@ganjine5ا
🌫🌫🌫🌫🌫ا
🌫🌫🌫🌫ا
🌫🌫🌫ا
🌫🌫ا
🌫#ورود_به_کوفهگینه محرک غیبی ایدوب منی تحریک
ایدوم وقایع آلام کوفه نی تفکیک
اولاندا کوفیه وارد بنات شاه حجاز
غریبه وضعیله ایتمیشدی کوفیان پیشواز
چالاردیلار دف و طنبور چنگ بربط و نای
بیری بیرینه قاریشمشدی کره نای و درای
دورا دورا چکیلوردی قطار آل الله
نچون آچوخ یولی دوتموشدی فرقه گمراه
کیمی اتکلرینه داش یغوب ایدردی نشان
جدا باشندا کسوک باشلاری گورن هر آن
جداده راءس جوانان هاشمی یکسر
گچردی مد نظردن آیا گونه بنذر
تمام باشلاری ورمیشدیلار جدا باشنا
بو فکریله اولا آماج درد و غم داشنا
ولی او باشلار ایچینده بیری سیچلمشدی
که رخت مهر و وفا بیر اونا بیچلمشدی
گوروب روا دگی شه باشی نیزده اوجالا
آدینی نوکر ایدن شاهیله برابر اولا
کسوک باشیله گینه عزلته تمایل ایدوب
باشین کسن ، آتینون بوینونا حمایل ایدوب
دولاندیروب آتینی فخریله او کینه شعار
ایدردی طعن و شمادتله دمبدم اظهار
بو باش منیم آتیمون بوینونون که زیوریدور
حسین تشنه لبون بو امیر لشگریدور
آت اوینادان داش آتان کف چالان اناث و ذکور
او یاشلارین قاباقنجه دوشوب ایدردی عبور
بیری دینده بو شمس هدادی جلوه لنور
بیری دیردی گلون ، خارجی اسیری گلور
بیری دینده بولار اهلبیت طاهادور
بیری دیردی سالوبلا کمنده اولادور
بیری دینده بولاردور بنات پیغمبر
بیری دیردی اسیر فرنگدور یکسر
تمام غرفه لری ایلمشدیلر اشغال
زنان کوفه تماشایه آختاروردی مجال
باخوب یانان یوخیدی گوزده قانلی یاشلارینا
کیمیسی گل کیمی توپراق توکردی باشلارینا
یتنده بیر یره بیر غرفه ایچره بیر عورت
گوروب او حال اسفناکی ایلدی رقت
دئدی دیوله بولار زنگبار اسیریدیلر
بو سوز غلطدی ، یقین کینه دستگیردیلر
بولارکی آدلارینی خارجی قویوبلا تمام
بولار دگوله مگر اهلبیت شاه انام
دولاندیران بولاری ظلمیله گذرلرده
یزید ایدن ستمه ایستور چکه پرده
من ایندی مسئله نون اصلینی سوال ایدرم
سوزون حقیقتنی هر نه اولسا کشف ایدرم
بو آرزوئیله ناگه مرامی حاصل اولوب
اسیرلر شرفی زینبه مقابل اولوب
ادبله عرض ایلدی ای بلا کشیده خانم
اولان جفای فلکدن قدی خمیده خانم
دیون گوروم منه ، سیز هانسی گلشنون گلوسوز؟
گلی خزانه دونن مرغزار بلبلوسوز
هارالیسوز؟ کیمه وار نسبتوز؟ ندور نسبوز
بو ذلتیله اسیر اولماقا ندور سببوز؟
جواب ویرمدی زینب ، ایدوب دوباره سوال
ادبله عرض ایلدی ای سپهر حسنه هلال
بویور گوروم سیزی تاری هارا مسافریسوز؟
جنایتوز ندی ؟ آلام غم مجاوریسوز؟
بلالی زینبون آرتیردی آه و ناله سینی
سرشگ نابیله دولدوردی گوز پیاله سینی
خانم توجه ایدوب ، سویلدی که ای عورت
نه اعتباریله من سنیله ایلیوم صحبت؟
تانیمرام سنی من ، دوست یا که دشمن سن
شماتت اهلی دگولسن ، محل ایمن سن
دئدی خانم سیزون احوالوزه پریشانم
بو قدر وار نماز اهلیم ، مسلمانم
بو شهره گلممیشم من سیزی شماتت ایدم
شکسته قلبه باشارسام گرک حمایت ایدم
خانم بویوردی ای عورت نماز ایدنده ادا
تشهدوزده نه ذکر ایله سوز دیون آیا؟
ادبله سویلدی ای بانوی دیار حجاز
بودور تشهدیمیز هر زماندا قیلاندا نماز
دیروخ اشهد ان لا اله الا الله
دالنجه وحده پس لاشریک له آنگاه
دینده اشهد ان محمدا او زمان
ایاقه دوردولا یکسر یاننداکی نسوان
گوروب محمد آدین ذکر ایدنده اول عورت
او اسم خاطرینه ایتدیلر هامی حرمت
خطاب قیلدی محمد کیمون آدیدور مگر؟
بو نوع حرمت ایدیرسوز او اسمه سیز یکسر
دئدی خانم اونا روحیم منیم اولا قربان
اودور پیمبر اکرم ، رسول عالمیان
بیزه عقیده ی اسلامی ایلیوب تعلیم
روادی اسم شریفین دیاخ بلا تکریم؟
گرک دینده محمد آدین ایداخ اکرام
که حرمتین بیزه واجب ایدوب خدای انام
ایشتدی بو سوزی زینب چکوب جگردن آه
دولاندی یثربه عرض ایتدی یا رسول الله
آدیوا کوفه ده حرمت بو امت ایللر
و لیک قیزلاریوا حتک حرمت ایللر
سنون مبارک آدون محترم بولوله مدام
حیالی قیزلاریوا خارجی قویوبدولا نام
بو یرده روم و فرنگ احترامی چوخ چوخدور
حسین حرملرینون لیک حرمتی یوخدور
اگر علت غائی اولان بو گفتاره
جزای خیریدی محشرده هر عزاداره
دلیل عمده سی اولوبدی (مریخی)
یازوبدی خامیه(
وافی) بو شرح تاریخی
گوروم خدای حسین ایلسون اونی ماجور
عزا دوتانلارین ایتسون حسینیله مشهور.
التماس دعا
مرحوم میرزا محمد تقی ولادی متخلص به
#وافی رحمه الله علیه
🌫🌫🌫🌫🌫🌫🌫🌫🌫🌫🌫🌫🌫🌫🌫