چفوفي عله النهر للجود ناذرهه وحراسك يجرف الماي اطشرهه ______ شحدهه يانهر تحميك حراسك إذا زينب نختني امحيك من ساسك انه العباس اجيبن مايك وناسك حدر جدام زينب فدوه انحرهه ______ انه العباس حامي الجار سماني سبع الگنطره ولليوم رباني وصية بزينب وبالخدر وصاني وآنه لزينب الچفين ذاخرهه ______ جبتهه لكربله وتكفلت بيهه شلون يكون بالشدات اخليهه اليوم المشرعه ميدان اسويهه وانفخ صور بالجيمان واحشرهه ____ اخلي المشرعه بدم الزلم حمره واخلي النهر من الماي يتبره هذا اليوم يومي الچنت انتظره واخلي أم البنين تشوف اليسرهه ___ شحدهه يانهر حراسك التحميك توگف بالدرب لمن اغير عليك اخلي اهل المَقاتل بس تسولف بيك وتصير القافيه عله لسان شاعرهه ___ زينب لو نختني تريد مني الماي نهر العلگمي بالجود اجيبه وياي اخو زينب تراني وسهله كلش هاي تامر والنهر خادم لوامرهه ___ تره السبعين الف لاتكبر بعينك انه العباس اطشرهه عله جرفينك بمهب سيفي رماد تصير سبعينك وخلي خيولهه تدوس بعساكرهه _____ اخلي الخيل بهل الخيل تتعثر وصير عله الكتايب موتهه الاحمر وخلّي الروس يم الروس تطشر وترجع خيبر ويقلعهه حيدرهه ____ الشاعر ابو اسحاق الفحام