«چۆن شێتنەبم»
لەم جیهانە،
پەلەوەریش
نیشتمانی بۆ خۆی هەیە
دارستانێ، تاقە دارێ
ئاوارەش بێ
نێو ئەشکەوتێ، بن پاسارێ!
چون شێتنەبم
نەچم بە گژ کوێستانێکاو
چوار ڕێیانی گەردون نەگرم
هێشتا بستێ خاک شک نابەم تێدا بژیم،
تێدا بمرم...
چۆن شێتنەبم
هەموو ڕێگام لێ بەستراوە
بەهەر جادە و
شەقامێکا ڕادەبوورم
تەپۆڵکەیێک،
کڵاوێكی سەربازانەی لەسەر ناوە
دڵ و گیرفان دەپشکنێ
بەڵگەی خواشم لەگەڵدا بێ
ڕێگام دەگرێ
نەکا نەخشەی،
وڵاتێکم لە گیرفان بێ و...
ڕەمزی نهێنی ناوێکم لە دڵدا بێ
چۆن شێتنەبم
توڕەم.. توڕە... وەک ئاگرم
شمشێرێکی هەڵکێشاوم
لەناو بریسکی خوێنیخۆما ئەزریکێنم
هەتا کەلان نەدۆزمەوە
ئۆقرە ناگرم
خوا ئەزانێ من حەز ناکەم
وەک عەشقیا سەر گەردان بم
لەم کوێستانە
ڕێگەم بدەن بێمە خوارێ
هیچم ناوێ لەم جیهانە
جگە نەختێک سەربەستی و
بستێ خاک و ئاڵایێک و ڕەشماڵێکی قەرەجانە.
ــــــــــــــــــ
#جەلال_مەلەکشا #ڕاوێژیسم Me bişopînin:
@rawezhism