#خروج_از_مکه#محمدحنفیه#مرحوم_وافیبیله روایت ایدوب راویانِ خیر آثار
محررّانِ روایات و جامعُ الاخبار
ایدوب اراده چو سلطانِ انبیا درگاه
منای کرب و بلایه خلیلِ آلُ الله
که یعنی آیهء ذبحِ عظیم مصداقی
بلا فداگَهینون اوّلنجی مشتاقی
حسینِ فاطمه ، سبطِ پیمبرِ مرسل
ایدوبدی سعییله اعمالِ حجّینی مُعجل
او گون که فرض بولردی اهالی اسلام
قویاردی یوز حرمِ کبریایه خاصّیله عام
همان او گونده دوتوب عزمِ مَصرعین تصمیم
خزینهء غم و آلامِ محنته تسلیم
او قدر ویرموب عدو عمرهء تمامه امان
که حجّ مُفرده ایلوب کفاف امامِ زمان
حرم امیری ، یانیندا محارم و حرمی
ایدوبدی ترکِ حرم جمله یار و محترمی
گوروب تدارکینی بیتِ حق اعلادن
یانینجا نچّه نفر اهلبیتِ والادن
گیچوب طوافِ حرمدن به اهتمامِ تمام
طوافِ کعبهء مقصوده باغلیوب احرام
بلا تک اوستونه اولدوقجا غم شتابان پیک
خلوصِ قلبیله سویلردی هر زمان لبّیک
فغان و ناله قضادن مقابل شَعَفی
اولوب بو قصّه دن آگه محمّدِ حنفی
بولوب بو قضیّه ندور اسبق سیاقیندان
گیچوب فغان و نواسی سپهر طاقیندان
گلوب حضورِ امامِ زمانه چوخ نگران
دییردی کاش ، اولا قارداشون سنه قربان
گوروب گیوبدی لباسِ سفر شهِ کونین
عراقه یوز چووروب کوچ ایدور امامِ حسین
دوروبلا آت دوشونه اخترانِ چرخِ حجاز
علی جوانلاری ایلور خرام چون شهباز
یتوب قدومِ امامه اوزون سالوبدی دخیل
دئدی اولوم سنه قربان گینه ندور تعجیل؟
اوزون بویوردون او قدری تحمّل ایلیه سن
یَمَنله کوفه آرا بیر تأمّل ایلیه سن
جهت نه اولدی که ایتدون دوباره عزمِ سفر
بو اضطراریوه علّت بویور نه اولدی مگر؟
آچوب لسانِ خداوند بیر فصیح لسان
بویوردی اولما برادر بو قدری سن نگران
بِلِیدی ، عهد ایلمیشدیم بو ایکی آراده
و لیک جدّیمی گوردوم دوباره رؤیاده
بیله بویوردی اوغول دورما باغلا بارِ سفر
منا بو یرده سنه یازموب خدای بشر
گیچوبدی عِلمِ خدادن بو گونکه گونده فراق
سنه مُقدَّر اولوبدی منا ، منای عراق
دیارِ کرب و بلایه ایدم گرکدی سفر
طوافِ کعبه می یازموش منه بو یرده قَدَر
او یرده ایستیوب آخر خدای کون و مکان
که آج سوسوز قوری یرلرده جان ویرم عطشان
جوانلاریم بویانا قانه ظلمیله یکسر
گوزوم باخا باخا لب تشنه اوخلانا اصغر
علیّ اکبریمون نعشی قان ایچینده قالا
آناسینین علی وای ناله سی گوگه اوجالا
چون ایستیوبدی خداوندِ فر و عزّ و علا
که اوچ گون اوچ گیجه نعشیم قوری یر اوسته قالا
سرشگِ چشمیله پیمانه تک گوزوم دولسون
رشید قارداشیمون قولّاری قلم اولسون
ووروب سپاهِ جفا اود خیامیم اودلانسین
اود ایچره آلعلی بیر بیره باخوب یانسین
تمام باغلانالار قول قولا صغیر و کبیر
ووراندا سیّدِ سجّاد بوینونا زنجیر
یارالی بیر دلیله عرض ایدوب محمّدِ زار
فدا اولوم سنه ای سبطِ احمدِ مختار
بولورسن ایمدی که بو نوعیلَندی غملریوی
جهت ندور آپارورسان خانم حرملریوی؟
ویروب جواب خانم قیزلازیم اگر قالسین
حسین حسین سسی نُه طاقه کیم سالسین؟
دئدی اوزون گیت ، عیالون و لیک قوی قالسون
دئدی محالیدی مندن سکینم آیریلسون
دئدی جهت ندی اطفال سر به سر گیتسون
دئدی گرک بولاری قومِ دون اسیر ایتسون
دئدی گیدورسن اگر گیت باشاردیقون قَدَری
سوادِ کوفیه گیتمه که یوخ وفا اثری
مقدّراتِ خداونده یوخ دئدی تغییر
باشیم جدایه چیخا ، کوفه دور تاپوب تقدیر
دئدی اگر چه مقدّردی لیک حالاتون
تفعُّل ایله کلامُ الّهه مقالاتون
آلوب او دم اله قرآنی ناطقِ قرآن
نه گوردی قتلینه بیر آیه دور صحیح اعلان
ز بس مشیّتِ خلّاق ایدوب علاقهء فوت
اودور بو آیه گلوب کُلُّ نفس ذائق موت
پوزولدی حالی توکوب اشگِ چشمِ خونباری
بویوردی گیتملیم قوی گیدوم منِ زاری
آلوب دوباره کلام الّهی محمّد اله
گینه تَفَعُّل ایده بلکه اوزگه آیه گَله
گوروب بیر آیهء جاءَالاَجل عبارتیله
آخوب عذارینه گوز یاشی خیلِ شدّتیله
بولوب مقدّر اولان هر قضا و هر قدَری
دئدی که بو سفرون دور یقین ئولوم سفری
اوجالدی ناله سی ایتدوقجا گوز یاشین جاری
قرارین الدن آلوب بسکه ناله و زاری
باخوب بیری بیرینه آغلیوب ایکی قارداش
که گوز یاشی یرینه آز قالوب آخا قانیاش
تصوّر ایله بولرسن نه حالته قالدی
که آغلیا آغلیا قارداشینی یولا سالدی
کمیتِ خامیه چوخ ویرمه (وافیا) تعجیل
محلّ چوخدی بو شرح اوسته ویرمگه تفضیل.
#وافیمرحوم حاج محمّدتقی ولادی ، متخلص به
وافیالتماس دعای فرج
https://telegram.me/ganjine5