الشاعر سيد محمد السعبري

#شهادة السيدة رقية ع
ـــــــــــــــــــــ


من كثر ما مر ضـيم بيها واذيه
تاليها فـوگ الـراس ماتت رقيه
ابنص الخرابه
وذيچ التـرابه
تاليها فوگ الراس ماتت رقيه

،،،،،،،، ،،،،،،، ،،،،،،،،،،، ،،،،،،،،،،، ،،،،،،،،،

هاي العزيــــزه الچـانت امدللها ابوها
من عنـده بالـطـف الاعــــادي يتموها
ذبــــحـو ابــوها وبـذبحــــته عذبوها
وليها اجــو حتى التــــراچـي سلبوها

هذي مصيبتها وعلي كلش أليمه
جرو تراچيها ابحقد هاي اليتيمه
ابحقد العصابه
وذيـچ الـتـرابه
تاليها فــــوگ الراس ماتت رقيه

ـــــــــــــــــــــــــــــــــــــــــــــــــــــــــــــــ

من عگب ابوها ابكــربله عاشت ضُلامه
انضلمت رقيه مـــو مثل باقــــي اليتامه
ابسلب الــتراچــــي بالاذن ضـلت علامه
او مــن وجـعـها الليل گــــامـت ما تنامه

مجروحه ضلت حيل توجعها اذنها
والـــدم بقى يا ناس يتجــاره منها
ابهمها وعذابه
وذيچ الترابه
تاليها فوگ الراس ماتت رقيه

ـــــــــــــــــــــــــــــــــــــــــــــــــــــــــــــــ

چانت رقيه امخــليه عصابه على العين
وشـــالتها لن اگــبالها بـس راس الحسين
علـــتها زادت وابگــــــلبها زاد الونــــــين
وصاحت يبويه هذا راسك والجسم وين

طفله وتشاهد راس ابوها فوگ الرماح
چا بعــد هاي اشـلــــــون بالدنيا ترتاح
اتنوح لمصابه
وذيچ الـترابه
تاليها فــــوگ الراس مـــــــاتت رقيه

ـــــــــــــــــــــــــــــــــــــــــــــــــــــــــــــــ

للــــــشام وي ذاك الضعـن راحت سبيه
ومن كـثر ما بيــــــها گصت هاي الرزيه
بالخـــــــــرابه تالـــــــي وابديره اجنبيه
فــوگ راس حــــــــــسين وافتها المنيه

بس الالم والنـوح بالـــدنيا شافت
وبالتالي هم ابنـوح وابغربه ماتت
ابضيم وكآبه
وذيچ الترابه
تاليها فــــــوگ الراس ماتت رقيه

ـــــــــــــــــــــــــــــــــــــــــــــــــــــــــــــــ

بالغربة ماتــــت بنت الحــــسين بحزنها
ماتت وســــــوط الشمر جـــــارح متنها
هـــوّد ابذبيـــــــچ الخــرابه وسكن ونها
وابو الــــــباقر بالغــــــرب بيـــده دفنها

اعليها علي السجاد سالت دمعته
ابگاع الغـــرب ويلاه دافنها اخته
زاد انتــحابه
وذيچ الترابه
تاليها فــــــوگ الراس ماتت رقيه

ـــــــــــــــــــــــــــــــــــــــــــــــــــــــــــــــ

هالطفله خلصت مــن مـصايبـها واذاها
امن الخـــــرابه الـمــــوت للجنه خذاها
لچـــــــن زينـــــــب ضلت ابهمها وراها
والمـــــــــدامــــع ضلت اتسيل ابجفاها

الله يعين ام المـصـايـب عالمصايب
يوميه عدها فاجعه ابذيچ الخرايب
عگب المهابه
وذيچ الترابه
تاليها فوگ الراس مـــــــاتت رقيه

ــــــــــــــــــــــ

لخادم الحسين ع الشاعر /
سيد محمد السعبري .

https://t.center/ashggjd
ـــــــــــــــــــــــــــــــــــــــــــــــــــــــــــــــ

#شهادة_الامام_علي عليه السلام
ـــــــــــــــــــــــــ


وا علياه وا علياه يا ابا الحسن

°°°°°°°°°°°°°°°°°°°°°°°°°
يا إمـــــــام الشيـعه يالـمـالك بدل
اشلون سيف الضالم لراسك وصل
بيا ذنـب صابـوك يا خـيـر الـعـمـل
يا اهـل للـمـاله يا حـــــيـدر اهـــل

نودعك ابآه نودعك ابآه وكلشي حِزَن

ـــــــــــــــــــــــــــــــــــــــــــــــــــــــــــــــ

المات ابو وحــــــده يمـر بيه اليتم
وانت مـــوتك يا عـلــــي يتمه يعم
يتيـتـمة بـجـفـاك نــســــوان وزلـم
يا ابـــــونه ونـعِـم مــن هـذا الاسم

واويلاه واويلاه صحنه ابشجن

ـــــــــــــــــــــــــــــــــــــــــــــــــــــــــــــــ

يالعفتنه ايـتام لـيش اسـتـعـجـلت
ومن وكت رحت وعفتنه من وكت
ريــت احـنه المتنه مـو انتَ المتت
يامـــن ابمــوتك علي كلشي خذت

وين نلگاه وين نلگاه المثلك وطن

ـــــــــــــــــــــــــــــــــــــــــــــــــــــــــــــــ

يلي جـــرحــــك باليحـبك ما شفه
يا عـلــــي بعـدك على الـدنيا العفه
انت حـجـه وانـتَ ديــن ومـعــرفه
الدين من بعــــد النبي بيـك اكتفه

وا اماماه وا اماماه صوت انعلن

ـــــــــــــــــــــــــــــــــــــــــــــــــــــــــــــــ

هذا صــوت يضل يحـــيدر يعتلي
بالـــشـدايــــد دوم ننــدب يا علي
انتَ ابـــونه وانتَ حـبـــنـه الاولي
اسـمــــــك ابكل هم نذكره يالولي

يبقى ذكراه يبقى ذكراه طول الزمن

ـــــــــــــــــــــــــــــــــــــــــــــــــــــــــــــــ

خلها ذيچ الـــــــوادم الـــما رادتك
ولا اعتـــــرفـــت سيــدي بولايتك
بالــقـــيـامه هناك تـعــــرف عازتك
اتــگوم تتـحـســـــــر لان ما حبتك

اتگول وياه اتگول وياه صرنه عسن

ــــــــــــــــــــــــــــــــ

لخادم الحسين ع الشاعر /
سيد محمد السعبري .

https://t.center/ashggjd
ـــــــــــــــــــــــــــــــــــــــــــــــــــــــــــــــ

#شهادة_الامام_عـلـي عليه السلام
ــــــــــــــــــــــــ


گلبك بويه مات // لو گلب الحياة
بديت ابموتك اشعر خذت كلشي المنيه

••••••••••••••••••••••••••••••••••

يبويه يالشايل عني وخـذك منـي غفله الموت
يبويه ويّاك استشهد كلشي ومدد بالـتـابــوت

كلشي ابرحيلك مات گمت اني اشوفه
وحــگه اليريد ايــمـوت لـمـــــن تعوفه

فگدك ما يهون // والدنه الحنون
وغـلاتك بـويه عنـدي يحـمّـاي الحـميه
بديت ابموتك اشعر خذت كلشي المنيه

ـــــــــــــــــــــــــــــــــــــــــــــــــــــــــــــــ

مصابك زيّدها اجروحي وزيّد نوحي يابو حسين
مصابك انهد حيلي منه وصرت ابونه ودمع العين

يالـــــشايـل الله اويـاك يالـفارگـتني
تمـنيته بــويه الـمــــوت لمن عفتني

اشگد جرحه چبير // افراگك يالامير
صفت زينـب يبو زينـب تره ابهم واذيه
بديت ابموتك اشعر خذت كلشي المنيه

ـــــــــــــــــــــــــــــــــــــــــــــــــــــــــــــــ

وداعاً ها يا خيـمتـنه ويا ضحكتنه ورحت ابساع
وداعاً يالروحك ترفه المثلك وسفه اتـضمه الگاع

يا مگصد المـحــــتـاج والفـقـــره كلها
لـــــو جـتـك الايتام بـــــويه اشـنگلها

ايتامـك يجـون // اعليك ايناشدون
اشيصبرهم لون گلنه علي تحت الوطيه
بديت ابموتك اشعر خـذت كلشي المنيه

ـــــــــــــــــــــــــــــــــــــــــــــــــــــــــــــــ

مصيبه دمعي چالغيـمه وانا ايـتـيـمه وجاني العيد
مصيبه ويا فرحه اتمرني وشنهو ايسرني وانت بعيد

يا فرحـــــتي ابدنــياي بـس مـا دمتلي
رحـــت وحـــــزن وهموم بعدك عفتلي

يا عيدي الوحيد // غيرك ما اريد
الـفـرح كله ابغـيابك بعـــد مـيـمـر عليه
بديت ابموتك اشعر خذت كلشي المنيه

ـــــــــــــــــــــــــــــــــــــــــــــــــــــــــــــــ

ابرحيلك متعـذّب حــالي ومــر ابّـــالي يابـو اتراب
ابرحيلك اتذكرة الزهره وذيچ العصره الخلف الباب

ابموتك يـحـــامي الجــار رد ذاكَ همي
وتذكــــــرة هـالـــيـوم من مـاتـت أُمي

ودموعي حچن // وينچ يمُ حسن
وصـحـــت وينچ ييـمه تـعالي يالزچـيه
بديت ابموتك اشعر خذت كلشي المنيه

ـــــــــــــــــــــــــــــــــــــــــــــــــــــــــــــــ

عفتني او يالغالي الخاطر يلّي امهاجر ضل مكسور
عفتني ويلي ابهالسيره ابقى ابحـيره ابهم عاشـور

بالطف يموت حسين وابقى اني انوحن
وبـعـده يبـو الحسـنين مسبيه اروحـــن

واتـمـنــــى إلـي // تحـضــر يا علي
من اصبح وحيده ابصـحـاري الغاضريه
بديت ابموتك اشعر خذت كلشي المنيه

ـــــــــــــــــــــــــــــــ

لخادم الحسين ع الشاعر /
سيد محمد السعبري .

https://t.center/ashggjd
ـــــــــــــــــــــــــــــــــــــــــــــــــــــــــــــــ