📜قصيدة لمولاتنا الزهراء "عليها السلام"
🎵على لحن قصيدة "شال الراية" للرادود حسين والي اللامي
🖋️لخادمة أهل البيت# العلوية ام وليد الموسوي
وزن المفتون
اقراية اقراية اقراية للزهرة أنسوي قراية
ـــــــــــــــــــــــــــــــــــــ
باب الخشب وج نيران ضلت تون محنية
من طگ ضلعها البسمار فوگ الضلع مچوية
زينب تگول الونات ماهدت منها أشوية
نصبوو العزة وصيحوو أبصوت مظلومة يالعلوية
نكسر اضلوع وچفين لا مــا نگول أكفايـة
اقراية اقراية اقراية لزهرة نسوي قراية
ـــــــــــــــــــــــــــــــــــــ
من نلطم انكسر اضلوع تستاهل ام السادة
لا مـو كفايـة الدمـعات طوول العــمر معتادة
طبع اليموت احنه نگول ودع هله بالعادة
زينب اجت تحچي وياچ مالگت بس اوسادة
ضـل يـبچـي يا يمة اعليچ قـرآن وأمصلاية
اقراية اقراية اقراية لزهرة نسوي قراية
ـــــــــــــــــــــــــــــــــــــ
حضروو المجالس والنوح نبچي ابدمة عالصاير
عازو الحسن عازو حسين شيجبره كسر الخاطر
عـافتهم أبنص الليـل شبحوو عليها الناظر
ساعات زينب عالباب وكت الغروب تناطر
يايمه عفتينه ايتام ما حسبيت أبهايه
اقراية اقراية اقراية لزهرة نسوي قراية
ـــــــــــــــــــــــــــــــــــــ
ما حسبت امها تموت والدنيا صارت ظلمة
چن مگبرة وحشه البيت مفگودة چلمة يمة
يبچي اليتيم وهيهات حضن الحنان ايضمة
خـد الزچية المسطور خاف التراب ايلچمة
لو نشفت دموع العين نشريها احنه اشراية
اقراية اقراية اقراية لزهرة نسوي قراية
ـــــــــــــــــــــــــــــــــــــ
نشري اللطم ماننساه ثوب بدماها أمنگع
أشيحملها عصرات الباب لاذت خلف ماتطلع
شاهدت محسن مطروح موقف صعب وأمروع
عميانه ماضنها اتشووف عين الالچ ماتدمع
ماتطفه تسعر بالروح نارچ تضل چواية
اقراية اقراية اقراية لزهرة نسوي قراية
ـــــــــــــــــــــــــــــــــــــ
ماتطفه تسعر بالروح كل شيعي شد احزامه
الفاطم وابنها المذبوح فوگاها حرگ اخيامه
الهم بچي ودگ أصدور كون اللطم عالهامة
هناك بصحيفة لعمال يلگه الاجر گدامه
كلمن لطم لهل البيت يشرب الكوثر مايه
اقراية اقراية اقراية لزهرة نسوي قراية
ـــــــــــــــــــــــــــــــــــــ
✍🏻تمت بعون الله وتوفيقه بقلمي خادمة اهل البيت عليهم السلام العلوية ام وليد الموسوي لا أجيز حذف الإسم أسألكم الدعاء وقراءة سورة الفاتحة إلى روح والدي ووالدتي
https://t.center/Alalwya
