Jamoamizga xush kelibsiz! IT ta’lim Uyushma tomonidan amalga oshirilayotgan “O‘zbekistonda IT va raqamli ta’lim landshaftini rivojlantirish” loyihasi doirasida jurnalist Fotima O‘ktamova bilan Mehnat shartnomasi imzolandi. Fotima O‘ktamova — Buyrak yetishmovchiligi xastaligi tufayli doimiy ravishda gemodializ qabul qiladi (Gemodializ - bu Sun’iy buyrak apparati yordamida o‘tkir va surunkali buyrak yetishmovchiligini davolash). Farg‘onada istiqomat qilayotgan Fotima O‘ktamova Loyiha doirasida masofadan ishlash imkoniyatini berib, ular bilan Mehnat shartnomasini imzoladik. Fotima O‘ktamova 2-guruh nogironi bo‘lishiga qaramay juda harakatchan ekanliklarini ilk kunning o‘zida ko‘rsatdilar, o‘z hududlarida nogironligi bor AyTi bilan shug‘ullanayotgan shaxslarni topib, ular bilan IT soxasining imkoniyatlari haqida materiallar tayyorlashga kirishib ketdilar. Xullas shunaqa qilib, Fotima O‘ktamova Shveysariya taraqqiyot va hamkorlik agentligi tomonidan IT ta’lim Uyushmasi NNTga ajratilgan O‘zbekistonda axborot texnologiyalari va raqamli ta’lim sohasini rivojlantirishga qaratilgan Grant loyihasining bir qismiga aylandi. Mazkur Loyiha kelajakda yoshlarning IT savodxonligini oshirish, malaka oshirish imkoniyatlarini yaratish, shuningdek, qishloqlarda yashovchi yoshlar va ayollarni ish bilan ta’minlashni nazarda tutadi. Loyihaning dastlabki bosqichida hududlarda IT savodxonligi va ko‘nikmalari bo‘shliqlarini tahlil qilish, bunda maqsadli auditoriya sifatida yoshlar, qishloq aholisi, ayollar va qizlar, kam ta’minlangan oilalar, nogironlar qamrab olinadi. Fotima O‘ktamova bilan hamkorlikdagi faoliyatimiz samarali va hamma uchun manfaatli bo‘ladi deb umid qilamiz. Agar atrofingizda Fotima opaning qahramonlariga aylanishi mumkin bo‘lgan IT bilan shug‘ullanayotgan mutaxassislar bo‘lsa biz bilan bo‘lishing. Biz IT’ning cheksiz imkoniyatlari barcha uchunligini ko‘rsatmoqchimiz.