این چند بیت شعرم راتقدیم میدارم به مادر عزیز وارجمندم مرحومه مغفوره
#حاجیه_خانم_آمنه_امیری که پدرم نزد این خانواده شریف روزگار خوب و خرمی داشته است یادش گرامی باد جهت شادی ارواح تمامی مادران خاصه این مادر گرامی صلوات
خوامه قصه بوم قصه بسیار
قصه بوم از یک زن عرضه دار
بوم از خاله امنه پر کار
تن خسه داشته نداشته قرار
مهر و محبت بیه ونه بسیار
من ونه مهمونا وه م جان مار
دشت وصحرا و سره کرچال کار
ناشو معلوم بیه ناروز بهار
تیرنگ خو داشته وه بیه بیدار
صواحی که بیبو اسبه زوءه بار
کانه ملک سره کرده هدار
مشتی عمو جان بیه ونه پیشکار
خنه محرم بیه به مثل برار
زمسون توبه کرده از دس کار
سال که بیبو وه کرده قرار
گوره راهداءه راسا تیر بزار
بهار ماه بهی بو چرده زوءه دار
کوکی سر دارا خونسه زار زار
تیکا پر کشیه این دارو اون دار
جیک جیک کرده همه جاره زوءه جار
تسکا دار سر کلاغ کرده قار قار
اویزون هاکرده گیسه ره ولگار وازوءه تو خرده ممرز واشدار
ولیک ته تی یواش بیه ویشار
ونوشه گلام ره بزوءه کنار
ستاره واری بهیه دیار
بچابچا ونه ور بتته خار
چتر بزو همه جاره ککی مار
همه ور اموءه زنبور زنار
کلوی ته تی سر بیتنه کار
بگردمخداره دارنه پشتکار
چه بساته وشونه خله پر کار
ش تنه خارسه دارلوگلنار
خالک گوگزا ونگ کرده تلار
بارک بن اسا تازه تلم مار
مرم کرده چرخ زوءه دور تلار
خوی جا راس بیه پر شیر خنار
ونگ واکرده اون قشنگ اشکار
سر شاخ بهینه م طاوس و سلنار
خدا قوت داءه ش جان برار
صدا زوءه که مشتی گو ره خار دار
چرده بءیر هاده گوگ و گوگ مار
بیار هیمه که تش هاکنم تلار
دم داءهچایی ره نخرده نهار
باغه دور هاکنه بتاشه تیردار
وارش بمو بو ونه کار بیه زار
چکمه ونه لینگا دوش ولگ بیه بار
اگر دم بزه بو افتاب شیه مار
اتا خله مونسه خنه کار
بی شوم بینه وچون خو شینه بی مار
ای جان خدا ته وره نگهدار
فردا ونه سر بزنه ش تیمجار
بنشه زمینه وه تک و تنار
اتی دم بزنه هنیشه نفار
عرق درشیه ونه چار بند جار
مگر بتونه وه بهیره قرار
گنه زودباشم که افتاب بورده مار
نشا نی یه بمونسه چندتا کار
چتی ونه بوه م کار بیه زار
م دل پءی دره کار دارمه بسیار
ای دادوبیداو ای جان برار
وچون در بوردنه بهیه تنار
خور نارنه از ونه کار و بار
روزو شو کشنه وه چش انتظار
کدورت در بیارده ونه دمار
صورته چین هدا اسا چنده خار
کمر دلا بیه غم روزگار
لینگه درد جا چتی اینه کنار
قدو قوت بورده تن بیه نخار
اسا پیر بهیه ش درد گرفتار
جز خدا ندونه ونه دل زار
بی خود نیه وعده هدااون دادار
بهشته زیر پا دارنه جان مار
مار نءو ملکه پروردگار
خنه سو هسه خدا نگهدار
صبر خدا دارنه هسه خش رفتار
وچون که ونه جا کننه دیدار
تمام غم و غصه شونه کنار
دنیای بی وفا هاکردی چی کار
امان ازدس ته اوف ای روزگار
مهر و محبت گم بیه جان مار
اون عشق ووفا بورده کنار
غم سنگینی کنه اون چار بند جار
انگار دله سر هایته لم ولوار
بدبیه زمونه نارنه اعتبار
طول کشنه ادم بهوه ویشار
مثل قدیم واری نکنه کار
امان از دس این چرخ روزگار
ندونه ادم ره کفنه چی کار
شایدبرسه روز بوه شوی تار
غم وغصه بهوه شام ونهار
مشتی عمو بورده سر بیه قرار
دیگر اون هیرا هیرا بورده کنار
نخر غصه اسا ته ای جان مار
انگار که این دنیا هسه بازی جار اتی انه اتی شوننه تنار
خدای پیش لنگنه همه کار
به حق پیغمبر نویم گرفتار
ریکا فرهاد بیه شه مار پاکار
با مهر و محبت بیه خش رفتار
برو اقا فرهاد م جان برار
که دلتنگ تومه ندارمه قرار
ندومه کجه دری چیه ته کار
ارزو دارمه من هاکنم دیدار
هر کجه دری اسا مره یاد دار
#شاعر :
#آقای_بهروز_محرابی🌿 @kalikolaiha 🌿