#آه_يازينب 💔طور : ودعت الحسين + يا زمن وين الأحباب
.
زينب الهاشميه .. عمري كله اذيه
من رزيه لرزيه
__
آنه زينب بت علي بنت الاطايب
آنه زينب والكسر ظهري المصايب
وحدبتني والله يا شيعه النوايب
ودنيتي مني خذت كل الحبايب
فارگت أهلي كلهم .. گلبي ذايب لجلهم
آيا سهم المنيه .. من رزيه لرزيه
__
عاشرت گلبي المصايب بالتتالي
وغالي يرحل مني والله اخلاف غالي
من رحل جدي وغدت ظلمه الليالي
لحظه مِنِّ الهم فلا مرتاح بالي
وشِفِت أمي اعصروها .. سگطوها وألموها
وكسروا ضلوع الزچیه .. من رزيه لرزيه
__
بليله ظلمه ودعتها ومني راحت
وروحي لحظه اخلاف أمي مستراحت
مرت الأيام والأملاك ناحت
علي حين اعمامته مدميه طاحت
منطبر راسه شفته .. ما يرد لي عرفته
وراح حامي الحميه .. من رزيه لرزيه
_
والحسن مسمومه چبده راح مني
والرموها اجنازته بالطف رمتني
همه باجر يضربوني فوق متني
وبدت قصة كربله الحيل اهضمتني
اخواني واعيالي كلهم .. بالطفوف افگدتهم
انجوم فوگ الوطيه .. من رزيه لرزيه
_
ركْضِتي امن التل لعد ابن امي احسين
خذت من عمري يشيعه جملة اسنين
مدري ألطم مدري أبچي بحرگه وونين
مدري أرجع وألم بالخيمه النساوين
مدري أظل خويه يمه .. امن النحر يجري دمه
راسه عالسمهريه .. من رزيه لرزيه
_
وانسبيت وگلبي عانه كل الآلام
بالخرايب مرروها والله لأيتام
واعظم امن الطف عليّه طبة الشام
آه منها ومن جرحها وهضم الأيام
آيا گلبي مِنِ الشام .. تالي اعيوني اتنام
بيها نومة منيه .. من رزيه لرزيه
_
#فاطمة_كريم