ادامه ابیات
👇👇👇.
🟥⚫️ ۱۱۷بیت دارجنگه ملانوشاد ابوالوفایی
✍ (تصحیح د.داودی)
#سرویس_ادبی_مپل 🟥 #قسمت دوم
۶۱. رنج کوی تیشین فرهادم دیهن
هزاران ژِی ور استادم دیهن
۶۲. تا ناگاه شیرو شوم ستمگر
خوسِرو دا نه کشت نیشت ئو جا پدر
۶۳. ئوویش آوازه پی قتلش خیزا
یکیک سرداران ژه لاش گریزا
۶۴. شاهیش نکیشا وه نیمه ماهی
هر کدخدایی بیه یئ شاهی
۶۵. هر ده نشینی کی نشینی بی
هر روژ رستاخیز سرزمینی بی
۶۶. ژه هر جانبی خیزا سرهنگی
ژه هر ولاتی پیدا بی جنگی
۶۷. هریک سرداری بی وه یئ سانی
هر یک روی کِردن ئو سر مکانی
۶۸. جهان پرآشو دنیا درهم بی
خاطر پژاران، آسایش کم بی
۶۹. تومرز دو سرهنگ داوشان بستهن
هونه مجالی ژه خدا گِستهن
۷۰. ایلچی نامهشان آوردن بِردهن
وعدهی جنگشان له پای من کِردهن
۷۱. هر إوسا زانام دوول جنگ خیزا
رعدآسا هر جا دنگی وریزا
۷۲. پیدا بی لوای رزم آزمایان
هر صف نگام کرد هویچ نداشت سامان
۷۳. ری وَ ری آمان دو سپای عظیم
من منمه مابین محنت زدهی شویم
۷۴. دلیرانِ داو بِورِ پولاد برگ
جنگ آرزوکَر بیخور ژه مرگ
۷۵. شیر سهمناک پانشناس ژه سر
تهمتن هیوت دس ئو شمشیر بر
۷۶. وینهی رعد و برق تم و توز سخت
مریزا تورگ بی سامان ژه بخت
۷۷. ژه قضاخانهی دسِ داو کاران
مواریا خرشت تیر وینهی واران
۷۸. هاوا پر خوبار زمین موج خون
مرد و اسب ار بان هم دیم سرنگون
۷۹. لاشهی سرداران له میدان کوبی
هر جا خوین جاری چوین آو جو بی
۸۰. دیم پهلوانی وینهی تهمتن
کله دیو مِغفَر، پوس بور جوشن
۸۱. له پشت اسبش سنگین تر ژه سام
ژه نوهی شاهان اردشیر وه نام
۸۲. مرصع تاجی پیکیاوی نه سر
زرباف قبایی کِردهوی نه ور
۸۳. تیر دلدوزی نه چلهی کمان
جا داوی پی قتل خصم بی امان
۸۴. فاقهی خدنگش نه چلهی کمان
پیوهس کِردهوی چوی پهلوانان
۸۵. آما ری وَ ری سرداران ژهی سر
سردار سنگین لیش کِردی گذر
۸۶. چوی شغاد ژه بیم سرپنجه روسم
و پیوار من سنگر گرت موکم
۸۷. دیم خیزا شاقه کمانی ژهی ور
ژه قیژه تیرش هوشم چی وه سر
۸۸. خیزا قاژهی تیر تونک چوی گل زِر
قیژه سئ کویزه مسکو چوی دل پِر
۸۹. سینهم آماج کرد سر مودای خدنگ
دویزام ئو سینه سردار سرهنگ
۹۰. له من گذر کرد ژه ئو ویارا
تا پَرّ نیشت ئو خاک نمناک سارا
۹۱. سردار کفت نه خاک، من منمه پاوه
وهی خطرناکْ زامِ ناسور نماوه
۹۲. وهی زخم تیر گاز بی امانهوه
هیمان هام وه پا وِی سامانهوه
۹۳. ژِو سر وه ترکش ئو سوارکاران
ماواریا هیرشت تیر وینهی واران
۹۴.جنگ سرداران مردان چی وه سر
شیران خوینخوار مردان ژه کوی بر
۹۵. دس بردن او سیف داخل بین وه هم
داوشان هام داو وینه توز و تم
۹۶. چکاچک تیخِ مصری زرهِ بِر
خرشت سپا، سان آورد ئو خِر
۹۷. بس کاس کله نه میدان کو بی
لاشه و گوشت و پوس خویناو جو بی
۹۸. شو آما دو صف جدا بین ژه هم
من منم وهی درد پی اندوه خم
۹۹. سحر دالگیران شهیدان جنگ
بردهوین نه روی قرص خورشید رنگ
۱۰۰. وحش و طیر ژه کوی، ویشه سر کِردهن
لاشه و جرگ و برگ شهیدان حوردهن
۱۰۱. هر چن وه نوبت طیری ژه طیران
منیشت ئو شاخم پی عزم سیران
۱۰۲. گا سیر لاشه، گا نگاه ئو چول
گاگا وه تیمار بال و پر مشغول
۱۰۳. هر یکی لوان وه مأوای ویشان
من وهی کول درده منم ار جیشان
۱۰۴. ژِو دما چن شاه هم ژه لام چیهن
چن کوچ خیلان گذرگام دیهن
۱۰۵. چن پادشاهان شاصفی نسو
آمان ویاران چوی نویر وه اَدو
۱۰۶. تا ایسا یه دور نادر سلطانِن
مردم ژه جورش بیزار ژه گیانِن
۱۰۷. جهان پر آشو، دنیا در همه
خاطر حزینه، آسایش کمه
۱۰۸. رعیت فرارهن، خلق خولقش تنگه
اقبال اولاده شاصفی لنگه
۱۰۹. ایسکه من یه حال یه احوالمه
یه رنج بِردهی چندین سالمه
۱۱۰. چن ساله من دارجنگه ناممه
وِی جوره آخر سر انجاممه
۱۱۱. نوشاد امانت ویت ندهر وه خم
پی جیفهی دنیا خواه زیای خواه کم
۱۱۲. دنیا بی وَرهن اصلش بر باده
إِوله اِو کسه وِی دنیا شاده
۱۱۳. ار گنجت پر بو وینه سلم و تور
کس مال دنیا نوردهن و گور
۱۱۴. اندرزم یه سه پی دنیا دوسان
دنیا دمی که چوی شارّو بوسان
۱۱۵. فره مترسم ژِی روزگاره
ژِی فتنهی لئیم شویم بدکاره
۱۱۶. نوا بدبختی لیم بدهی آگر
سٌختهم باد بَرو بایر ار بایر
۱۱۷. کوتا بو ژه روی زمین خاک پام
کس نای تا تویلی بنیشو ار جام
🌎 وبسایت:
www.mapell.ir╭========
💡======╮
🆔 @MapellNews╰========
💡======╯