الحياة دي بسيطة، تصرفات بسيطة مابتسوى حاجة عندنا، تأثيرها يكون عظيم في حياة ناس تانية! حركة بسيطة بس منك، ممكن تغير حياة زول تاني بالكامل، وتحول مزاجه من كئيب لسعادة، ومن غربة لإحساس بالإنتماء. لمن تدخل مجلس إنت متعود عليه، وتلقى زول جديد ماتبقى زي بقية الناس وتمشي تقعد مع الناس اللي بتعرفهم وتضحك وتهزر، حاول قبل ماتمشي ليهم إقعد مع الزول الجديد وأكسر حواجز الخوف والغرابة اللي حاسس بيهم، إسألو من حالو وعرفو بالناس اللي موجودة، وخليك معاه لغاية مايقدر يدخل في الجو بالتدريج، وحاول رحب بيه بحرارة وببشاشة "فرح"، التصرف البسيط ده حايخليه يحس بإن مرحب بيه وحايحسسه بالامان. أيضا في لمات العيلة دايمًا بيكون في زول خجول أو بيلخبط الكلام (أشتر)، مابيعرف يتكلم ويعبر بصورة كويسة، ومابيحب أن النظرات تكون موجهة عليه لأنها بتحسس بضغط عالي، فحاول تتكلم معاه وتسمعه بالرغم من شتارته في الكلام، وحاول حسسه إنك فاهمو بحق وحقيقة، وأمتص خوفه وتوترو بأسلوب مرحّب ومشجع، الحاجة دي مش بسيطة لكن أثرها عظيم. ولو لقيت زول في الشلة الناس كلها بتحاول تضحك وتتنمر عليه (تتعرص) خليك الزول اللي بيغير الأجواء! بدل ما تشارك معاهم في الجو السلبي دا حاول تحوّل النقاش لموضوع تاني افتح موضوع ظريف أو قول قصة لطيفة تغير بيها مجرى الحديث وتريح الزول ده من إحساس الأحراج، وتخليه يحس إن في ناس شايفاه ومقدراه. الحياة ياخ بسيطة جدًا وكلها قايمة على تعاملاتنا مع بعض والتفاصيل الصغيرة، زي الكلمة الحلوة، البسمة السؤال البسيط زي: "كيف حالك؟" حاجات صغيرة لكنها بتفرق كتير، كلمة منك بتدي أمل لزول كان خلاص قريب يستسلم! فكر تكون دايمًا الزول البيلجأوا ليه الناس وقت ما يكونوا مضايقين خليك طوق نجاة للغرقانين وسط همومهم ما عارف يمكن تصرف بسيط منك يغير حياة زول بالكامل أو يوريهو الدنيا بمنظور جديد وأجمل .. في النهاية الحياة ياخ ما معقدة فكن نسمة دعاش خفيفة تمر على الناس وتريحهم بدل ما تكون شرارة نار تحرقهم محمد عمر