استشهاد القاسم ع
ــــــــــــــــــــــــــــــــ.
يا يـمـه يالـبـعــدك شـاب يجسّام يجسّام
مالت عرس موش إتراب يجسّام يجسّام
يالـفـارگتني بالهم عـفـتني يجسّام
« ••••••••••••••••••••••••••• »
يالبعدك ابعمر الــورد كل عمرك اسنين اهدعش
مالــت يزفـــونك هلك يوليــدي مو مالت نعش
ذبحــــوك يمه بيا ذنـب وامفطر اشفاك العطش
جسمك صريع ابكربله ودمك على الگاع انفرش
يبني امغمض اعيونك وادمومك على اجفونك
يالعايـفـنـي من دونك غـــــــريـبـه
فـگـــدك عَلَي يجسّام مصيبه مصيبه
وجرحك ابد ما يلتام مصيبه مصيبه
ريتك شفتني بالهم عفتني يجسّام
ـــــــــــــــــــــــــــــــــــــــــــــــــــــــــــــــ
يا يمـه چـنـت احلم حلـم بيديك اخلي حـنّتك
يوليـدي وابدال الحـسن تحـضـر عمامك زفتك
وانضـر عـروستنه تجـي وتـزفها زيـنــب عمتك
تاليها انه حلـمي انذبـح وانفگد حـيلي ابموتتك
مـيّـت وانه متعذبه صعبه فرگتك صعبه
الدنيا اغيبتك غربه عــلــيـه
عفت أُمك اتنـــوح اعليك بلمها بلمها
وضـلــت تـون ابطـــاريك بلمها بلمها
يالضيعتني بالهم عفتني يجـسّام
ـــــــــــــــــــــــــــــــــــــــــــــــــــــــــــــــ
محـتاره يبني ابفرگـتك وامنين اجيبنه الصبر
ياريــت ويّـاك انـدفــن ياريـته لا طـــال العـمر
چـنت اني احـسبلك تره تخــدمني بـيام الـكُبُر
ما حـسبت عــــدله اضل وانتَ التـهاجـر للـگبر
صــار الآني مـــا رته انه عدله ومتت انتَ
يريت آنه الذي ميته يـيـــمـه
عايفني يا جاسم ليش يمدلول يمدلول
ردنه سـوه يمه انعيش يمدلول يمدلول
من ودعتني بالهم عفتني يجسّام
ـــــــــــــــــــــــــــــــــــــــــــــــــــــــــــــــ
كلشي تغـيّـــر يالولـــد اليـوم وين ووين امس
عريس چنت انتَ امس واليوم مذبوح العرس
يا ييمه اعرفنك تــرف چـا ليش نايم بالشمس
وذبـلان من الضهـر وترفـسـك اخـيول الرجس
واويلا يبـعــــد أُمك الخيل اتگلّب ابجسمك
وانتَ امغسّل ابدمك يـــروحــي
يالطايـــــح اعله التـربان بالطفوف بالطفوف
ابچي امن اشوف الشبان بالطفوف بالطفوف
اشگد لوّعتني بالهم عفتني يجسّام
ـــــــــــــــــــــــــــــــــــــــــــــــــــــــــــــــ
افراگك صدگ ياذي الگلب يالعايف أُمك بالمحن
وكبّرني يا يمه اشـكـثـر واعيــوني راحـن ينعمن
بس هذا واجب جاهـدت واستشهدت وبهالوطن
ما قـصــرت يبـن الحـسـن والنعم تربات الحـسن
صح اعليك اضل انحب لكن فــدوه للمذهب
وفــدوه للبقـى امسـلّـب عـالـتـراب
من شفت ابو اليمه اوحيد يـيــمـه يـيــمـه
عـمـــرك رخـــص يالـولـيـد يـيــمـه يـيـمـه
نارك چوتني بالهم عفتني يجسّام
ـــــــــــــــــــــــــــــــــــــــــــــــــــــــــــــــ
راح امشي عنك وابتعد راح امشي بدروب اليسر
وراح ابقى افـكر بيك انه واشـتاگلك يـمـه اشكثر
باچـــــر اروح اعله الهــزل محـــتاره يبني بهالامر
مـــدري اشيـصـير ابـحـالتي واعليك حـادينه يمر
ابـگـد ما آني مشتاگه خاف اوگع من الناگه
يـلـي يـوجــع افـراگه يـغــالـــي
وباچــر ييـمـه الـعــدوان اويــلاه اويــلاه
يضربونه واحـنـه نسوان اويــلاه اويــلاه
يجرحونه متني بالهم عفتني يجسّام
ـــــــــــــــــــــــــــــــــــ
لخادم الحسين ع الشاعر /
سيد محمد السعبري .
https://t.center/ashggjdـــــــــــــــــــــــــــــــــــــــــــــــــــــــــــــــ