#صافی#بالین_حضرت_علی_اکبر_ع توپراقلار اوسته اکبری فرزندِ بوتراب
تاپجاق یارالی نغشینی قیلدی بیله خطاب
ای چرخِ حُسنده یوزی مِهرِ تمام اوغول
قان پرده سی او گون یوزه ابرِ ظُلام اوغول
سنسن شبیه ، خَلقا" و خُلقا" پیمبره
وار کیمده بو جلالت و بو احتشام اوغول
جدّیم دوشردی یاده باخاندا علی سنه
ای مظهرِ جمالِ رسولِ کرام اوغول
یتجاخ سسون قولاقیمه آلدی قراریمی
بِالمرّه گیتدی قالمادی صبر و دوام اوغول
ظاهرده گر چه ئولمه میشم لیک دوشموشم
من حالِ احتضاره گوتوردوقجا گام اوغول
حاشا که من اوغول سنه ناکام سویلیَم
قیلدون گوزل طریقیله تحصیلِ کام اوغول
لب تشنه جان ویروب یتوشورسن مراموه
کیم ایلیوب بو نوعیله اخذِ مرام اوغول
باشدان آتام علی کیمی باشون قلجلانوب
ای اوز باباسی حیدره قائم مقام اوغول
بو حالون ایتدی قلبیمی ایله جریحه دار
تاپماز بو یاره حشره کیمی التیام اوغول
ناله یتردی عرشه حرمدن گلنده من
بیر پارچا داد و آهیدی یکسر خیام اوغول
ایمدی گلولّه اهلِ حرم گورماقا سنی
ایتمیشدی خیمه لرده قیامت قیام اوغول
سن گوردوقون تحمّل و صبریم تمام اولوب
اولسون نقدر منده ثبات و قوام اوغول
سالدی سنی کمنده خطا دیده اؤچیلار
یوخدی خُتنده سن کیمی آهوی رام اوغول
لیلادن آیری دوشماقوا اولما چوخ ملول
گوزلور یولون بهشتیده زهرا آنام اوغول
قورتولدون عاقبت علی سن هَمّ و غمّدن
قالدی آتان وحید و فرید ای آتام اوغول
دورت بیر طرفدن اوستومه غملر هجوم ایدوب
چوخ مایلم یخا منی بو ازدحام اوغول
وورمشدی شانه زلفوه لیلا گلنده سن
سالمیشدی نظمه ، نولدی او نظم و نظام اوغول؟
گُل پیکرون قلجلادیلار ، بند بند اولوب
بی رحمدور نه قدر مگر اهلِ شام اوغول
خوش نقشه لر سالوبدی بو گلبرگ سینه ده
نوکِ سِنان و خنجر و تیغ و سهام اوغول
ممکن دگل بو نعشی قوجاقیمده حمل ایدم
از بس یارا ویروبلا بو قومِ لئام اوغول
احسنت حُسنِ خدمتله ویردون امتحان
قیلدون بو باره ده نه گوزل اهتمام اوغول
چوخ تشنه سن علی بولورم دوتموری دلون
غنچه کیمی سولوب بو لبِ لعل فام اوغول
سیراب اولماقا سنه من وعده ویرمیشم
جدّون یاخوندی گلسین اوزی الده جام اوغول
لیکن ایدنده سنده ملاقات جدّوه
ایله منیم دلیمجه او شاهه سلام اوغول
پیغمبرِ خدایه علی اول پیام بَر
مندن آپار رسولِ خدایه پیام اوغول
عرض ایله اوز رعیّتمیز ئولدوروب بیزی
قویموب قویان امانتوه احترام اوغول
آچدی بو حالیده گوزینی ایلدی نگاه
اوز تشنه کام آتاسنه ، اول تشنه کام اوغول
سیراب اولماقین یتوروب یومدی گوزلرین
جان اوسته دور باخاندا نه گوردی امام ، اوغول
بیر صیحه چکدی آغلادی سسلدی وای علی
ای سروِ ماه طلعت و زیبا خرام اوغول
سن اوّلین قتیل سن آلِ خلیلدن
قویدون عجب مِنای محبّتده نام اوغول
ای کوکبِ وفا ندن عمرون آز اولدی بس؟
صبح اولدوزی بیله اولی چون بِالتّمام اوغول
نطقه گلنده سر سخن ایلردیم اسموی
ای اوز کلیمِ عصرینه ازّل کلام اوغول
ساکت اولاندا دلده قالوردون سوزوم کیمی
فکریم علی اولوردی خیالیم مدام اوغول
گلّم دالونجا منده علی بول دایانمارام
انصافدور که سن ئوله سن من قالام اوغول؟
دل تنگم اوز حیاتیمه بیر حبس دور مدام
دارالسّلام اهلینه دارالّئلام اوغول
ووردوقجا ال بو قانه باتان زلفوه دولار
مشک و عبیر رایحه سیله مشام اوغول
باخدوقجا گُل جمالوه خیره لنور گوزوم
گوندوز گوزی اولوب منه بیر تیره شام اوغول
قان قطره سی خوش دوزولوب وار یری اگر
پوزسا نظامِ عالمی بو انتظام اوغول
ایمدی قاتالّا قانیمی بو قانه کوفیان
ایلوب حلال قتیلمی ، نسلِ حرام اوغول
سنلن یاتار اوغول علی بیر قبرده آتان
تعیین اولوب آتا اوغولا بیر منام اوغول
باشونله شامه دین گیده جاخ نیزده باشیم
بازارلرده دِیرده سنلن وارام اوغول
تا دگمیوب دوداقلاریما چوبِ خیزران
تاپماز بو محنت و مصیبت ختام اوغول
(صافی) ووروبدی چنگ بو دامانِ رحمته
سرمایهء نجاتیدی بو اعتصام اوغول.
التماس دعای فرج
https://telegram.me/ganjine5