☀ منبريّون حسينيّون ☀

▪️ #السيدة_زينب_ع
▪️ #لطمية_بطور_مر_بيه_لو_طيف

معـقـــولــة يــا ليــل .. ماتسمـع آهــاتــي
لاتنـجـلــي ابســــاع .. إرحــم معانـاتــي
بيـك أعقـــد النــوح .. وابن امي مذبوح

ــــــــــــــ ✾ ✾ ✾ ـــــــــــــــ

أنــه زينب أنــه المحّـــــد صُبَــــر صبــري
سبــوني الگــوم وآنــه المنعــرف خــدري
نيــاشيــن السيــاط الحــادي ابظهــــــري
واخوتي عْلــه التــرب حسرتهم بصــدري

خوتــي الميــــاميــن .. وذروهــم گبــالي
وْنـصْبَــــوا الـــروس .. فـوگ برمح عالي

دلّالـــي مجــــــروح .. وابن امي مذبوح
بيـك أعقـــد النــوح .. وابن امي مذبوح

ــــــــــــــ ✾ ✾ ✾ ـــــــــــــــ

وحِــدْتي وغربتــي ماصارت اعله النـاس
عزيزة آنه چنت بيــن اهلـي رفعــة راس
اجيت امـكللــة ومصيــونــة بــالعبــــاس
صفيت انوب سليبة من غُرُب وارجــاس

مــن بعــــد الأبطــال .. اركب بــلا والــي
وابــحَــــرّ الارمــــال .. تتشتت اطفـالــي

ظـل دمعي مسفوح .. وابن امي مذبوح
بيـك أعقـــد النــوح .. وابن امي مذبوح

ــــــــــــــ ✾ ✾ ✾ ـــــــــــــــ

مسا العــاشر ســواده ابــروحي ناقِشتــه
ابد ماينمحــي امــن الــذاكــرة اوصَفْتــه
يمصعب مــــن اخويــه عــالارض شفتــه
سـاعــــة مــن خيــول الكسّــرت جْثْتــــه

اصــرخ يــــالخيــول .. هــذا عزيــز امـي
وابــداله أنــه اگــول .. لو ينطحن عظمي

صوت اخته مبحوح .. وابن امي مذبوح
بيـك أعقـــد النــوح .. وابن امي مذبوح

ــــــــــــــ ✾ ✾ ✾ ـــــــــــــــ

بعــد هالصــــار يَليلــــي لا تفــــارگنـــي
أنــه ماريــد صُبُــح يطلــع علــى جفني
مثل صبــح الخـذوني الكوفــة عذبنــي
اسيـــرة وبالسيــاط الحــادي يضربنــي

هــــم فــــوگ الآلام .. ايتــــام ابـاريهــه
محروگــة الاجــدام .. جمر الخيم بيهــه

كـــل هــذا وتــروح .. وابن امي مذبوح
بيك أعقـــد النــوح .. وابن امي مذبوح

ــــــــــــــ ✾ ✾ ✾ ـــــــــــــــ

اشأريد احچـي عــن الكوفــة ومصايبهـه
ستــــر ريتــــك بقيـــت النــه بخرايبهـــه
سبــــايــــه وفرجــه خلّونــه ابمجالسهــه
عـــدو ربنــا يزيــــد الطــاغي صاحبهــــه

وبمـجلســه النــاس .. تتفـــرج اعلينــــه
ياجــرح الاحسـاس .. اصعب جرح بينـه

موجوعــة هالــروح .. وابن امي مذبوح
بيك أعقـــد النــوح .. وابن امي مذبوح

ــــــــــــــ ✾ ✾ ✾ ـــــــــــــــ

✍ بقلم الشاعرة زينب الخفاجي

~•~•~•~•~•~•~••~•~••~•
ــــــــــــــــــــــــــــــــــــــــــــ
#رابطة_الشعراء_المنبريين_الحسينيين
☀منبريّون حسينيّون☀
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…~...
https://telegram.me/MINBARIYOON