صباح الخير ❤️ و أنا عم تابع استطلاع رأي بمقابلة صارت بشوراع الشام ، لفت انتباهي كلام ست كبيرة بالعمر . طبعاً سؤال المقابلة كان برأيكم أي أفضل خطبة الأهل أما الخطبة الي بتكون عن حُب .. و السؤال كان موجه لنسبة منيحة من الناس بينهم شباب و صبايا .. الأغلبية كان جوابهم أنو أكيد الأفضل هو خطبة الأهل و السبب أنه ( ما بقي أشخاص منيحة !! ) أو ( ما ضل ناس صادقة !! ) و لكن في كلام من امرأة كبيرة بالسن حكت كأنها عايشة تجربة مريرة و تسببت الها بخيبة أو كأنها انجبرت على شخص ما كانت تحبو و انفرضت عليها عادات أهل زمان أول . قالت : ( خطبة الأهل دمار ، خدوا يلي بتحبوه و إذا ما عملتو هيك رح تعيشوا كل عمركم عم تتحسروا و تندموا !! ) للوهلة الأولى بتحس كلامها في غصة و بنفس الوقت كلام بلامس الواقع فعلا .. و بالأخير سواء كان الخطبة عن طريق الأهل أو خطبة حب ف المهم هو التفاهم و المودة و لكن .. يلي بحبك رح يحبك بعنادك ب مزاجيتك ب عصبيتك و حساسيتك و هدوئك و بجنانك و بعقلانيتك .. رح يتحملك بكل حالاتك .. رح يشوفك بكل الأوقات و يلاقيك نجمة سماه ... ع طول . الفكرة و الخلاصة ... كونوا مع يلي بتحبوه لأنه هي حياتكم و رح تعيشوها مرة وحدة . و أنتو برأيكم أي أفضل ؟ خطبة الأهل و لا تكونوا مع الشخص يلي بتحبوه ؟؟ عطوني رأيكم بالتعليقات يا حلوين 😍😍