شاهکاری از مرحوم استاد
#حقیرخوئی#بالین_حضرت_علی_اکبر_ع (سؤال و جواب)
بیر قانلی گوزلریندن اوپوب گوزده اشگناب
جاری اولوب یوزینه ، ایدوب گوئیا خطاب
ای مرحبا بو شوقیله جان ایتماقا نثار
به به عجب ظهوره گتوردون محبّتون
مین جان بهای بیر سرِ مویون دگل سنون
وار مین بو قدر بلکه فزون قدر و قیمتون
اوز قدرِ قُربِ منزلتون بولموسن ندور
درگاهِ حقده رتبهء شأن و جلالتون
سن حق ذبیحی ، کوی محبّت قتیلی سن
الحق سنون ذبیحِ خلیله نه نسبتون
قسمت ذبیحه اولمادی اولسون قتیلِ حق
امّا سنون شهادتِ قتل اولدی قسمتون
اکبر هارا ذبیح هارا؟ وار بو منصبِ
قربانلیقا قرارِ ازلدن لیاقتون
شوقه گلوبدی شِبهِ رسولِ خدا او دم
عرض ایتدی بو دِلیله که ای شاهِ محتشم
گوردوم ئولن زماندا جمالون هزار شکر
یتدیم مُراده قالمادی قلبیمده حسرتیم
بیر آز قالوب که روح بدندن وداع ایده
شهپر آچوبدی طایرِ اقبالِ همّتیم
حَبل المَتینِ رشتهء ایمان الیمده دور
حقّ الیقینِ دینِ مُبیندور شریعتیم
تاپدیم سبیلِ عشقی ، دلیل اولدی مُرشدیم
ارشاد ایدوب نهایته یتدی ارادتیم
اولدوم مُریدِ عشق ، بو دنیادن ال چکوب
فقر و فنا مقامینه یتدی قناعتیم
درک ایلدیم چو ذوقِ بقانی فناده من
تکمیل اولوب جهادیله نفسه ریاضَتیم
سنسن سلوکِ سِیرده هم پیشوا منه
هم ، مسلکِ حقیقته پیرِ طریقتیم
اولدوم شهیدِ عشق شهادتده شاهد اول
مشهود شاهد اولدی شهود و شهادتیم
توحیدیله نبوّته اِقرار ایلرم
محکمدی حقّ معرفتیله ولایتیم
تأثیر ایدوب امامه ، جوابینده شاهِ دین
گویا بویوردی سوزیله یا نورِ هر دو عین
ثابت قدم شهادته شاهددی ذوالجلال
اقدام ایدوب شهوده یتیشدی شهادتون
مرضاتِ حقده جهد و جهاد ایلدون بلیغ
ایمان - حقیقتوندی ، شریعت - طریقتون
قیلدون حمایتِ حرمِ مصطفاده سعی
حدّ جهادِ اکبره یتدی حمایتون
یا حَبّذا بو عشقه هزار آفرین اولا
گَتدون ظهوره عشقِ خلوص و موّدّتون
هر قطره قان دوشوب یازیلوب یرده یا حسین
جوشه گلوب بو قان کیمی دلده محبّتون
لعنت بو روزگاره
علی بَعدَکَ العَفا
ترک ایلمز بو چرخِ ستم پیشه عادتون
قویدون منی بو چولده غریب و وحید اوزون
گیتدون یتیشدی آخره دنیا مشقّتون
منده دالونجا گلملیَم اگر چه ایسترم
بیر بیر گَله بیانه اگر وار وصیّتون
آچدی گوزون جمالینه بیر ایلدی نگاه
حسرتله اودلی قلبینه ووردی شرارِ آه
عرض ایلدی بابا گیدورم ، قوی ایاقوا
سورتوم یوزومی ، حاصل اولا استراحتیم
چوخ شایقم قدملرون آلتیندا جان ویرم
مَقرون اولا اجابته گر استجابتیم
آگاهسن اگر چه خُطورِ صُدوردن
واردور خجالتیله سنه اوچ وصیّتیم
فرمایش ایله سیّدِ سجّاده عرضیمی
هر چند بو مراتبه یوخدور لیاقتیم
تاپشور ایاقون آتدا منی دفن ایلسون
اولسون او خاکپای جلالتده تُربتیم
چون شیعه لر زیارتوه هر بِلاددن
یوز دوندروب گلولّه ، بودور اصلِ نیّتیم
زوّارون اوّل آبله اولموش قدم لرین
قویسونلا سینم اوستونه ، وار جانه منّتیم
بیرده آنام بو چولده بولورسن غریبدور
اون سگّز ایل قبول ایلیوب وار نه زحمتیم
منع ایتمه آغلاماقدان اونی ، دلشکسته دور
وار حقّی چوخ چتیندی اونا دردِ فرقتیم
مندن باجیم سکینیه بیرده یتور سلام
چون اولمادی حضوریوه گلماقه فرصتیم
عفو ایلسون نه قدر اولا ممکن آغلاسون
ئولدوم جوانلوقومدا بیله گیتدی قسمتیم
باخما یوزیمه ، گلدی اجل ، راضی اولمارام
قلبِ شریفوه یته گَردِ مصیبتیم
سن باشیم اوسته بیله ئولومدن نه واهِمَم
بلکه زیاده وار ئولومه میل و رغبتیم
الفت کسلیدی حیف سنیله منیم داخی
جدّیم رسول محضرینه قالدی صحبتیم
واردور امید محشر آرا ، هولِ حشرده
درک ایلسون (حقیریمی) فیضِ شفاعتیم.
التماس دعای فرج