ФЕРУЗШОҲ

Компьютеримни 2019 йил сотиб олганман. Қимматроққа, бўлиб бериш шарти билан. Яқин 2-3 ойдан буён қийналиб ишлаяпти. Азоб бермайди, шунчаки қариганда ёнбошлаш учун ҳам овоз чиқарадиган “ҳожи ака”ларни ёдга солади.
Негадир техника қаримайди деб ўйларканман. Мана, нақд 6 йиллик хизмати давомида унинг ёрдами билан китоблар тайёрладим, таржима қилдим ва шу таржималар гонарари билан қора қозонимни қайнатдим. Ҳаттоки, ўгирмаларимнинг соф фойдасидан уй солдим.
Тишланган Appleни ҳам олган заҳотим ёпиштирганман. iPhone 6 ни эслатувчи ёпишқоқ қоғоз ҳам 6 йиллик тажрибага эга.
Бу, балки, табиатимнинг ташхисидир. Ўзгаришларни унчалик ҳам қабул қила олмайман ва ҳаттоки буюмларга-да содиқлик ҳиссини тарк этолмайман. Баъзан, шуни песмирига сотиб, янги олсамми, деб ҳам ўйлаб қоламан ва шу хаёлнинг ўзи-да кайфиятимни чўктиради.

Хуллас, яқин орада янги бир мистик роман тақдим қилиш ниятидаман. (Унгача компьютерим ишдан чиқмаса, албатта.)

ФЕРУЗШОҲ

Гитарка ўзига чорлайверади. Мукаммалликдан асар йўқ. Шеър ва мусиқани ҳам гитаранинг ўзи танлайди. Бу эса… бошқача роҳат!

ФЕРУЗШОҲ

***
Холалар бор холалар каби,
Тоғалар бор тоғалар каби,
Одамлар бор одамга ўхшаш,
Бузуқлар бор фоҳишадек гап.

Аммо ҳаёт бироз бошқача:

Холалар бор тоғалар каби,
Тоғалар бор холалар каби,
Фоҳишалар одамга ўхшаш,
Одамлар бор фиҳишадек гап.

В. МАЯКОВСКИЙ

Тарж: ФЕРУЗШОҲ

ДАШТ КЕЧАСИ

Илонлар никоҳдан ўтар бу кеча,
кўзлари ёнади, изларида шашт.
Бонулар юракдан қабосин ечар,
дилгир нидоларга тўлиб кетмиш дашт.

Кўзлар шуъласидан ёрилар ғунча,
соғинчлар сарҳадин босади шабнам.
Тантана бошлайди буюк тушунча,
насим яланғочлар тақдирларни ҳам.

Кўнгилга ўрмалар писмиқ, содда сас,
йўлга тушгинг келар, теварак ширин.
Бутоқлар севиниб олади нафас,
дунёга сочганча дунёнинг сирин.

Барча севишарди, Коинот нами
Тўкилар шувоқлар бағрига чак-чак.
Ишонч-ла симирар муҳаббат жомин
кўзлари порлаган Илонкелинчак.

Тошлар яшаргандай куйларди саҳро,
тўқай юлдузларга чулғанмиш чунон.
Кезардим, манзиллар қадимий баҳра,
югурар хотирим томирига қон.

Бағримга босаман, отар экан тонг,
илонлар изини қопламиш севги.
Бу кеча тўрвамда қотиб қолмиш нон,
тиниқ юзларингга тошмишди сепкил.
1981, 1995, 2016

Барнобек ЭШПЎЛАТОВ

20 ЯНВАРЬ

Дарёси тўлмади қароғларингнинг,
Соҳили қуриди, балиғи ўлди.
Эй Мен, Менни билмай туриб қаридинг –
Йўллар қуравердинг беманзил йўлда.

Дунёнинг дунёси тилингдан кўчди,
Санъат қуллигида санъатинг тобеъ.
Қўлингда тургани азалий душман –
"Кабиса" – хўрланиб ётган китобинг.

Бошингни атадинг ёд дўппиларга,
Эгнингга қўндирдинг ёт матоларни.
Сени қучиб ўтди бегона ҳар дард,
Сени туғаверди ҳар кеча армон.

Овозинг жарангги етди дилларга,
Тиллардан тилларга кезди ғийбатинг.
Қуйи юқорилик яратса Сар гар,
Истеъдод аталур товуқнинг пати.

Ойнинг жамолига тупурдинг холис,
Сутини совутиб ичдинг қуёшнинг.
Олисинг яқиндир, яқининг олис,
Қисматинг ёшликдир – кексайган ёшлик.

Фикрни тўлдирдинг, мияни чақдинг,
Дарахтга айлан, бас, саждага қўниб.
Нишонланмасликка ҳамиша ҳақли
Бахтсиз шоирларнинг туғилган куни...
2023

ФЕРУЗШОҲ

8 ДЕКАБРЬ

Онгнинг синиқ шиша васлида акси –
Соқолим суқула бошлайди тонгга.
Печ ичида жирканч олов – кераксиз,
Синган суякларим печ ичра ёнган.

Столнинг устида китоб – ўқилган,
Столнинг устида шеър – ёзилмаган.
Зулматнинг нурлари кираркан, тунда
Тўқнаш келадилар Мен – қазилмага.

Тамаки исида роҳатни суйиб,
Суратин чизганда нафсимга ҳавас.
Руҳимни жисмимга ўтқазиб қўяр
Кислород – ҳақиқий совутилган газ.

Саробга дўнади қоралик рангги,
Тиззамдаги оғриқ яратилган – У!
Шаҳарни бир ўзи кезади гангиб
Менинг кўзларимга бегона уйқу...
2022

ФЕРУЗШОҲ

***
Булбул ўгай эрур зоғлар орасида,
Югурик сув ўгай тоғлар орасида.
Муҳаббат дардидан бемор қалблармиз,
Ўгай бўлсак не тонг соғлар орасида.

Абдулла ОРИПОВ

***
Наҳотки бу тақдир?!
Ёхуд дунёда
Тарнов чаккисига онча шай дилим.
Одамнинг гўштини еганда одам
Қизғалдоқлар кўкармайдими…

Барглар жон бера бошлаган палла
Кўзим қирғоғида шуълаланар нам.
Наҳотки айтилар уйимда алла
Қизғалдоқлар кўкармаса ҳам…

Йиғлай десам, осмон бесаҳоб,
Кетай десам…
Афсус, журъатим етмас…
Кетсам-да, мен қайтиб келгунимча то
Қизғалдоқлар кўкариб кетмас…

Ўзимдан кетмайман…
Мангу қоламан
Чўзилганча олис Маккага қия.
Сочади устимдан тупроқ оломон
Қизғалдоқлар кўкарсин дея…
2024

ФЕРУЗШОҲ

* * *
Мени мен истаган ўз суҳбатиға аржуманд этмас, Мени истар кишининг суҳбатин кўнглим писанд этмас.

Не баҳра топқомен андинки, мендин истагай баҳра, Чу улким баҳраи андин тилармен баҳраманд этмас.

Нетай ҳуру пари базминки, қатлим ё ҳаётимға Аён ул заҳр чашм айлаб нихон, бу нўшханд этмас.

Керакмас ой ила кун шакликим, ҳусну малоҳатдин, Ичим ул чок- чок этмас, таним ул банд- банд этмас.

Керак ўз чобуки мажнунваши қотил шиоримким, Бузуғ кўнглимдин ўзга ерга жавлони саманд этмас.

Кўнгул уз чарх золидин, фирибин емаким, охир Ажал сарриштасидин ўзга бўйнунға каманд этмас.

Ул ой ўтлуғ юзун очса, Навоий тегмасун деб кўз, Муҳаббат тухмидин ўзга ул ўт узра сипанд этмас.

НАВОИЙ