بسمه تعالى كــل الــدنيه بعــيني صارت وحشه وصارت ظلمه وراحت اغله سنيني يــــوم الــــــودعـــتچ يايــمه يازهراء يازهراء يازهراء **** ربيـــت ابدار ضــــوّاهه وجودچ ياشمس داري تشع بالطيبه والرحــمه عــليّه بلــيلي ونـهاري وكل حالي يتغير إذا حالـچ تغير اتكدر وأحـــزن لون گلبـچ تكدر ودمعاتچ من تجري أگضي انهاري وليلي بدمعه يايمه ومن زغري روحـي بليـل احـزانچ شمعه يازهراء يازهراء يازهراء **** خمس اسنين من عمري گــضت وياچ واتذكـــر چانـــت بيهــن امنيــتي وجــودچ مـــاردت اكثر يـل شوفتچ تسوه العمر واغله الأماني يافـــرحت العــيد وإذا رحــتي اشأتاني يابـلسم لجــروحــي ظلـــي اوياي ولتعــوفيني موجوده بنص روحي كوثر من اعطش ترويني يازهراء يازهراء يازهراء **** رحيلچ يهــدم اركانــي وتصبح دنــيتي مــره ويظل عندي أمل واحـد ويطــوّل لاچن انتظره بالجنه نرجــع نجتمــع وتــــزول الهموم وما شوف بضلاعچ ضلع يايمه مهشوم بس لاچن مااگــدر ابقه بدونچ لاخـــرعـــمري لكن راح اتْصــبّر وادري الباري ايعظم أجري يازهراء يازهراء يازهراء **** تـــواسيني ردت لـــمن يلفي مصاب عگب مصاب مـــن ايطيح خيمــتـــنه خضيب ابــدمه بالمحــراب ومن ينهدم ركــني بأثر جور وغدر سم والأعـظم بطــف كــربله حيلـــي ايتهدم وعينچ مـاريد اتشـوف ذاك الــيوم الـــــيذبح گلبي حسين امگطع بسيوف صعبه اتمنه اوجودچ گربي يازهراء يازهراء يازهراء **** عله الدنيه العــفه چلـمه بعــد حســـين ارددهه روحـي الموت ساعتـهه ياخــــذ بـيهه ويردهه عالغبره متوذر وذر مـــذبوح الحـسين يحمل مصابه ياگلـــب وتشـــوفه ياعين وتلهب بخيامه النار وصدره الدامي الخيل اترضه ومذهوله ايتام ازغار وتجْرع لوعـــات بكل لحـظه يازهراء يازهراء يازهراء **** كل مصاب مـــن يلفــي مصــاب الگبله يتجدد يوم حسين اصيح الآن ركن اهل الكساء انهد بحسين مــات المصطفى وأمــي الزچيه والمرتضى وزودي الحسن باعظم رزيه تجـــدد خـمس جروح لوطاح حسين اعله الغـــبره ظامي امسلب مذبوح وبجسمه الطبره اعله الطبره يازهراء يازهراء يازهراء **** تمت بفضل الله وتوفيقه، الحمد لله رب العالمين، اللهُمَّ صل على محمّدٍ وآلِ محمّدٍ وعَجِّلْ فرجَهم حيدر كريم جار الله الكربلائي الفاتحة إلى أمواتي وبالخصوص والدتي رحمها الله https://t.center/haiderkarem