الشاعر سيد محمد السعبري

#_لسان_حال_محمد_ابن_الحنفية
#_للامام_السجاد____عليه_السلام
ــــــــــــــــــــــــــــــ


هـذا الضعـن شو بي نقص
مفقود منه اشچـم شخص
ويـن البـقـيه الما اجـــو وين
وين اخـوتي عباس وحسين
هذا الضعـن شـو بي نقص

•••••••• •••••• ••••••••

يبـن اخـوي اشـــصـار گـلي وي اهلكم
رحـتـو كـلــــكم ما رجـعـتو لينه كلكم
يا علي السـجـــاد شــو ناقص ضعنكم
چـــم عـزيـــز الما رجـع يا عمي مـنكم

ابــــگد ما ضعنكم مختلف
يا عـمـي بـي ضاع الـعِـرف
من شافـته شو دمعت العين
وين اخـوتي عباس وحسين
هذا الضعـن شو بي نقص

ـــــــــــــــــــــــــــــــــــــــــــــــــــــــــــــــ

اچـبيرنه مــــا شفته ليش ابهالضعينه
يا عـــلـي گـلي ابــــــوك حـسـين وينه
لـيـش اخـــوي اويــاك مـا رد للـمـدينه
وليـش وحــدك جـاي واعيالك حـزينه

يا زيــن الـعـبـاد اشـجـره
وحـســين شـنهـو الاخّـره
گلي اشعـمـل بچبيرنه البين
وين اخوتي عباس وحسين
هذا الضعن شو بي نقص

ـــــــــــــــــــــــــــــــــــــــــــــــــــــــــــــــ

ابلايه اخوتي اصبر اني يا علي اشلون
لا رجـــع عــبـدالله لا جـعـفـر ولا عـون
ولا رجـع عباس اخويه حـامي الضعون
لا تـــــگـلي بـعــــــد ليه مـــا يرجعـون

كلـشي خـذو لـمـن مشوا
او يا كـسرتي لو ما اجوا
واللي مثلهم يحـصل امنين
وين اخوتي عباس وحسين
هذا الضعن شو بي نقص

ـــــــــــــــــــــــــــــــــــــــــــــــــــــــــــــــ

حـــــالــــكم يبن الاخـــو يصـعـب عليه
اهـواي عــــــدكم نقص بعــــيال الزچيه
ونقــــــص حــتى بالاطـفال اهـــنا ابنيه
بالضــــعـن شو مــــا شفت اخـتـك رقيه

اخـــتـك رقــيه ما اجـت
هــم وي ابــوها اتأخـرت؟
گلبي ايــگلي صـفــو ميتين
وين اخوتي عباس وحسين
هذا الضعن شو بي نقص

ـــــــــــــــــــــــــــــــــــــــــــــــــــــــــــــــ

اشمـــــر عليكم يبو الـباقـر من مشيتوا
اهـــواي متـغــيـرين اشـــو لمن اجيتوا
ابـــــهالسـفـر گـلي يعـمي اشضـيعـيتوا
واضـح اعــــــليكم تره اهـوايه بچـيتوا

وانتَ اشـعـشـت يا مَضلَمه
وچـا ليـش اديــك امـورمه
حـالك يهـيّـج بـيـه الــونين
وين اخوتي عباس وحسين
هذا الـضعـن شو بي نقص

ـــــــــــــــــــــــــــــــــــــــــــــــــــــــــــــــ

يا مصيبة الهجي سوت زينـــب اختي
من شـفـتـها يا عـلــــي سـالت دمعتي
انـتِ زينـــب گلت لو مـو زينـــب انتِ
وناحـــــــت وناديـتها چـا ليش نحتي

گـالـتـلـي يــمـحـمـد تـره
ابضـيـمـي صـرت متغـيره
كبرني فـگد اخواني الاثنين
وين اخوتي عباس وحسين
هذا الضعن شو بي نقص

ــــــــــــــــ

لخادم الحسين ع الشاعر /
سيد محمد السعبري .

https://t.center/ashggjd
ـــــــــــــــــــــــــــــــــــــــــــــــــــــــــــــــ