روايتي 🌸

للان ما حصلت ولا بارت تكميلي اقنعني للاسف ..

بشوف التصويت بعد يومين وعليه نعتمد ، لكن البدايه مبينه موافقين …

الكاتبات الذي بالقناه ، اللي عندها استعداد تكملها تدخل لي البوت ، @Yesman3_bot ومناره لو موجوده وحابه تكمليها تواصلي معي ووحشتيني ❤️

لانه لو كملتها انا بحتاج وقت طويل ، هذا المشكله معطله لي حياتي كلها مش بس الكتابه ، خاصه وانا ب امريكا وكل شي اصبح الكتروني ومعتمد على السوشل ميديا ، بس احنا نقول الحمد لله على كل حال ، وما شي منعه الله الا لحكمه .

اتخيلو انه مش بس مش قادره اكتب حتى ما اقدر افتح واتساب او فديو يوتيوب واسمعه، عندي حساسيه من التلفون تعبت معها جداً ، اتجنب التلفون وخاصه الكتابه ، فما رايكم لو اخلي واحده من زميلاتي الكاتبات تكمل لكم الروايه ؟ بقول لها بعض الاحداث والباقي بتكملها بمهارتها .

السلام عليكم ، كنت مسافره وماقدرت افضى ، والان عادنا رجعت وبنكمل الروايه ان شاء الله والمعذره 🥲💔

كل سنه وانتو طيبين وبخير ، طبعا اكيد بنوقف يومين ثلاثه او اربعه عشان العيد ❤️

خلاص ان شاء الله بنكملها 60

البارت 52

بعد مرور شهرين …
كانت تالا تعافت وطلعت من المشفى ونبيل منتظر على احر من الجمر وعد ابوها …

غرام ماقدرت تعرف ابدا الرابط ببن علياء وايدن ، وقله لقائتهم لما غير وضيفته ….

لكن ابوه كان مشتاق له جداً ، وجالس سرحان وهو يفكر به عندما قاطعته سميره : مالك ذي الايام بالك مشغول واصل
ابو ايدن: افكر ب ابني
سميره: ماله شي مش قال نبيل ان وضعه تمام
ابو ايدن: ايوه هو دبر نفس وانا بصراحه فخور به قوي انه بطل يعتمد علي نهائيا وطلع قد المسؤؤليه بس انا مشتاق له لاتنسي انه اول عيالي وولدي الوحيد وفرحتي الاوله
سميره: طيب اتصل له يجي
ابو ايدن: لا ابدا ، بس انا مقهور كيف قدرت ذي البنت تشله مني
سميره: طيب هو ماعرف كيف يرضيك الصدق، الولد مايشتيش علياء الله يهديك قلبه مايل لوحده ثانيه خلاص خليه يتزوجها
ابو ايدن تنهد وقال: اسمعي اتصلي له قولي له ابوك تاعب وخليني اشوف عيجي يبسرني او لا ، ولو جاء اشوف كيف هو اول مره يغيب عن عيني شهرين ونص ، احس داخلي فارغ وهو بعيد
سميره: حاضر بتصل له وانا متاكده انه بيجي ع طول
…..
كان رجع من الشغل مع غرام : خلاص من لما ترقيت ماعاد اشوفك الا نادراً
ايدن: حلو عشان تشتاقي لي
غرام: هه انا اشتاق ؟ لا ي بطل انا قلبي مغلق بحديده
ايدن: الله الله اكيد قد به صداء
وهو يكلمها تلفونه بيرن شاف الاسم ومارد ، اول ما وصلو البيت شاف لغرام: انزلي وانا بروح اشتري لي عصير واجي
غرام: كنت عتشتري وانا معك
ايدن: نسيت والان ذكرت عتطوليها وهي قصيره
نزلت وهو يشوف بعدها اول مادخلت مسك التلفون ودق ، رده : الو
ايدن: سلامات انتو بخير ابي بخير انتي بخير اختي بخير
سميره ابتسمت: لا تقلق مابش شي الا ابوك تاعب شوي**
قاطعها بفزع: ابي ؟ ماله ايش حصل
سميره: مدري تعب علينا شوي ارتفع عليه الضغط ونشتي نغير له نفسيته بس مارديت مافعل ، قلت اكلمك ربما لو اتصلت له تتعدل نفسيته
ايدن: اتصل له ايش ، انا جاي !
سميره ابتسمت: ارحب
ايدن: بس الصدق مافيش معي تذكرت الطياره ، احجزي لي من عندك وانا اجمعها وارجعه لك
سميره: ههههههههههه الله المستعان ، من عيوني ومابش بيننا ذا الخبر ، انت ابني
ايدن : تمام ي خاله بس الان لو سمحتي عشان قلبي نار على ابي
سميره: حاضر اغلق واتواصل مع اقرب مكتب طيران واحجز لك وارسل لك التذكر
ايدن: تمام
غلق وهي مبتسمه وابوه يشوف لها : ايش قال
سميره: قال يشتي يجي يبسرك ب اسرع وقت بس مابش معه قيمه التذكره
ابو ايدن: هههههههههههه خليه يعرف قيمه ابوه
سميره: بس الصدق قلق عليك قوي
ابو ايدن:….
……..
دخل هو وهو يفكر ب ابوه ، وصل وغرام مع امها منتظرينه ع العشاء ، جلس بتعب :….
وهي لاحظه عليه وبتشوف ل امها ، ام غرام : ادم ؟ مالك ي ولدي وجهك قالب
ادم : لا والله بس قالو ابي مريض
ام غرام بغرابه: ابوك مريض مش قلت اهلك ميتين
ادم: امي ميته ابي تمام عادوه ماعاد معي الا هو
غرام: طيب ماله
ادم بقلق: مدري بكره بروح له وابسر
غرام : تروح ؟ طيب فين
ادم : يوووه ي غرام خليني يكفيني ذي فيني ، المهم انا بكره مسافر والمكان ذي انا به يمكن مابش به تغطيه بس انا اكون احاول اراسلك واتس متى ما قدرت وابسر لو محتاجه شي ، مابطولش يمكن اسبوع كذا بالكثير

مشي وهي تشوف بعده ، وامها تتكلم: واضح مزاجه معكر قوي وانه قلق على ابوه
……

البارت 51
اليوم الثاني ، اهل تالا وقعو على العمليه ، فهد وهاله هم اللي بيعملو العمليه ، ونبيل كان بالانتظار مع اهلها ، وهو يروح ويجي وماقدر يجلس ، مجرد ما خرجت تالا دخلت العنايه على طول ، دخل هو يشوفها وكانت كاسره خاطره وقلبه …

….
اول ماوصلت علياء دخل لها: انا الشغل ذا مش مشتغله بخرج وادور لي عمل ثاني
وقفت: هاه وليش
ايدن: مش عاجبني وانا شهادتي تدي لي عمل احسن من ذا
ابتسمت: خلاص لا تخرج ولاشي انا بدي لك عمل احسن منه
ايدن: مش اقل من مدير اداره
علياء : هه ، انا الذي اقرر مش انت
ايدن: خلاص بروح اشتغل مكان ثاني
شل نفسه بيخرج وهي وقفته: طيب تمام
شاف لها وهي تكلم نفسها” عارف اني مايخليه يغيب عن عيني “ : تعال اجلس بقول لك ووين تروح

غرام تكلم نفسها: ماله ادم طول عند علياء على ايش يتكلم
شوي وخرج وهي تشوف بعده: ليش ما دخل يعمل شاي ؟
كانت مستغربه بس رجعت تكمل عملها عندما جاءت هبه: غرررررام انتي عارفه وش صار
غرام: ايش
هبه: علياء خلت ادم مدير الاداره ذي انا بها ، اكيد قال لك
فتحت عيونها بدهشه: كيييف ؟؟ ماقال لي والله
هبه: انا انصدمت حرفياااااً ، كلنا انصدمنا والله ان شكك في محله
غرام: طيب هبه تتوقعي ايش بينهم ؟
هبه: والله ما اعرف علمي علمك ، انا نفسي قد فيني فضول اكثر منش ، بس هو زوجي او زوجك اساليه ؟
غرام: هه يسعم انه سهل ، مابش اخطر منه عيخرجني من السالفه معرفش كيف بيفعل
هبه: والله موضوع محير محير ، وانا كنت شاكه انش مش عارفه وطلع شكي في محله ، زوجك ذا غامض قوي
…..
جاء المساء وقبل ما يروح دخل يشوفها ، كانت مازلت بالعنايه بقي يشوف لها لثواني : ااخخخ ي تالا احس قلبي بيوجعني بطريقه ماقدر اشرحها ، انا متالم من المك والله ، لكن وجعك في جسدك ووجعي في قلبي

خرج من عندها مقهور ووقفه ابوها: نبيل
اقترب منه: كيف بنتي وليش مش مخليني ابسرها
نبيل: لا تقلق ي عم انا دخلت الان وشفتها ، بتكون بكره احسن ان شاء الله ، بس العنايه وقت الزياره محدود جداً ومش بالليل روح ي عمي وانا قد وصيت عليها الممرضه اي شي علاج او اي حاجه بيفعلوه لها هم لا تقلق
ابو تالا: كيف ما اقلق ي نبيل انا مامعي بالدنيا اعز منها ، كيف اقدر اغمض عيوني وانوم ، وهي دخلت العمليه وهي تبكي وللان مش قادر اشوفها
نبيل مسك كتفه: ي عم استودعها الله واحنا عملنا كل جهدنا والامر بيد الله بالاول والاخير
ابو تالا: استودعتك الله ي بنتي
نبيل مشي وهو مقهور طلع سياره بالكاد يسوقها وصل البيت وقف السياره من امس ما نام كان قلق على تالا وبقي طوله الليل بالمشفى وما اكل ونفسيته تعبانه جداً ، بدا المطر ينزل ، نزل من السياره وجلس امام البيت وقطرات المطر تنزل عليه وهو يتذكر تالا كم كانت تحب المطر وكان يبكي وصورتها وهي بالعنايه مش قادره تطلع من راسه كانت دموعه تنزل مع نزول المطر : يالله سامحني انا السبب ، انا ذي وصلت البنت ذي لهذي المرحله كله بسببي انا

بقي ساعه يبكي بين المطر ، وبدا يحس بتعب شديد لدرجه انه بالكاد فتح باب البيت وارتجم على الفراش بالصاله ، امه سمعت صوت الباب لما تغلق بقوه ونزلت ، شافته مرمي ع الفراش اقتربت: نبيل ؟ مالك ي ولدي
مسكت يده وهو مسخن جداً : نبيل ، يوووه انت مريض ي ولدي
بالكاد رد عليها: لا تقلقي يمه انا بس بارد
ام نبيل: يووووه اجهدت نفسك بالشغل وانت شكلك حتى ما كلت ، وملابسك كلها خضراء
تعال الغرفه غير ملابسك وانا بدي لك شي تاكله
رد عليها: مالي نفس يمه ، ولا بي طاقه اقدر اقوم
دخلت غرفته ادت له ملابس وبعدت له الشميز: يالله انا بساعدك غير حتى الشميز عشان صدرك لا يبرد
حاولت تبعد له وتلبسه الفنيله
ودخلت المطبخ ادت له اكل وبالكاد اكل لقمتين : يمه افتحي الدولاب ذي بالغرفه حقي وهاتي لي مسكن
سارت وادت له شرب حبتين وتمدد: شوي واقدر اقوم الغرفه احس نفسي مكسر
ام نبيل: مالك ي ولدي فيك شي ؟
نبيل: لا بشكلي مرضت من البرد
ام نبيل: اكيد بردت ولا شكلك رقدت ولا اكلت
نبيل ساكت عندما قالت وكإنها عارفه سبب تعبه: سمعت من سوسن ان تالا عتعمل عمليه وهي عندك بالمشفى
مجرد ماقالت كذا غمض عيونه : يمه تالا هذي هي مرضي كله
حاول يشل نفسه وقام : انا بدخل انوم انا تاعب قوي
شافت له: الله معك
دخل وهي تكلم نفسها” ولا بيرتاح لما يتزوجها “

كان هو مروح مع غرام بالسياره عندما قاطعت الصمت: قدك مدير اداره ولا قلت لي
ضحك: والله عادنا قلت نوصل البيت واقل لش
غرام: كيف لوما طلعت علياء كذا
ادم:انا طلبت منها تدي لي وضيفه تناسبني او ادورها بمكان ثاني ووافقت
غرام بعدم تصديق: بهذي السهوله
ادم: ياااه ، شكلها ما تشتيش تخسرش لاني قلت لها بطلع مع غرام
غرام: هه علياء ما تشتيش تخسرني انا او انت
ادم: وانا ليش ؟ او انا زوجها لا سمح الله
غرام: مدري بس سع الذي بينكم علاقه
ضحك: علاقه ؟؟ وانا وعلياء ؟ شفتي كيف كانت تتمسخر عليش انش تزوجتيني عاد بتقبل هيه ؟ غرام شيلي ذي الافكار من راسك لا عاد تربطيني مع علياء .

البارت 50

كانت جالسه سرحانه عندما قاطع سرحانها: غرام ؟
التفتت له :هاه ، ايوه
ايدن: روحي انتي اليوم انا معزوم بعرس واحد صاحبي وبيجو اصحابي يشلوني
غرام: فين ، من ذا صاحبك ؟
ايدن بمسخره: قلت لش صاحبي خلاص ، ادي بطاقته
غرام: هه مضحك ، طيب يالله انا بروح
قامت مسكت شنطته ومشت وهو يشوف بعدها وبدون سبب التفتت وشافت له بيشوف لها وهو ابتسم رجعت وبتكلم نفسها " في شي ناقص بس انا مش عارفته، ما يبينش عليه انسان بسيط مثل ما بيقول وكانه تربي ونشاء بعائله من طبقه راقيه ، وبعدين لو كان مثل ما انا اظن ، ليش تزوجني انا ؟ واكيد انه يعرف علياء بس من فين يعرفو بعض وكيف !!

كان جالس ع مكتب غرام منتظر علياء عندما طلعت : يالله
قام معها دخلت السياره وقال لها: بسوق انا
رجمت له المفتاح وابتسمت
طلعت وطلع وهي تكلم نفسها" صرت في مكان غرام اليوم "
ايدن: يعني عمي مش عارف ما اتكلمش امامه
قالت : لا انتبهه
ايدن ابتسم لما شاف خوفها: حلو الان صرنا متعادلين
علياء: كيف ؟
ايدن: تقلي لغرام اقل ل عمي
في نفسها" ي ابن ال **"
وشافت له: انت ابن عمي انا مارضش عليك بغرام ، واحده معقده اصلا كيف رضيت بك ما اعرفش
ايدن: شوفي ي علياء ، غرام ذي ب النسبه لي خط احمر
انا تركت كل شي عشانها تفهمي ، كل شي
علياء: طيب ليش ؟؟ ليش غرام بالذات
ايدن: سؤال اهبل ، هو مابش مبرر للحب
سكتت بقهر ، وصلت معه ودخل سلم عليهم وجلسو يتعشو سوا
…..
نبيل طلع يشوف تالا اللي كانت مع سوسن وسوسن تحاول تهون عليها: والله كم اعرف ناس عايشين بدون عيال عادي ماوقفتش الحياه ، ي تالا هذي رغبات وبالدنيا ذي في ناس محرومين من حاجات اهم
وكانت تبكي بس
عندما دخل هو : كيفك
تالا تشوف له: نبيل انا مش فاعله العمليه تفهم ، انا اشتي اموت ..
شاف لسوسن وهي وقفت: بروح شوي وارجع
خرجت وهو جلس
نبيل ب ابتسامه: انتي عارفه انه واخيرا ابوش وافق على زوجتنا وللااسف مابسمح لش تموتي بعد تعبي ذا
قالت بغرابه: صدق
نبيل: والله
تالا: بس انا مش موافقه ، لانه مشتيش اظلمك معي ي نبيل
شاف لها وقال بهدوء: تالا ، بتشوفي الشيب في راسي ؟ هذا كله نتيجه فراقش ومجهود الصبر ذي بذلته بعدش ، وتجي الان تقلي لي لا !
ابتسمت بالخفيف: عاد بتحبني مثل قبل
نبيل: واكثر والله
…
ايدن روح البيت وغرام سمعت صوته وطلعت : انت رجعت
ايدن: لا باقي خارج
ضحكت واقترب: ههههه
ايدن : في شي ؟
غرام: ادم ! بسالك انت تعرف علياء ؟ قد شفتها من قبل
ايدن: يالله احنا وسيره علياء ذي دخلت راسك ، علياء ذي اكثر بنت اكرهها ومن فين بتجيب ذي الافكار
غرام: بس انت اليوم انفعلت فوقها وماعملت شي ع غير عادتها، ادم لو انت حد ثاني كان ممكن تحبسك على مدت يدك
ايدن: غرام "قالها وابتسم" : بتغاري او كيف
سرحت بغرابه ووجعت قالت: اغار ؟ لا طبعا ، يالله بروح انام اصبح ع خير
مشت من جبهه وهو يشوف بعدها مبتسم

علياء كانت تكلم نفسها" الان هو مسك علي نقطه ضعف مثل ما انا ماسكه ، مابقدرش اقل لغرام بس انا بدخل الشك راسها "

نبيل: من غير ما توصي ، انا اهتم بالمرضى حقي فما بالك بكم
ابو تالا بيطلع عندها صادفته سوسن : ي عم
وقف : اهلا ببنتي
سوسن: صدق تالا تاعبه وهي هانا
ابو تالا تنهد بالم: ايوه
سوسن: خلاص خلني بمسي معها الليل واحاول اعدل من نفسيتها
ابو تالا: والله ما اقدر افلتها قلبي بيجلس ياكلني ، لكن انا واثق انك عتهتمي بها يمكن احسن مني ، لكن ي سوسن طمنيني عليها كل شوي
سوسن: من عيوني ي عم

البارت 49

اليوم الثاني راح عبدالرحمن اكثر من عياده ورجع لعند ابوه : يبه انا سرت اكثر من عياده واكثرهن قالين مثل كلام فهد ونبيل واصلا قالين العمليه خطيره ومايقدرينش يعملينها لوحدهن يحتاجين جراح جنبهن
ابو تالا: خلاص كان قد احنا هنا احسن ، خلينا ننزل عند الدكتوره هاله هذي ذي قال فهد عليها ونبسر ايش عتقل قبل ما تقوم تالا ماصدقت انها نامت شوي
….
غرام كانت في مكتبها وبيدها مقص تحاول تفك به ملف ، عندما خرجت علياء وايدن يشتي يسرح لها شاي ، شافت غرام وداخلها حقد وحسد وغيره منها ، اقتربت من خلفها ودفتها بقوه وكانت بتجرح عينها بس جرحت جبهتها التفت بفز تشوف
وعلياء على طول: بدون قصد **
بتكمل كلامها الا هو قاطعها عندما دفها بقوه للجدار : اييييييييشش عملتي
غرام انصدمت : ادم ادم اهداء حصل خير
علياء: مالك اقل لك بدون قصد
ايدن بصياح: انا شفتك ، انتي متعمده ، اعتذري
عادها بصياح : قلت اعتذري
غرام تحاول تتدارك الامر وهي مصدومه من انفعاله: اهداء انا تمام مابش داعي للاعتذار
انصدمت عندما شافت لها علياء: اسفه
قالتها ودخلت مكتبها ع طول وهو التفتت لغرام ومسك فاين وبانفعال: شوفي الدم ، كانت بتجي في عينك بس الله ستر
مسح الدم ب الفاين وهي تشوف له ومصدومه ومش قادره حتى تتكلم
ورجع قال: بس يالله الجرح سطحي الحمد لله
وانتبهه على دهشتها وقال: اجلسي اجلسي كملي عملك
كانت تشوف له بصمت
ايدن ابتسم: مالك ي غرام ؟ انا انفعلت عليك واصلا استفزتني
هداءت: لا لا بس استغربت من انفعالك بس
ماعرف كيف يلملم الموضوع وقرر ينسحب: خلاص انا برجع عملي تمام
جلست حاولت تكمل شغل بس ماقدرت ، قامت وراحت ل هبه: هبه ، ممكن اجلس
شافت لها: يوووه غرام مال وجهك من جرحك
شافت لها: جرح خفيف مش مهم
جلست وهي تتكلم: اسمعي انتي تتوقعي في شي بين ادم وعلياء
هبه ضحكت: علياء وادم ؟ ههههههه اكيد لا ايش بيكون يعني
غرام : ي اختي علياء كل يوم اول ما توصل تسال ادم وصل ؟ غير انه قبل كم يوم قالت لي يمكن يطلع خاطب او متزوج ي غرام وانتي سرقتيه ؟ استغربت ليش قالت كذا حسيت انهي تعرفه اكثر مني ؟
هبه: هي صح الموضوع غريب بس مش لدرجه بينهم شي
غرام: طيب اسمعي اليوم وانا جالسه احاول افك اوراق مارشفه بالمقص ، علياء دفتني من وراي وقالت بدون قصد ، لكن ادم وصل منفعل ودفها بيده قوي لوراء لما رجعت للجدار وصيح وكان منفعل قوي انا نفسي فجعني
هبه ب اهتمام: طيب وش صار طلبت له الشرطه او طردته او ايش ؟
غرام: لا لا اعتذرت
هبه بدهشه: هه؟ كيف ؟ ايش بتقلي
غرام: والله ، انا نفسي انصدمت
هبه: لا لا اسمعي ماذلحين اكيد في شي ، بس يمكن مش مثل ما انتي مفكره ؟ يمكن انه ماسك عليها شي ؟
غرام تفكر : ممكن والله
هبه: لان لو قلنا معجبه به مستحيل علياء ما تفكرش الا ب الماده ، لكن اكيد يعرف عليها شي مخليها تسكت له وتهتم كذا
غرام: وانا بحاول اعرف هذا الشي

كان هو بيحاول يهداء واخد لها شاي ودخل كانت جالسه مقهوره وقد بتبكي : كنت بدي لش الشاي قبل ما تفعلي ذيك الحركه
تركه وهي تتكلم : ليش مهتم بغرام هكذا
ايدن: كيف ليش مهتم ؟غرام زوجتي او مازلتي مثل ابي متوقعين اني بفلتها ؟ لا مستحيل غرام حبيبتي وزوجتي
وقفت ل امامه بقهر: طيب انا احبك والله انا طول عمري بيقولو لي انتي حق ايدن وهو حقك ، غرام ذي سرقتك مني ، وان كان على تصرفاتي اول ماجيت كلنا بنغلط
ايدن: لا ي علياء انا عمري ماكنت حقك ، انا وانتي ما نتشابهه اصلا ، طباعنا غير ، انا لقيت نفسي عند غرام وانتي اكيد بتلقي حد يشبهك ، بس اكيد مش انا
علياء بقهر تحاول تلملم كرامتها: طيب ابي عزامك اليوم ع العشاء بتروح معي
سكت شوي وقبل ما يتكلم قاطعته: طبعا مايعرف شي ، سال عنك عند عمي وعمي قال له انك هنا وانك مستاجر شقه واصر علي اعزمك
ايدن: طيب تمام
قالها وخرج وهي تشوف بعده ماقدرت تتحمل دقائق وانهارت بالدموع …
……
دخل ابو تالا بيتكلم مع الدكتوره هاله
هاله: انا كلمني امس نبيل بس ماشفت المقطعيه عادنا شفته الان بصراحه الوضع صعب قوي وانا ماقدرش لوحدي اشتي جرح جنبي يعني فهد او نبيل يدخلو معي العمليه
ابو تالا بقلق: لذي الدرجه
هاله: ايوه والله والوقت مش بصالحنا ، انا بتكلم مع فهد او نبيل انتم بس قررو وقت العمليه
ابو تالا:طيب تسلمي

وهو خارج حصل نبيل اللي مسكه على جنب: شوف ي عم انا كتبت لتالا مسكنات ومهداءت اعصاب عشان تنام لانه انفعلت قوي ، وانتم قررو العمليه لغدوه لانه التاخر بيصعب الحاله اكثر ، وعشان احيطك علم انه ممكن تالا بعد العمليه تدخل العنايه ، لانه العمليه صعبه ومش سهله ابدا
ابو تالا: طيب الدكتوره هاله قالت مابتفعلها الا وبه جراح جنبها ، عتفعلها معها
هز راسه بالنفي: لا انا كلمت فهد
ابو تالا : ليش ؟ انت اشطر منه
نبيل: ماقدرش ي عم ، تالا تعتبر من الاقارب لي ماقدرش افعل عمليتها
ابو تالا : طيب
نبيل: بس اوعدك انه بنفعل كل جهدنا انها تقوم ب السلامه !
ابو تالا : هي امانه عندك ي نبيل

48البارت

تالا: طيب خليني اموت عادي
نبيل: مش عادي مش عادي، وانا كيف بعيش بعدك ماقدرش اتحمل تروحي مني انا ماصدقت رجعتي لي !
تالا: بس نبيل انت للان ما تزوجت ولا خلفت كيف اظلمك معي
نبيل: ايش من ظلم ؟ انتي لو تكوني زوجتي بكون اسعد رجال بالحياه ومشتيش عيال يكفيني محمد
تالا: بس محمد مش ابنك عتضحك ع نفسك او بتضحك علي او كيف
نبيل : تالا انا ايش افعل بالعيال وانا ما احبش امهم ، انا اشتي شريكه حياه اشتيك انتي وبس وبعدين ابن اخي ابني اهدائي انتي وكل شي عيكون تمام ، انا بمشي قبل لايجي ابوش
خرج وهي تشوف بعده ورجعت تبكي
……
ادم وصل مع غرام البيت دخل وهو بيتصايح معها
ام غرام: ايش في واليوم كمان
ايدن: يرضيش ي عمه لنا متزوجين اكثر من نص شهر وللان مش راضيه توريني شعرها
غرام: يمه احنا متفقين الان مثل الخطبه مابش واحد يشوف شعر خطيبته بالخطبه
ام غرام ضحكت: ههههههه بس ي غرام انتو بينكم عقد
ايدن: ايووووه قولي لها ي عمتي ، انا اشتي ابسر شعرها
غرام: لو تموت
ايدن: شكله مش حلو قصير ومنفوش اكيد شجره صح
غرام ضبحت: مادخلك
امها: لا شعر غرام حلو و***
قاطعتها: لا يمه لا تقلي له
التفتت له: ايوه قصير ومنفوش وزفت ايش بتفعل عتطلق طلق
ضحك: ههههههه واطلقش عشان شعرك شجره ؟ لا طبعا الشجره ذي صار من املكي ولا تنسي معي ورقه موقعه منك
غرام بضبح: انا شكلي بقطع الورقه ذي وافتك
ايدن: يعني لوقطعتيها خلاص ماعاد انتيش زوجتي
غرام: يبيخخخ ييييييععع زوجتي ، انا مش زوجه حد افهم
شاف ل امها وهو يضحك: من جد من جد البنت ذي مجنونه
ام غرام: هههههه يالله غسلو ايدكم وتعالو اتعشو
ايدن: تمام
مشي ودق كتف غرام: بشوفه غصب عنك
غرام: شفتي يمه كيف فعل شفتي
ام غرام: هههه كنتو بواحده ذلحين اثنين
…….
علياء روحت وجالسه تتعشي مع امها وابوها بيسالها: صدق ابن عمش هانا قال لي ابوه وانه مستاجره له شقه ماجاءش هنا
علياء: هاه ايوه
ام علياء: وليش ماقلتي لنا
علياء توترت: احسبكم عارفين
ام علياء: شكله استحي يجي هانا من علياء
ابو علياء: كيف يستاجر والبيت ذا بكله حق ابوه بس يالله ، المهم انتي لا تنسي اعزميه غدوه للعشاء خلينا نبسره ونشوف كيف هو
علياء: حاضر وهي تكلم نفسها" ابي لو يعرف اكيد بيبطل الخطبه وانا مشتيش انا متاكده ايدن بيرجع لي "

14 حد بس بيتابع الروايه ، بس لا تقلقو حتى لو بس شخص واحد بيقرائها مش 14 بنزلها لعيونكم واكملها❤️

ابو تالا وهو يتذكر دموع نبيل: هو عارف وهو طلبها مني اليوم مره ثانيه ، خلي اختك تقوم بسلامه وبسالها ولو وافقت ما بعترض ، ماعاد بحصل لها احسن منه ، يكفي طليقها ومافات مات ، انت الان اشتي منك تشل المقطعيه وغدوه تجزع ع اكثر من دكتوره نساء ونشوف ايش بيقولو ، فهد ونبيل جراحين والجراح اول خيار عنده العمليه ، بس خلنا نشوف يمكن به حل ثاني
عبد الرحمن : حاضر
ابو تالا : روح انت وانا بجلس مع اختك
عبد الرحمن : تمام ، شل المقطعيه وروح
ونبيل جالس بالمشفى وهو يفكر بتالا ويتذكر كيف كانت منهاره وقلبه اكله عليه
ابوها كان جنبها عندما قامت فزعه وشافت انه مازالت ب المشفى ، وبكت: يبه طلع صدق مش حلم ، روحني انا فداك
اقترب منها وهي تبكي وماقدر يتحمل دموعها وكان يبكي معها
تالا: انا ماعاد اشتيش اعيش خلني اروح ل امي يبه ، انا كرهت الحياه ذي
ابو تالا مسك يدها وقبلها وهو حاضنها: بنتي اهدائي
كانت تبكي وهي تتكلم: ويينك يمه تعالي شليني عندش
ابو تالا : اذكري الله
كانت تبكي بصمت ، عندما دخلت الممرضه ومكنته ورقه: ي عم روح اشتري لها ذا العلاج وارجع
ابو تالا وقف: طيب
شله وخرج ونبيل منتظر بعيد شوي شافه خرج ودخل : تالا
شافت له: نبيل !!! لو سمحت لا تفعل لي العمليه ، قل لصاحبك مشتيش
اقترب: تالا ، ضروري اذا مافعلتيها بتموتي
تالا: طيب خليني اموت عادي
نبيل: مش عادي مش عادي، وانا كيف بعيش بعدك ماقدرش اتحمل تروحي مني انا ماصدقت رجعتي لي !

البارت 47

نبيل : ما بيحصل شي غصب عنك
شافت نبيل وانهارت اكثر
وابوها سحبه لخارج: انت ايش بتفعل هانا
نبيل: اهداء ي عم اهداء انا اشتغل هنا وانا كنت من الذي دخلو العمليه الاوله ل تالا
ابوها سرح ويكلم نفسه" يعني تالا التقت بنبيل ؟"
ورجع شاف له: انا بشل بنتي مشفى ثاني احسن من حقكم
نبيل مسك يده: ي عم انا فدا لك اهداء خليني افهمك لا تخاطر بحياتها اسمعني ي عم تالا مش بوضع يسمح لها تلف المشفيات واصلا ذا من احسن المشفيات هانا ما بتحصل احسن منه وكمان ي عم انا اخاف تسرحها مشفى ثاني يقولو لك ما تحتاج عمليه وتموت البنت ، تالا اذا ما عملت العمليه بتموت
ابو تالا: ايوه ي نبيل وليش ما تكون انت قررت مع صاحبك كذا عشان تحرم بنتي من الزواجه
قال ب اسف: الله المستعان ي عم الله المستعان ، انا معي ضمير مهني وانساني وليش بعمل كذا ب تالا وانا مازلت شاري البنت وراغب بها وانت اللي للان رافضني رغم اني قلت لك افعل اي حاجه تطلبها
قاطعهم عبد الرحمن اللي كان يشوف لنبيل واقترب: يبه
نبيل شاف له وهو مكن ابوه: ذي المقطعيه ايش به ؟
ابوه اخذه وقال له: ادخل عند اختك هدائها وهي بتحكي لك
عبد الرحمن دخل ونبيل مازل ماسك يده: تعال معي ي عم بشرح لك حاله تالا ، انا لي منعك لا تخلي كرهك لي ياثر على حياتها
سكت وهو حب راسه: انا لي منعك
مشي معه وهو دخله عياداته : اجلس ي عم
جلس وهو زاعل على بنته جداً ، نبيل مسك المقطعه: بوريك الان ايش حصل
رفع الاوله : بتشوف النقطه السوداء الصغيره ذي
ابو تالا هز راسه
وهو رافع الثاني : بتشوف الان كيف غطت المنطقه كلها ؟ الان هذا الجزء كله يعتبر ميت مابيوصلهش الدم اصلا وضروري نشيله ب اقرب وقت والا لاسمح الله تالا بتموت
ابو تالا قالها بحزن: كله بسببك ي نبيل لوما فلتها مازوجتها لذاك
مجرد ماقال كذا نبيل ترك المقطعيه ب الم واقترب منه وجلس ب الكرسي المقابل له والصمت مستمر بينهم ونزل راسه ورفعه ويحاول يتكلم لكن غلبته الدموع ، نزلت وغص بها وابو تالا يشوف
وقال كلام اختلط بدموع ومشاعر الم: لا تحملني فوق طاقتي ي عم ، اقسم بالله كنت مجبور ولا اقدر اشرح لك ، لكن اقسم بالله اني احب بنتك واني ابكي عليها ذي الدموع كل ليله
ابو تالا كان منصدم من دموع نبيل اللي بيشوفها لاول مره ولمس بها الصدق: بس ليش ي نبيل انت كنت ونعم الاختيار ومابش بك عيب والكامل الله وكنا نحبك
نبيل: يا عم ارجوك افتح معي صفحه جديده
ايو تالا: يعني تشتي تقنعني انك الان بتتتزوج تالا وهي بكليه واحده وكمان بدون رحم وبدون خلفه ؟!
نبيل: حتى لو بدون وجهه انا اشتيها وبشيلها على راسي بس انت ارضي
ابو تالا: خلاص تفتهن ويصير خير
وقف وخرج ونبيل يشوف بعده مقهور على تالا اللي كانت تبكي بحظن عبد الرحمن اللي بيحاول يواسيها
…….
قبل ما يروحو كان جالس مع غرام عندما خرجت علياء والغيره في قلبها : غرام لا تنسي ترسلي لي ذي قلت لك عليه على الواتس
كانت تتكلم وهي تشوف ل ايدن وغرام تشوف امامها: حاضر
عندما رفعت عيونها وشافت النظرات بينها وبينه كانت منصدمه ، علياء بتشوف ل ايدن ولا بيرف لها رمش ، النظرات غريبه ، طول الفتره اللي اشتغلت بها غرام مع علياء هذي اول مره تشوف لحد بذي الطريقه
عندما هو نزل عيونه وهي مشت بقهر
غرام: مالها بتسرح بك كذا ، ادم ذي نظرت اعجاب وحب اكيد انا مش هبلا
ادم: حب ايش ي غرام الله يهديك
غرام: اصلا مش عارفه ليش بتشوف لك كذا رغم انها مخطوبه وانا عارفه انهي متعلقه ب ابن عمها قوي
ايدن: ههههه يمكن رفضها
غرام: هههه لا وليش بيرفضها بس كانو بيقولو انهي بيجي يخطبها وماعاد جاش معرفش ليش
ادم: يمكن بطل وذلحين بتدور عريس
غرام ضحكت: ههههههه بس حتى لو تدور ي ادم ، اكيد ما بتشوفك انت هي مغروره ، لكن انا قدنا منصدمه تصرفاتها معك غير البقيه كلهم ليش معرفش ، اصلا انت الوحيد الذي ترد عليها وما تسب وتنفعل وتطردك
ادم غمز لها: اتخيلي تطلع بتحبني ايش عتفعلي
وقف وبتاخذ شنطتها ب ابتسامه: ماقدرش اتخيل والله انا ماعاد عرفت كيف
خرجت معه وهن يكلم نفسه" كيف اتخلص من علياء بتستفزني موت "
طلع السياره وطلعت جنبه وبتشوف من جهته وعلياء مازلت بسيارتها وتشوف ل ايدن ومقهوره وتكلم نفسها" المفروض انا جنبه مش غرام "
وهي بتكلم: شوفها ب السياره شوف كيف تشوف لك
شغل السياره وشاف لغرام: اكيد عجبتها وسامتي
غرام :هههه مش لذي الدرجه بس كل شي متوقع
….
ابو تالا دخل لعندها وهي تبكي لما نامت وعبد الرحمن جنبها اول مادخل خرج ورد ابوه بهدوء: يبه ليش اديتها هنا ، نبيل يشتغل هنا
ابو تالا: عبد الرحمن نبيل دكتور شاطر وبيشتغل ب احسن ثلاثه مشفيات هانا ووين ما ودينها بيقدر يوصل لها ، وبغض النظر عن انه نبيل بيحب تالا ويشتيها وطلبها مني كثير بس انا مابقدرش اغامر بصحته وحياة اختك عشان ما تحتك بنبيل ، واصلا مجرد ما بتقوم تالا ان شاء الله بزوجها له
عبد الرحمن: تزوجها له ؟ اصلا يمكن مايرضى بعد ما يعرف