................................
الهادي ياروحي الدمـــع شاهد عذابه
راسم الطف والخيـــــــم مطلع كتابه
عاش كـــــل عمره الهظم ذابح شبابه
بكل عزه ومجلس تره حاضر مصابه
بدمعه جريه    ينعى الرزيه
خلص حياته
صبح ومسيه
يروحي    من يحضر المآتم
يروحي.    يواسي الزجيه فاطم
يروحي.    لاخر نفس نعيته
يروحي

...................................................
عاش عمره الهادي مذبوحه أمنياته
من كثر نوحه الدمــــــع يبس لهاته
محني يمشي وحتى لو قام الصلاته
هدم جرح حسين حيـله وشل حياته
نار الفجيعه     لابن الوديعه
يا دمعه سيلي
لحسين ورضيعه
يروحي.    عالخد جرن دموعه
يروحي.    الهادي وحنت ضلوعه
يروحي.    وضل ينتضر منيته
يروحي
...............................................
صور من الطف بدت ترسم حدوده
وراد من عباس ياخذ ســـــر خلوده
رفع راية جــــــده وبعزمه وجهوده
وكف وبعلمه سحك خصمه وجنوده
نور الأمامه    بوجه علامه
صفوة محمد
بقدره ومقامه
يروحي    أبابه تجي الحياره
يروحي    من تعتني الزياره
يروحي.   الكل تحتمي بثنيته
يروحي

...................................................
عاشر أفروع الأمامه وجــــل قدرته
وارث آل المصطفى الهادي وعترته
النقــــــــــــــي الناصح ألقابه ورتبته
ونعمة من الباري يا شيــــــعه خدمته
محرابه آيه    ونور الهدايه
جاعله سباحن
رب البرايه
يروحي    موكب خدم أنصبي
يروحي    للهادي فوكه كتبي
يروحي    أنصاره معتنيته
يروحي

.................................................
ختم عمره الهادي وأنفاسه ألأخيره
وأنذبح بالســــــــم لمن حدد مسيره
مثل جده او والــــــده شيخ العشيره
والعجيبه أجنازته ضلت أسيــــــره
شيل الجنازة   عازتها عازة
وادم غريبة
بيمن تجازه
يروحي     بداره صفت دفنته
يروحي     كسرة كلب وحدته
يروحي     بدمع الحزن أجيته
يروحي
..............................................

خادم خدمة الحسين
الشاعر محمد الموالي

استشهاد الزهراء ع


إدعيلي  .. يزهراء
شفعيلي .. يزهراء
****
للمجلس تعنيت وعيوني جريه
ضايع يم الحسين لزميهن اديه
شغلت فكري دنياي والتمت عليه
غيرچ مالي والله من تلفي المنيه

إدعيلي  .. يزهراء
شفعيلي .. يزهراء
****
اشكر رب الأكوان شيعي من خلقني
صح ابذنبي انعاب بس حبكم رزقني
من تلتم الاحزان دهري الكم يذبني
اشما ابعد مسافات مجلسكم يردني

إدعيلي  .. يزهراء
شفعيلي .. يزهراء
****
بدموعي احس روح  يطول بيها عمري
وأشعر املك الكون كل ما لطمه صدري
مو من فارغ البال واقع هذا امري
بالمجلس تحضرين وتنظريلي ادري

إدعيلي  .. يزهراء
شفعيلي .. يزهراء
****
مني ادري اشتريدين من احضر عزائچ
ما ردتيها الدموع بس تبچي المصابچ
اذكر دوم الحسين هذا اول رجائچ
اوليدچ باب الاحزان يعني هوه بابچ

إدعيلي .. يزهراء
شفعيلي .. يزهراء
****
ضلعچ طره مسمار  يا ويلي اعله ضلعچ
هاي السيره تنعاد  يساعد الله گلبچ
بالطف عشرة خيول تنهد اعله ابنچ
مصابه مصابچ حسين ينحز يمه نحرچ

إدعيلي .. يزهراء
شفعيلي .. يزهراء
****
امصابچ چنه عاشور  مفهومه الفجيعه
بابچ خيمة اطفوف  شافته الوديعه
محسن لونه ينشاف چن لون الشريعه
باچر يوگع اعضيد  چفينه گطيعه

إدعيلي .. يزهراء
شفعيلي .. يزهراء
****

الشاعر اياد الديراوي

اللهم صل على محمد وال محمد وعجل فرجهم ياكريم صبحكم الله بالخير والعافيه جميعا

قصيده لذكرى استشهاد الأمام
الحســـن الـعسكــــــ ع ــــــري 

ـــــــــــــــــ ❁ ❁ ❁ ــــــــــــــــــ

يـامهدينــا تواسي حسينك 
يـامهدينــا بدمعة عينــــك 

مـن الحسن غــاب 
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

من طاح ابوك اليوم دمعك تصبـــه 
تنحب عله المسموم كضاهـا غربـه 
تذكر مصاب حسين والفركه صعبه 
شاف الجفوف شلون وبصفها جربه 

من فكد الاحبــــاب
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

شفت الجبد ممرود رحت بخيالك 
للمجتبى المظلوم يتعنـــه بـــالك 
تذكر مصابه تريد تشكيله حـــالك 
وتكله ابوي اليوم مسموم اجــالك 

من زغرك وشــــاب
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

بعد الحسن ما مات بعيونه حسره 
ترحل عن الانظار والغيبه صغـــره 
تتبعها وحده انوب تتسمه كبــــره 
والشيعه تطلب ثار  حكمك تنطره
 
وشاهدنه ســرداب 
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

تشكي الفگد ولظيم شفت الاذيــه 
بعد الابو مــن يروح تحله المنيـــه 
وبعـمر خمس سنين عنـدك وصـيه  
عدهم خبر مكتوب منصــب وليــه 

خل يقره الكتـــاب 
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

يالمهدي حيدر طاح والطبره بالهــام 
بضلع الزجيه تشوف متكسره لعظام 
وعمتك غريبه تـروح مسبيه للشـــام 
وچف الكفيل وعين وي ظيم الايتام 

كل هاي الاسبـــاب 
دلالــــك انـصـــاب

يـامهدينــا•••يـامهدينــا

ـــــــــــــــــ ❁ ❁ ❁ ــــــــــــــــــ

حجة انت للاسلام يالمهدي قائم 
تنشر عدل بالگاع مايبقه ظالـــم 
رب العرش خـــلاك للأمه حاكــم 
تطلب تريد الثار ثــــار الهواشــم
 
من لطبره والبــاب 
دلالــــك انـصــاب

ـــــــــــــــــ ❁ ❁ ❁ ــــــــــــــــــ

🖊️كلمات
عباس فاضل الشمري

 / لطمية للأربعين                                                                       الشاعر قاسم الساعدي المندلاوي
خدمتك قراري      حدِّدَت مساري
أخدم اليزورك     خدمته سرورك
**
أحسب الهاي الخدامة لحظة لحــظة
ومن تمرّ احسبهه مو أيام ومضـــة
دوري اريده ابغيره ما أقبل وأرضه
واليحصّل دوره ما ينوصف حظّــــه
يعرف الخدامة    من عشَگ إمامه
أي وَحَگ بُدورك   خدمته سرورك
*
لو گضت هالأربعين احسبهه ليّـــــــــام
يمته يوصلني واشوفاً قادم العــــــــــام
چنهه مو عَشرة شّهور اتساوي اعوام
من محرّم والصفَر تاريخ الاســــــــلام
راجع المصادر         تكشف السرائر
إقتباسه نورك          خدمته سرورك

**
گبل لا يوصل محرّم والمجالـــــــس
عالمواكب گلبي دوم ايطوف حارس
مو فقط مجنون بيك ابوكته عابــس
كلمن اتعنّه ألك من عشگـــه دارس
هالجنون اليّه          مفخرة وهويّة
باللحد مرورك       خدمته سرورك
*
لو وصلني الزاير وبالخيمــــة حَدّر
بي أشوف امن الحرب تعبان الاكبر
رّد لابوه من العطش جمره ايتـوجّر
وچَن اشوفاً جاسم ابعرسه تــــــوذّر
قصّه المواكب         تنقل العجايب
ما تجف بحورك   خدمته سرورك
*

من اوزّع چاي ماي وگهوة ليهــم
أشعر آنته اوياهَم امن افتر عليهم
اتشّد عزمهم سيدي لمن تجيهـــم
تنطي صَك ازيارة مقبولة ابأديهم
ترجع الأهلهه        تندب الكفلهه
غايته حضورك    خدمته سرورك
*
ليهم امن اتعب أحس تعبي ولائــي
ألك وانخَطّ ابسهر ليلي وعطائـــي
خدمتك ممزوجة عالفطرة ابدمائي
كون ما أخدمهم امقصّر عزائــــي
راحة تعبي ليكم       ينكتب باديكم
أعلم ابشعورك     خدمته سرورك

ياصاحب الزمان
......
يبو صالح    وين حاضر مجلس وكلبك حزين
يبو صالح     يم ضريح العســكري لو بالحسين
اليامصيبه اتألمت       بياصحن هسه اكعدت
يبو صالح   يبو صالح
***
نسأل بدمع العشك هــــاي المسيه
يلي كلبك ينزف الهــــــاي الرزيه
انته يم العسكري عينـــــــك جريه
لو رحت تنصب عزاه بالغاضريه
أحنه نسأل   هسه ياشباج تلزمهـــــن اديك
أحنه نسأل   بيا ضريح الليله يالمهدي نعيك
وين يالمهدي رحت   بيا صحن هسه اكَعدت
يبو صالح    يبو صالح
***
تبجي يامولانه عالســـــــــمو جبدته
العسكري اللي شاهدت عينك محنته
لو على اللي سلبو عالناكــــــه اخته
وعالتراب اظل ثلث تيــــــــام جثته
دمعك ايصب  امصاب ابوك العسكري شيب جفونك
دمعك ايصب  تبجي والدم تارس وغــــــرك عيونك
امن البواجي شيبت   بيا صحن هسه اكَعدت
يبو صالح   يبو صالح
***
حيل جــــــاوي كلبك ويذبح حنينه
شاب ابوك وبالغدر باكَــــو سنينه
لجن ما طكو بالحجــــــاره جبينه
ولا بعد موته اجتفواهلــــه وبنينه
وين بالك    هسه يم سامره ناصـــــــــبلك مجالس
وين بالك    لو على التل هسه يالمهدي انته جالس
على زينب من نحت   بيا صحن هسه اكَعدت
يبو صالح   يبو صالح
***
آخ يلـــــــــــــي كلبك بنيرانه شاجر
بيوم سابع مات ابوك وموش عاشر
اضلوعه سلمت مادبج فوكاهه حافر
وما بقت عنده أخت تكســر الخاطر
عالشريعه   اعيونه ماشافت هوت عالشاطي رايه
عالشريعه   العسكري ماعنده اخو طاح اعله مايه
المن اعيونك درت    بيا صحن هسه اكَعدت
يبو صالح   يبو صالح
***
وين ناصب مجلس وســـــــارح خيالك
هسه ياكبة ذهب صـــــــــــارت اكبالك
أحنه نعرف يا هـوى اليطري اعله بالك
واحنه نعرف ياجــــــرح عذب احوالك
ندري هسه   يم ضريح حسين ناصب فاتحه
ندري هسه   تبجي عالمســموم تنعه بنايحه
ندري هالمجلس قمت   بيا صحن هسه اكعدت
يبو صالح   يبو صالح
***

ابو علي الركابي

ــاهــو الـبـيـنـه حـارگ گـلـبـه ومتانيك
ويـاهــو الـبــيـنه صـافن بس يفكر بيك

يـاهـو الـيـسـهـر الـلـيـل بــدمــع محتار
ويـاهـو البـينه حد وجه الصبح يبجيك

حـجينه هـواي بس هو الحجي شيفيد
بـاللـيـل انـتـعـاهـد والـصـبـح نـجـفيك

فــكـرنـه بـخـلـگ مـاتـســوه اي تـفكير
وانـت ولا اُبـالــي ومــحــد يـنـاجـيـك

صلـفـه اگـلـوبنه اتـاني اللي مـايسوون
وماكو البينه صادگ يگعد ايـحـاجـيك

بــالـشـده نـنــدبك تـفــرج انــخـلــيـك
كــلـهــا اتــريــد مـنـك مـحد الينـطيك

يـاهـو البـيـنه يشعل روحه شمعه بليل
ويـبـلـل شـاربه بـدمـعـه الحزن طاريك

يـاهـو الـبـايـع الـدنـيـه بـرخص ويهيم
ومـن گـلبـه ولـسـانه من صدگ شاريك

مـحـد بـيـنـه عـاف الـدنيه ساعه بيوم
ويـگـعـد عـالــدرب يـنـتــظــرك يـحيك

اذا صـاحـبـنـه عـنـه يـغـيــب مـانرتاح
شـجـانـه وانـت امام وماسئلنه اعليك

يــاهــو البـيـنـه يـاكـل روحه بالتفكير
مــانـعـرف نــعـيـنـك نـعـرف انـئـذيك

الوفه وياك بـس الـشيـب والـدمـعـات
واحـنـه الـمـاوفـيـنـه بـيـمـن نـجازيك

اعـذرنـه اجـيـنـه انـــتــوب يـــامولاي
وهـالـمـره اجـيـنــه نـلـتــزم بـايــديك

وين اتـروح نـمـشـي اويـاك هيج نريد
وكـلـنه انـطيح دمـعه يــم اثر رجليك

قــصـرنه ونــضــل امــقـصـرين هواي
بــس بـمجلس احسـينك امل نرضيك

ابـدمـعـة الـزينـب انعينك يهالمهظوم
والـغـربـة رقـيـه نـبـجـي ونـواسـيـك

اللهم عجل لوليك الغريب الفرج


ابو حميدة الشويلي

اللهم_عجل_لوليك_الفرج

تانيتكم يهل المحنة شكــــــــثر تانيتكم
تانيتكم لاخر نفس جنت أنتضر تانيتكم
زينب أنه اليحجون عني
ما واحد المنكم حضرني
تانيتــــــــــــــكم
.....................................................
يهلــــــــي يخوتي يامن تسمعوني
ذبحني الشوك جا يمته تحضروني
من كثــــر الدمع ما شوف بعيوني
صوفر شيب راسي وأختلف لونـي
ناديتكم بدمعي وصحت وكت الفجر ناديتكم
تانيتكم لاخــــــــر نفس جنت أنتضر تانيتكم
بجى الحجر يا ويلي وني
زينب أنه اليحجون عنــي
تانيتــــــــــــــــكم
............................................
زينب آنه زينب حيرتـي حيرة
أي لا أم لا أبـــو لامن عشيرة
أخوتي مذبحه بديره وانه بديرة
غريبة أبين وادم باعت الغيـرة
فركاكم بضهري بقى تارك أثر فركاكم
تانيتكم لاخـر نفس جنت أنتضر تانيتكم
ما أدري عدله ميته جني
زينب أنه اليحجون عني
تانيتـــــــــــــكم
...................................................
وي كـــــــل مغربية أشتعل شمعه
وتجي أم عباس يمي وننحب وننعه
أكلـــــها أعله النهر جفينه متكطعه
وتكلي حسين بيده العشرة شو تسعه
طاريكم رد بيه لسياط الشمر طاريكم
تانيتكم لاخر نفس جنت أنتضر تانيتكم
شما ألتفت يوجعني متني
زينب أنه اليحجون عني
تانيتـــــــــــكم
.................................................
عشت عمري جرح ما ينجبر كسرة
شما أخطـــي يرد بيه الوكت عشرة
آه أعله السحك خيــــل العده صدره
وآه أعله الوكــــــع لا يمنه لا يسرة
ياذيكم وضعي وتعب درب اليسر ياذيكم
تانيتكم لاخـــر نفس جنت أنتضر تانيتكم
شيريد دهري وحزني مني
زينب أنه اليحجون عنيي
تانيتــــــــــــكم
......................................................
بعدكم يا هلـــــي ما ينفع أعتابي
ملك الموت جـــم مره يدك بابي
شما عاين عليه وعاين أمصابي
يشم ريحة حرك خيمة على أثيابي
ياريتكم تحاجونه ماريد العمر ياريتكم
تانيتكم لاخر نفس جنت أنتضر تانيتكم
كلولي شيب راس حزني
زينب أنه اليحجون عني
تانيتـــــــــــــــــكم
....................................
خادم خدمة الحسين
الشاعر
محمد الموالي

حبيبة فاطمه..أملاك السمه تبجي البجيها
بديار الغرب.. أمن أهلها ما سلم واحد يجيها
كل أهلها امذبحه..وهيه تقره الفاتحة
حبيبة فاطمه
...........................................
وحيده وعاشرت دمعتها بالغربه
ومن طبع اليحب يستوطن الحبه
زينب عاشت وماتت على العتبه
مو سهله اليعيش وكلبه مو كلبه
من طبع الورد..يذبل والعطرثابت قراره
زينب والحزن..ربه وياها واخذ دور الصداره
دمعه دمعه توضحه..وهيه تقره الفاتحة
حبيبة فاطمه
..........................................
بدت زينب حياة الوالده بلمحه
مثل خيط الفجر من ينذبح صبحه
طاحت والجرح ضل ياكل بجرحه
من شافت عليها ايشيع السبحه
اول مضلمه..زينب شافت الزهره وكسرها
صاحت ياعلي..امي اثمنطعش بعده عمرها
ودعت فجر الضحه..وهيه تقره الفاتحه
حبيبة فاطمه
...........................................
عاشت زينب وعاش الحزن بيها
ليل انهار تتوضه ابواجيها
صلاة الوحشه ليليه تصليها
خوفن لا علي يمشي ويخليها
امر الله اقتضى..وي طرة الفجر حيدر تودعه
ما تدري علي..مشه عنها وبعد ما منه رجعه
وين ضلت سارحه..وهيه تقره الفاتحه
حبيبة فاطمه
...........................................
ضلت من بعد حيدر تجر اهموم
تعاين للحسن والعبره تجري دموم
من شافت اخوها طايح ومالوم
طاحت يم جبدته طيحة المسموم
تعاتب والدمع..حفر خدها وترك بيها علامه
دخيلك يا علي..انهدم بيتي وطفه نور الامامه
ليك عيني شابحه...وهيه تقره الفاتحه
حبيبة فاطمه
............................................
للطف من مشت مهيوبه بخوتها
تمشي والكمر حداي ناكتها
ماتدري المنيه هناكه ساعتها
لجن عدها وصيه وامها وصتها
وصيتها الخدر..ليلة عاشر محرم تحرسه
ولو مرها الشمر..تخزره ولو حجه زنيب تخلسه
جرح بيها ماصحه..وهيه تقره الفاتحه
حبيبة فاطمه
......................................
رجف زينب كلبها وهجمت الضلمه
تشوف اعله النهر جيش الشمر زحمه
ركضت من على التله ونعت بسمه
واذا بحسين يمشي ويعثر بهمه
تسأله كافلي..وينه مارجع مشتاكه اشوفه
يكلها اعله النهر..طايح زينب اوده جفوفه
خلي سكنه تسامحه..وهيه تقره الفاتحه
حبيبة فاطمه
................................
ماتت زينب وموتتها عالفطره
من شافت اخوها حسين عالغبره
ومن شافت شمر كاعد على صدره
صاحت يا شمر لالاتحز نحره
اعز امن الهوه..من اتذبحه تذبحنه سويه
ماهمه وكطع..راسه وكام يتبختر عليه
موتي لحضة مذبحه..وهيه تقره الفاتحه
حبيبة فاطمه
............................................
جرح يتبع جرح والحيل المها
من ضلت وحيده ولا اخو يمها
حرمه والشمر يفتر على اخيمها
تمنت من عساها ماتت اوي امها
عمرها امدللا..وما مس الهوه طارف عباها
مو مالت سبي..تموت ولا شمر هوه السباها
وينها اوين الرحه..وهيه تقره الفاتحه
حبيبة فاطمه
......................................
خادم خدمة الحسين
الشاعر 
محمد الموالي