حسين ولدك كبروك .
__
نسدت روازين العيب
لمن بده براسك شيب .. وتعاله ضحك الشمات
ظهره نكسر مو عطشان
ياناس اخوي الكبران .. لمن علي الاكبر مات
هذا العمر هم حوبه اله
الميتله ابن چا ضل شله
- رد ايده بيده يگود بروحه
- يعرف بالاكبر طلعت روحه
- رد شيبه بيضه حته اعيونه
- رايح چبيره وزاد اجروحه
حسين ولدك كبروك .
__
وديت اخوي العباس
تچايه كدام الناس .. للخيمه جيبلنه حسين
يـا ناس يعثر ويطيح
وي حسين شد حته الريح .. والگوم تضحك صوبين
گـلبـه على گـلـب الـولـد
ينبـض ولا بـطـل ابـد
- هيه الهضيمه الماتت بينه
- گالو نذبحه اگبال احسينه
- هاي الچبيره والفاتن اكبر
- ساده وعطاشه بس مو بدينه
حسين ولدك كبروك .
__
راحتله اخيته وماگـام
وعد راسه دگو دمـام .. يهوسون برماح وخيل
چا غير اخيتك وانخاك
گوملنه لو مـوت وياك .. مگعادي يـمك لليل
لا تـنخه اخـوهـا كـل اخـت
راحـت الـنخـوه مـن رحـت
- ماعدنه مانع هسه اللمك
- بس عظمك مكسّر شيكومك
- لا ابيه اعوفك لا بيه اضلن
- تگعدلي لو موتني انه يمك
حسين ولدك كبروك .
__
لمو الوذر حدر الخيل
ماضل بخيتك كل حيل .. مابيه اللم حيل هواي
هاي الحصيره التاذيك
بختك يخويه ولا بيك .. كون الله لا ينطي الماي
كـون احـنه عگبـك ننذبـح
وبـصـدري حـط مية رمـح
- سلبو خواتك رجع التراچي
- والخيمه مو مي نگعت بواچي
- والناگه شبعت ماي الشريعه
- واختك گدرهه بس المحاچي
حسين ولدك كبروك
__
جبناك للخيمه اصياح
شـاهد عيـان الذبـاح .. دمك يبس فوگ الكاع
تلگاك ابوك بيا حيف
لاح البچر حلگ السيف .. مكسور من عدنه اشراع
كـسـرة ابــو يــــم الابــــن
كسـرة العـيـن مـن الجـفـن
- حرگت خيمنه تشبه گلبنه
- الماي النريده يارخصه عدنه
- عگبك يغالي راحت لهفته
- شفناه يذبه بس ما شربنه
___
#تمت #عباس_القلعاوي #نسألكم_الدعـاء