бир тош бор, бу гумбаз ичида ёлғиз, кўзида чайқалар мунаввар андуҳ. йилларни алдайди(занглар тошойна) жонида кезинар бир лайливаш руҳ… қайғусин Сангтарош йўнар мукаммал, хотир ипларига чанг солиб яшар. айби-йиғлолмайди, дийдаси қаттиқ, тошлиги ўзига жуда ярашар... бу гумбаз ичида (о,қандай аянч!) тегирмоннинг тишлари билан, яшалмаган ҳислари билан, гул ёдининг излари билан жонсарак кунлари кечар йўқликда. тоғларга уролмас мағрур бошини юмалаб-юмалаб кулар…оғриқдан! дунёсин ўрайди тобора мискин, қушлар севгисининг афсоналари. соғинчлар кўмилган қорачиғига сачраб кетар туннинг паймоналари. бир тош бор, бу гумбаз ичида ёлғиз қайғусин Сангтарош йўнар мукаммал...! Г. Уралова 2020. @Gulbashakkar