#پیرەهەڵۆ#مامۆستا_هەژارپاییزە دار و دەوەن ڕەنگ زەردە
با تەزووی سەردە بەتۆز و گەردە
دیارە لای شەختەیە ناخۆش خەوەرێ
دارە خۆی دەڕنێ خەزەڵ هەڵدەوەرێ
هەورە ڕەشپۆشە بە گریە و ناڵە
سەرەتای شیوەنی مەرگی ساڵە
بە گـژەی سەردی هەناسەی کـەژ و کـۆ
ژینـی خۆی هاتەوەبیر پیرەهـەڵـۆ:
داخـەکەم بۆ گوڕ و تینی جوانیـم
ئەو دەمـەی چۆن و چ بووم بۆ وانیم؟
هـێز و سـۆمای نییە باڵ و چاوم
مامەوە گردەنشین بـێ ڕاوم
دوورە گۆشت پۆڕ و کەوم، وەردەکەوم
گۆشتە نێچیرێ مەگەر بێتە خەوم
پیرییە پاییزی وەرزی ژیانە
وردەهەنگاوی بەرەو گۆڕ نانـە
وا هـەڵـۆی مردنە ڕاوی کردم
ڕاو بەتاڵیی مـنـە هاکا مـردم!
مردنیش هێندە نە سووکە و سانا
سەری لێ گێژە هەزاران زانا
چم بەسەر دێ کە نەمام و مردم
پەڕی بەر بایەک و خۆڵی وردم
گیان بەرەو کوێ دەفڕێ ڕوون نییە بۆم
تۆ بڵێی بچتەوە لای باوە هەڵۆم؟!
تۆ بڵێی ڕاوێ هەبێ لەو بەرزە؟
پاش هەموو چەرمەسەری ئـەم عەرزە!
داخم ئەو ڕازە لەبن سەرپۆشە
سـەفەری نابەڵەدی ناخۆشە
دڵ و دیدەم کە بە دنیا فێرە
چەندی پێم بکرێ دەمێنم لێرە
ژین گەلێ شیرینە فیزی ناوێ
بۆ مەبەست سەر دەنەوێنم تاوێ
چاری ئەم دەردە لەلای قاڵاوە
گەرچی زۆر پیرە بە لاوی ماوە
دەچمە لای و بەوە چم لێنایە
ڕەشییە و ئـاوی ژیانی لایە
سـەرنەوی دای لـە شەقەی شاباڵان
هاتە وێرانەیەکی جێی ماڵان
بوو بە میوانی قەلێکی ڕووڕەش
چەپەڵ و ڕژد و لە مەردی بێ بەش
قەل قڕی: لێممەیە پێش زۆرداری
خوا شوکور زۆر بە کەنەفتی دیاری
زووبە چیت لێمگەرەکە پێمبێژە
دوور لە من بگرە لەشم بەنوێژە
وتی ئەی لالەقەلەی هەرلاوم
پیرم و زۆر لە مەرگ تـرساوم
هەمە پرسـێک و دەبێ بمبوری
هـۆی چییە تۆ کە لە مردن دووری؟
وەک دەڵێن ئێوە بە چلساڵ باڕن
تووشی وەش نایەن کۆسپ و باڕن
ڕێیەکم پێبڵێ بۆ هەرمانم
تۆی لە لات دەستدەکەوێ دەرمانم
سوێند دەخۆم پاشی هەتا بشمێنم
هەرکەوێ ڕاوی بکەم بۆت بێنم
قەل گوتی: هۆزی هەڵۆ زۆرخاون
سەیرە لام چۆنە کە خاوەن ناون؟
باب و کاڵت بە نەزانی مردن
بیری سەربەرزییە وای لێکردن
هەرکەسی بەرزەفڕە زوو دەمرێ
بای بڵیندایی سەر و دڵ دەگرێ
ماڵی ئێوە کە لە لووتکەی کێوە
لای جن و دێوە بەڵای زۆر پێوە
خوێنەپوڕ پوڕگی دەخاتە خوێنێ
گۆشتکەوی تازە گرفتی دێنێ
جگەر و سیی و دڵی مامر ژەهرە
تا وەهابی تەقەلات بێ بەهرە
دەتەوێ زۆر بژی، خۆش ڕابوێری
خۆ لە پەندم گەرەکە نەبوێری
وەرە وەک ئێمە بژی نزم و نەوی
شەو لەسەر گەندەڵەدارێک دەخەوی
خواردنیباشی کە تۆ نەتدیوە
گۆشتی بارگینی گەنی و تۆپیوە
کردنیچینە لە پەین و شیاکە
تاو و تینی لەشە بۆ دڵ چاکە
پەندی باپیرە بە میرات ماوە
خوێنی زامی کەرە سۆمای چاوە
گفتی من گەوهەرە بۆت هەڵڕێژم
تاقە دووڕێت لەبەرە پێت بێژم:
یان لەناو بۆگەن و نزمایی ژیان
یان بە سەربەرزییەوە بسپێرە گیان
ڕاچەنی لەم وتەیە پیرەهـەڵـۆ
هاتە بەرچاوی گەلێ کەند و کڵۆ
کەوتە ناو گێژی خەیاڵات و خەمان
مان ئەگەر وابێ؟! چ شیرینە نەمان
وتی: پیرۆزبێ لە خۆت ئەم ژینە
جەژنی تۆ بۆمە شەپۆڕ و شینە
کێ بە سەربەرزی ژیابێ تاوێ
ژینی قاڵاوی بە پووشێک ناوێ
چاوەڕێی مردنە گیان با بیبا
پەڕ و باڵم لە چیا با بیبا
بەهەڵۆیی لە ژیان بێ بەش بم
نەک هەزارساڵە قەلی ڕووڕەش بم
بۆ شتێک ئێستە لە خۆم بێزارم
من هەڵۆ بۆچی بە تۆ بوو کارم؟!
مەرد ئەگەر کاری بە نامەردانە
دەردی سەرباری هەموو دەردانـە
کەوتە خۆ دای لە شەقەیباڵ دیسا
ئاگرێکی لە دەروون داییسا
ڕاستەخۆ بۆ سەر و هەر بۆ سەر چوو
هەردی جێهێشت و لە هەوران دەرچوو
قەل هەزار ساڵێ ژیا بەو تەرزە
سەرنەوی و هێشتە هەڵۆ هەر بەرزە
https://telegram.me/joinchat/AAAAADv4YunX2T5hjnfnIw