معمول العيد، ناجح ومن اول تجربه
🥰فولو اذا اول مره بتشوفوا حسابي
🥰المقادير:
كيلو سميد فرخه ( اذا ماله متوفر، ممكن تطحنوا بالبيت السميد العادي حتى يصير ناعم متل طحين الفرخه)
كوب طحين ( كوب المقاس 250ml)
- 500g سمنه، او زبده، او ممكن نخلط نص سمنه ونص زبده متل ما انا ساويت والسمنه او الزبده لازم تكون طريه بدرجة حرارة الغرفه
مقدار المواد الدهنيه اللي استخدمته بأكواب المقاس :
كوب وربع سمنه ( 250g)+ كوب وربع زبده (250g)
ملعقة طعام محلب
ملعقة طعام حليب باودر ( اختياري) ممكن بلا اذا ماله متوفر
ربع ملعقة صغيره خميره فوريه ( ممكن بدون الخميره) بس الخميره بطول عمر المعمول و بتحفظة مدة أطول
لتحضير المواد السائله ( التبليعه) او التشريبه استخدمت كاسة الشرب 200ml هاد المقاس موجود بكل بيت وعيرت فيها :
تلت ارباع كاسه سكر عادي حبيبات
تلت ارباع ماسه ماء بدرجة حرارة الغرفه
ربع كوب ماء ورد او ممكن ماء زهر ( حسب ذوقكم)
طريقة التحضير:
اول خطوة بخلط السميد الفرخه مع الطحين وبضيف السمنه والزبده وببدأ بعملية فرك السميد مع المواد الدهنيه حتى اتأكد انه كل حبات السميد اتغطت بالسمنه والزبده
بغطي السميد وبتركه بالبراد يرتاح( ممكن تتركوه يرتاح أقل شي 4 ساعات، وممكن تتركوه يومين بالبراد ما بصرله شي) انا تركته ليله كامله
تاني يوم بكون السميد عندي قطعه وحده، برجع بفرده بين اصابع ايدي
بضيف المحلب والخميره والحليب الباودر وبخلطهم مع السميد
بحضر التشريبه او التبليعه، بخلط السكر مع الماء وماء الورد وبحرك منيح حتى دوب السكر قدر الإمكان
بضيف المواد السائله للسميد، وببلش لم العجينه لم بدون عجن، وبحرك من تحت لفوق، حتى تتكون عندي عجينه طريه ما بتتشقق ابداً
بترك العجينه ترتاح بالبراد ساعتين، وبهاد الوقت بحضر الحشوات
بعد ساعتين بحشي القطع ونصيحه ما تسمكوا العجينه، خلوها رقيقه حوالي الحشوه لان مارح نشويها مده طويله بالفرن
ملاحظة: اذا بدكم تنقشوا المعمول بالملقط مباشرة احشوها وانقشوها، اما اذا بدكم تستخدموا القوالي، احشوا كل القطع ودخلوهم البراد يبردوا ربع ساعه
انا بعد ما حشيت كل القطع دخلتهم البراد وبهالطريقة رح يطلعوا معكم من القوالب بكل سهوله بدون ما تحتاجوا طحين او سميد
وبهاد الوقت حميت الفرن على أعلى درجة حراره 250
بعد تشكيل القطع بدخل الصينيه عالرف الوسط، واول ما شوف اسفل قطع المعمول نشف وبلش ياخد لون، برفع الصينيه عالرف الأقرب للشوايه بس ياخدوا لون اشقر وبطلعهم
بدهن القطع بالسمنه (بتعطي طعم وهشاشه للمعمول)
وبصير المعمول عنا جاهز
🥰بالعافية عليكم
#اعادة_توجية_للفائدة https://t.center/joinchat/AAAAAEt0RFAshEQLx8o3yg
