الناشر غيث اللآمي(للقصائد المنبريه)

#رجوع_الضعن_الى_المدينة

كأني بمولاتي زينب (عليها السلام)بعد رجوعها
من أخر محطة من محطات السبي من الشام الى أرض المدينه وهيه منهكه نحيله لما جرى من مصائب

°°°°°°
ردت زينب منالشام بس شلون ردتهه
تنعه حسين من أبعيد سمعت ناس ونتهه
متعصبه التعب والويل مو عباس عصبتهه
هنا ياناس زينب هاي تشيب الشيب قصتهه
بفيهم راحت وردت بلايه أفياي شيمتهه
حفنه تراب رد منهم شايلته بعبايتهه

راجعه وما چنهه زينب راجعه؟
شابـعـه غربه وبواچي شابعه
الله يدري شگالو عليهه الغرب
شسامعه وكبرانه هيچ شسامعه

تعبانه من ضيم الحبل
تعبانه من ضيم الهزل
مو زينب الچانت گبل
يرعاهه في خدر النفل

شبعت هضم شبعت شتم
وهيه أخت شيخ الزلم
الچانت يباريهه الگمر
من كلشي ردت تنلچم
00000000000000 00000
ردن حيل كـبــرانـات ماتـنـعد مصايـبهن
واحد واحد يگولون شنهو حسين عايفهن؟
أشو ذني بنات حسين وين حسين ماعدهن
وسمعت زينب أشيحچون وألتمن نوايبهن
محتاره أشتريد أتگول من ياضيم تعبهن
من ياوحده تبدي تريد لو رادت تسولفهن

أيامهه خلصتهه بس نواعي أيامهه
أزلامهه أمذبحين أعلررماح أزلامهه
طـبــت الديوان زينب بـت علي
الچان ماينشاف ضل لخيامهه

شتحچي شتسولف ياجرح
مـــــن يــامصيبه وياذبح
من يامتن جاسه الضرب
من ياطفل راسه برمح

مهضومه من ذاك الضرب
سمعت حچي يشيب الگلب
گـالـو فـشـل عـد الـعـرب
تتطلع مره أبرفجت غرب
00000000000000 00000
حگهن كبرن أمن الشام تحير الشام سالفته
مو مالت مره أطب بيه وزينب كله شايفته
حچي الماينسمع ذباح كله أم عون سامعته
بالله بياا وكت وحسين فرجه أتصير طايفته
اوحده ألمنهه راس حسين وهوه برمحه هاضمته
يعرف بيهن الحداي هاذي بنته هاي أخته

سوالفه كلش چبيره سوالفه
خايفه أمچلبه أبعبايت خايفه
أبنصهن مخلين راس أحسينهن
وطايفه أتروح وتجيهن طايفه

والتكسر أگلوب الصخر
والشيبت رمـش النضـر
شــدو حـبـل بس ياحبل؟
دايـر نـحـر أخت الگمر

چم چف گطع چا ماشبع
الداير نحرهه شو رجع
مـاعـايـزه زيـنـب حبل
يعني ألمن أهنانه نوضع
00000000000000 00000
وحده بوحده مچتوفات والـسجـاد وياهن
مـدري أشوره الحداي حيل وحيل جراهن
رگض للقصر ياهلناس موش أبهيده مشاهن
بالسب والضرب والسوط ذيج الساعه ممشاهن
أخـذهـن للـقـصـر حـفـاي وللديـوان وداهن
طبن والهضيمه أيزيد وحده وحده حاچاهن

وينه جيبو راس أحسين گلهم وينه
وينه أرد أسولف ورد أشوف بعينه
شصار ماصار وشنو أمبچيته حيل
سكينه وينهه البيهن أسمهه سكينه

والماجره عليهن جره
ويهل البخت كلفه تره
أبنص زلم توگف مره
والهضمه زينب هالمره

نشدوهه والمدمع نزف
ولمن حچت رف السعف
مـو زينب أيسولف علي
أخت الزلم وأم الشرف
00000000000000 00000
رسول رياض

#رجوع_الضعن

اويلاه اويلاه رد الضعن
اويلاه اويلاه رد الضعن
___
ردن مداليل ام حسن..يتلفتن يتلفتن..محرومات
ردن غريبات بضعن..جلمة هلا شو ما لگن..مهضومات

راجعه امن الضيم زينب راجعه
طالعه بنص شمس جانت طالعه
اربعين اصباح مر عليها
وجلمه الخوية ابد ما سامعه

اويلاه اويلاه رد الضعن
اويلاه اويلاه رد الضعن
__
نوخ الحادي بكربلا..جا وين شيخ العايله..والدهن
گلب المداليل انضهد..واحد يسد امجانه ابد..ما عدهن

مشت منك زينبك بس مايله
وهسه مالت كل علاوي العايلة
الجانت بنص الخيم كعدتها
للخرابه شلون صارت شايله

اويلاه اويلاه رد الضعن
اويلاه اويلاه رد الضعن
__
ندري المتن يسند متن..بس شامهن گلهن وأن..شيسّندن
ردن جرح ساند جرح..وبجفوفهن روس الذبح..من ردّن

الروس ردت بالنعاوي الحاره
امكابره اتصبر دموع امكابره
شيّعن راس الحسين لگبره
اجنازه بس راس ورمح ما صايره

اويلاه اويلاه رد الضعن
اويلاه اويلاه رد الضعن
__
الردنله مو مثل المشن..لازارن اولا وادعن..موتاهن
غطاهن اتراب اللحد..العمهن گبل مثل الورد..يرعاهن

هاي هدوة موت لمن يهدن
نامن ووجه الصبح ما كعدّن
بلا اموادع ماتن ابنياته
الضعن رد لحسين بس ما ردن

اويلاه اويلاه رد الضعن
اويلاه اويلاه رد الضعن

اللهم عجّل لوليك الفرج

مصطفى صادق اللامي

#اللهم_عجل_لوليك_الفرج

#رجوع الضعن إلى كربلاء

يا ضامي...ردينة...الهالديرة بانكسار
يا خوية...و بعبينة...ظلت لهسة نار
ابكل ذكرة...اتشب بينة...و نتذكر الفرار

البحماكم اهنانة اعتنت...للطف دنت
راحت غريبة ابلا وليهة
للكوفة للشام ادخلِت...وينك گلِت
أختك يخوية اميسريهة
ما تفزع حسين اشجرة...زينب ترة
العالهزّل و مچتوفة اديهة

ابكربلة همت.. يخوية و سلبوا الخدر
خوية حشمت.. ولوني و گلبي منكسر
اوصيتك الزمت.. و مشيت ابضعني للقصر

گتلي يخوية احمي الضعن
و گتلك يخوية ابأمرك
و ساعتهة رحت و أمنّت
من ماشة اخيتك نحرك
♕♕♕♕♕♕♕♕♕♕♕♕♕♕
جيت انحب...و انعاكم...مشتاگة خوية جيت
اتلگوني...و وياكم...آنه اندفن يريت
مهظومة...ابفرگاكم...و ابيا علي اعتنيت

تعبانة من ضيم الهزل...ما أحتمل
أكثر بعد من هالمصايب
مشاية خلصتة الدرب...بين الغرب
يالحجبتك عني الترايب
ما ظل ضعن راح الضعن...مالة وطن
ايطشرونة و اتلمنة الخرايب

خوية ضايعة.. لفيتك و الگلب يون
ابحزني راجعة.. يخوية الديرت الحزن
أدعي و الدعة...أريد ابكترك اندفن

جيتك غريبة و شاچية
شكّيني يا بعد اختك
انهد حيلي من شفت الگبر
چي مو أنة الدافنتك
♕♕♕♕♕♕♕♕♕♕♕♕♕♕
يا خوية...ابلا طاگة...اتعنيتك و مشيت
يا خوية...امن الناگة...فوگ الگبر هويت
مكسورة...و مشتاگة...معذورة و ارتميت

من ساعة اوداعك و انة...اليوم ابسنة
ايمرني او أموت ابكل مسية
طحت اعلة گبرك ما صحت...لمّن طحت
بس گتلك اتلگة السبية
لا تنشد اعلة اسمي المضة...كلشي انگضة
و زينب بعد مو هاشمية

ابصعدت الهزل.. سبية خوية انة صرت
ابشدت الحبل.. و حگ خدر الشيم حرت
ابدمعتي التهل.. أحشمك و انتة ما درت

راسك أشوفة اعلة الرمح
ما رد الي ايشتموني
صبراً يگلي اعلة الجرة
و عينك تحامي اضعوني
♕♕♕♕♕♕♕♕♕♕♕♕♕♕
ابنياتك...ردّلك...عگب السبي الطويل
يا خوية...و شنگلك...من التعب نميل
بس ردنة...نوصلك...نندب "أيا قتيل"

ما رحموا ابنات النبي...ابدرب السبي
ما چني بت حيدر يضامي
الوحدي او أباري العايلة...اشچم ثاكلة
و اشچم يتيمة اختك تحامي
بس خوية آنه ارجة العذر...بيد الزجر
ماتت رقية و گلبي دامي

آآه يضيعتي.. عگبكم خوية بالفلة
أجري دمعتي.. و اصيحن آآه يكربلة
والله رجعتي.. اكسرتني و ماكو أي هلة

ما عندي والي و غربتي
أخذت هلي و اخيامي
ظليت انة ابلاية كفل
وحدي و كفلت ايتامي
♕♕♕♕♕♕♕♕♕♕♕♕♕♕
حسين علي الزهيري