#غَزل_تبری
#قربان_طالبی_دادوکلایی_ساری #چلّه_شو
وَلگِشن بَیّه تموما ، ویشه لختَسّه ددار
چکلِ اسپه پِکت ، دَرونِ جا بَیّه دیار
لتُ لتکا جه تیکا ، تاجنه تا چاجکله بن
سوزِ سرمای دله ، وشنایی ره زنده هوار
اَبیا ورفِ بنِ زور ره پشو زنده د دیم
بخَور هَسّه، ونـــه دم تَنه ره بَیّه سوار
چلّه را دَیّه ، بَرّسّی یه ، نَفس زَنده هَنو
گِسه ره وا هدائه ، دَسّه بَزوئه شه کتار
په چَره بَیته بیارده ، مه نَنه اَمشوی شو
وه عاروس بَیّو ، هِنیشته اَمه کرسی یِ کنار
سرخِ تَش هَسّه انار ، مَجمه دله خنده کَنون
یادِ اُون روزا بخِر ، عاروسِ کَش زونه اِنار
دشوئو پشتِ زیکو ، نون و چایی کرسی یِ سَر
وَلیک و کندسِ وَر ، دَسّه جَمی بینه قطار
گَتِ پر حُسنی گنه ، زَنده هوا ورفِ شلاب
اَنده پَر کنده کوتر ره ، تا بی یه خوردِ برار
همه جا ، دشت و همن ، اسپه قوا وَهمنِ تَن
پیرِ زن جار بَزوئه اَی دَرِنه فصلِ بهار
اَمه عمر هَسّه برار ، هی دَره شونه بِگمون
کجه دَرمی ، چچی کمبی ، چتی بَیّه اَمه کار
برو تا قَدرِ هِئی ره بَدونیم و بَووشیم
چه خشی چه ناخشی یِ دله همدیگه یِ یار