☀ منبريّون حسينيّون ☀

#قصيدة للولادة المباركة
لرسول الله
( صلى الله عليه وآله)
……… .. وزن المنسجم ………   
.
يابحر الوفه. ..  رِقه وعاطفه
نورك ماطفى .. يابو الزچيه
.
ـــــــــــــــ ❁ ❁ ❁ ـــــــــــــــــ
.
بدرك كمل يالمصطفى
بوجه السمه أزهر
هاي المسيه ابمولدك 
  فجر  الهدى أسفر
اعلن تسابيحه   العرش.
   للباري   اوكبر
من عطرك.   النادر اجت 
   الجنه تتعطر
.
عندك بالمهد .. مكتوب العهد
بس حيدر سند .. بعظم قظيه
..يابو الزچيه
.
ــــــــــــ ❁ ❁ ❁ ـــــــــــــــ
.
نور  الولايه  ينبعث
  من جذوة احساسك
خدر  الزچيه  ابنظرتك 
چي هيه نبراسك
بخدك شفت وجه الحسن
متعطر ابياسك
أسم  الحسين  اتردده 
كل شهگه بنفاسك
.
ليلة مولدك .. كل طاغي هلك
فرحان الفلك .. وانت الهديه
.. يابو الزچيه
.
ــــــــــــ ❁ ❁ ❁ ــــــــــــــ
.
بالكعبه عبد المطلب
ماعنده كل حيله
جدك  يشاهد ابرهه
يهجم أجه ابفيله
ينخى العظيم  أبمولدك
  أعلن تراتيله
الباري  ارسلك  مدد 
طير  من أبابيله
.
جيش من السمه .. الوالد فاطمه
لجل الحاطمه .. والناصبيه
.. يابو الزچيه
.
ــــــــــــ ❁ ❁ ❁ ـــــــــــــــــ
.
خاتم   رسالات.  السمه 
كلهم يعرفونك
تدري النصارى  ابمولدك
أحمد يسمونك
حتى اليهود اهل الغدر
چانوا ينطرونك
رادو   يهودي.  تنولد  
حتى  ينصرونك
.
همك ينجلي .. صوتك يعتلي
منصور ابعلي .. من الجاهلية
.. يابو الزچيه
.
ـــــــــــــ ❁ ❁ ❁ ـــــــــــــــ
.
بس الله وي حيدر فقط
العرفوا الطافك
كل  كلمه الفظها ولا
تستوعب  اوصافك
اسمع وصيتك وافتهم
كل كلمه بشفافك
المايوالي  المرتضى 
يالمصطفى  عافك
.
العاده الذخر. .. تايه بالحشر
بيمن ينتصر .. يوم الرزيه .
. يابو الزچيه
.
ـــــــــــــ ❁ ❁ ❁ ـــــــــــــــ
.
صادق وأمين وهم كمل
بيك الكرم كله
أسمك  دوه بي  يالنبي
تتشافه كل عله
اتمنى أنظر يوسفك
سيف الهدى ايسله
يرفع  لوائك  بالنصر 
و الطاغيه  أيذله
.
يبني دولتك .. ينشر دعوتك
تشمل أمتك .. كل البريه
.. يابو الزچيه


ـــــــــــــــ ❁ ❁ ❁ ـــــــــــــ

.
.حسن الموالي الفاطمي
.





ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_للمشاية

قصيدة للمشاية طور اهوازي


اجتك سيدي الخدام    واترفرف رواياها
تگطعلك طويلة دروب   ليك الشوكَ جاباها
آيحسين ومصابة    آيحسين ومصابة
(==================)
مشاية ولحد الموت  مانترك مصاب حسين
مصباح الهُدى وللناس  سفينة واحنا غرگانين
ذنوب محملين هواي   يغفرهن مشي الرجلين
بخدمتك مانرد ونخاف  وشرف هالخدمة نلگاها
آيحسين ومصابة       آيحسين ومصابة
============================
كون انعرف ابو السجاد   من تمشيلة رجيلنة
نترك كل حقد عالناس   ننضف گلوبنة وجينة
ما نمشي بعكس ما راد  ونسير بدربة خلينة
هاي الغاية والمطلوب   الحسين المنة راداها
آيحسين ومصابة       آيحسين ومصابة
======================
تواسي زينب الحوراء   مشي بالاربعينينة
بدربك للنساء انشوف   بعضهن عدها سلبية
شقة وتمضحك ومكياج   چن تمشي لعرس هية
مو چن رايحة لحسين   الروحة لخدرچ اطاها
آيحسين ومصابة       آيحسين ومصابة
=========================
خدم عدنا بذهب تنقاس   تخلص وي ابو اليمة
بنفسة يخدم المضلوم   ويزود بخدمتة الهمة
يجازيه الحسين اضعاف   مكانة ايرفعة للقمة
التخلص وي ابو السجاد   جاه ورفعة جازاها
آيحسين ومصابة         آيحسين ومصابة
=========================
الف هنيالة كلمن زار   الحُسين وعارف بحقة
يرد چنة انولد بالحال   ذنوب اعليه ما تبقة
حبك من نزل للناس   اهو كل واحد ورزقة
عالفطرة الگلب لحسين   گام الخدمة يهواها
آيحسين ومصابة      آيحسين ومصابة
=========================
اسالكم الدعاء رائد الاسدي



ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_للمشاية


قصيدة للمشاية جديد

من البحر ...... حد النحر
يحسين الك مشاية
يحسين الك مشاية
==================
بلهفة گلب.. يمشي المحب.. يالغالي الك عاهدنا
نصون العهد... أباً وجــــد... يفدي العمر واحدنا
حبكم عقيدة ومعتقد والشيعي يوفي بحبة
انــــتم املنة ونعـــقتد للهادي انـــتم قربة
الخالف نهجكم سيدي خاسر وتيه دربة
بس اليحبكم ما خسر حبكم يوصلة لربة
فاز وربح ....  كلمن صبح
يحسين الك مشاية   يحسين الك مشاية
=================
تعادل حجج .... بيها الفرج.... زيارة حسين الضامي
ابحر وبرد .... دوم استعد ... تندل دروبة اجدامي
ما بيني وبينك عشكَ ابلهفة وشغف اتعنة
مشاي اجيلك واعتني حبك فلا امل منة
امشي بطريقك وأعتقد اوصل لحد الجنة
لو تعبت اجدامي زحف اوصل الك واتهنة
ازحف زحف ....  راية ترف
يحسين الك مشاية   يحسين الك مشاية
=====================
راحة نفس..... بيها يحس.... كلمن مشه لمحبوبة
واليمشي الك.... ايحفة الملك... مغفورة كل ذنوبة
ياربي عجل بالفرج نمشي ونناجي الباري
يرعانة ابو صالح هتف احفظ يربي انصاري
وحسين ابو أليمة استعد ياهله ابكل زواري
وبالحظرة ابو فاضل وگف اهلا اجيتوا لداري
الطب كربلة .....  مية هلة
يحسين الك مشاية .... يحسين الك مشاية
=================≠=========
من أقصى الجنوب.. لسيد القلوب. خدمة وخدم متروسة
صبح ومسه.... الكل جالسة.... بالله وعلي محروسة
كل خادم تشوفة ملك بحسين من يتسمة
خدام الحسين ونعم طول الدرب ملتمة
تاج وفخر بيها افتخر كلها تصيح الخدمة
لو تعب واحد بالدرب فزعولة شدوا عزمة
عز وشرف.... غاية وهدف
يحسين الك مشاية.... يحسين الك مشاية
=======================

أسالكم الدعاء رائد الاسدي




ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_للمشاية


قصيدة للمشاية زيارة الأربعين


يحسين يا اغلى الناس   نتعنة الك مشاية
حبك ســــكن بالدلال   شيعة ونضل وفاية
لبيك لبيك ابا عبدالله    لبيك لبيك ابا عبدالله
==========================
حبك سكن دلالي   يا اغلى من كل غالي   حبيتك
اغفى وافز جدامي  وبيقضتي واحلامي  لاگيتك

مشاية اجينا والاهل عفناها  الدنيا ابوجودك سيدي محلاها
انة بمحبتك عالخلكَ اتباها   الباري روحك للعشكَ سواها
يالتارس الدنيا احساس   مجنونة بيك هواية
حبك سكن بالدلال   شيعة ونضل وفاية
لبيك لبيك ابا عبدالله   لبيك لبيك ابا عبدالله
=============================
كل خطوة الك محسوبة  بسجل الخدم مكتوبة  هنيالك
الحُـــجة لازم بيــــدك   توصل تواسي ايريدك  يبرالك

اليلزم بآل النبي ايلزمونة  لليخلص الهم حاشة ميعوفنة
وغاد ايعرفهم همة ويعرفونة  والجنة عدهم للخدم مضمونة
امن الكوثر انحصل كاس  والعذب نشرب ماية
حبك سكن بالدلال    شيعة ونضل وفاية
لبيك لبيك ابا عبدالله   لبيك لبيك ابا عبدالله
===========================
انباهي البراية ابحبك  نحيى ونموت ابدربك  والينة
ولهســــبب تلگانة   نسير ونجد ممشانة  اشتاگينة

يامن على اسرار الخلايق عالم  حكَ اليعرفك بالعشكَ ظل هايم
افتخر لجل حسين اصبح خادم  مسرور گلبي بخدمتة ومو نادم
الخدمة تاج اعله الراس   ترضون عدنا الغاية
حبك سكن بالدلال   شيعة ونضل وفاية
لبيك لبيك ابا عبدالله   لبيك لبيك ابا عبدالله
=========================
قطب الارض يالضامي  يمك خذتني اجدامي  ملهوفة
من كل بلد تــــتعنة  لگبرك تــــــطب للجنة   وتطوفة

كل الارض يم گبتك جاذبها   والمهدي واكف شيعتة ايراقبها
النية السليمة ينعرف صاحبها  بسجل الخدم بيدة غدة يكتبها
محسوبة حتى الانفاس   للگصدتك عناية
حبك سكن بالدلال   شيعة ونضل وفاية
لبيك لبيك ابا عبدالله   لبيك لبيك ابا عبدالله
==============================
من البحر نگصدلك   حد النحر نوصلك  والينة
من الــــمهد نهواكم   حد اللحد وياكم  ضلينة

خدام الكم نفتخر بالخدمة  نحمد الباري ونشكرة ابهالنعمة
ياربي كل خادم نريد اتسلمة  كل عام يرجع عدة نفس الهمة
من الزغر دكَ الساس   للموت منطي حچاية
حبك سكن بالدلال    شيعة ونضل وفاية
لبيك لبيك ابا عبدالله   لبيك لبيك ابا عبدالله
===========================

أسالكم الدعاء رائد الاسدي





ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_لأمام_السجاد
لسان حال الامام السجاد ع

ابــــــدرب السبي ماتت أدية
و كل همي چان احمي رقية
امن اربع جهات احجار تشگف يَمنَّاي
و اسياط فوگي و سلسلة تخط جَوَّاي
و انه عليل و انه عليل
ــــــــــــــــــــــــــــــــــــــــــــــــ
عليَّه شگد صعب
اعاين تنـــــضرب
خواتي
و ابوي اعله الرمح
يصيح ابكل جــرح
بناتي

فوگ الرماح ادموم ينـزف لينه
و قران يقـره راس ابـونه اعلينه
وجه يديره و مرة يغـمض عينه
كلما يطگ السوط متن اسكينه

من الضرب ما ظلــــت إيدين
و اعلينه شَيَّب رمش الحسين
أسمع ونينه شمــــــــا يمر من فوگاي
و اسياط فوگي و سلسلة تخط جَوَّاي
و انه عليل و انه عليل
ــــــــــــــــــــــــــــــــــــــــ
مشينه بالســــــــبي
نبية ابصف نـــــــبي
سباية
و مشت روس الأهل
تبــــــــث روح الأمل
حماية

عيون الرؤوس اعله الضعن مشبوحه
و بس راس واحد ينظر امـن اجروحه
عينه ابسهم لاجل الخــــدر مليـوحة
و امبينه زينب عمـــتي چانـت روحه

فوگ العقيلة امحدب الراس
و يهتز اذا نــــــادت يعبــاس
و ينذبح كلـــما ينفتح طـــاري الماي
و اسياط فوگي و سلسلة تخط جَوَّاي
و انه عليل و انه عليل
ـــــــــــــــــــــــــــــــــــــــ
ابجرح ما يندمل
عله ظهور الهزل
حدينه
بنات ام الحــسن
صفن آ يالــــزمن
رهينة

من كربله للشـــام بعــــــــد الكوفه
وحدة اعله وحدة بالحــبل مچتوفه
يا هيّه زينب غدت مــــــــا معروفه
نعرفـــــــها من ناگتها لن مخسوفه

و منها علامـــــة بعــد تنشاف
محروگة شيلتها امن الاطراف
عگب الكفـــــلها تغيرت عمتي اهواي
و اسياط فوگي و سلسلة تخط جَوَّاي
ــــــــــــــــــــــــــــــــــــــــ
عله طول الدرْب
ثكالة تنتــــــحْب
مصيبة
دمه ينـــزفن نَزِف
و جمرهن يختلف
لهيبه

يم راس الاكبر ليله تگـضي الليلة
تشكيله ساعة و ساعة دم تبچيله
و عبدلله أمّــــه امچتفة اتـناغيله
و اتهزه رمـــحه لمّـــــــن اتلوليله

و تگله ( گلب امك )يمدلول
ابسن الرمـــح وَيَّاك مشيول
عطشان بعــــدك ليش يا ضي عيناي
و اسياط فوگي و سلسلة تخط جَوَّاي
ــــــــــــــــــــــــــــــــــــــــ
وَلَد چنـــه الشمع
خلص مثل الدمع
شبابه
چوت خده الشمس
يويلي و العــــــــرس
مصابه

رمله ابرمح جاسمها تشـــبر طوله
و تنـــــادي مــن دم المتن حنوله
گلـــوله امـــك حـَـــــــدِبت گلوله
و راحت تموت ابحسرت الهلهوله

رافگني راسـك درب الاحزان
عود انه يُمة محضرة نيشان
و ثوب العرس يوليــــدي لساته اوياي
و اسياط فوگي و سلسلة تخط جَوَّاي
و انه عليل. و انه عليل
ــــــــــــــــــــــــــــــــــــــــ
الحمدلله
#علي_حسين_الكناني





ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_للسجاد
زين العباد عليه السلام

يالرايح وبموتك ادره
يالميت بالسم ولحسره
----------------------------
لوعات خلصت العمر ماشفت يوم الراحه
يالماشي متروس بحزن گلبك دمه امن اجراحه
مو سم نهشلك چبدتك العاشر ومصباحه
من شفت ابوك ابمحنته ويمه دنه ذباحه

يالرايح بهمومك حاسر
ميت انته بدوس الحافر
--------------------------------
اسباب موتك سيدي كثره وصعب ينذكرن
الموت اجالك من شفت ذيج الخيول العثرن
بصدر الحسين امن اعتلن بس انته ادره اشسون
داسن على صدر النبي ولضلوع جدك كسرن

يالعمرك خلص بالحومه
من شفت الوالد بدمومه
------------------------------------
وثاني مماتك سيدي عالكسر ضهر حسينه
مرتين طحت اعله الارض من اگطعو چفينه
روحك على الشاطي ازهگت من غفه السهم ابعينه
من طاح مصيوب ابعمد وذبحو احلام اسكينه

ميت انته ابگطع اچفوفه
وروحك راحت يمه اتطوفه
------------------------------------
وهذه الجرح ماينحچي اسنين العمر هدمهه
ابعينك شفتهه عمتك يمهه الشمر شتمهه
اشلون عينك شاهدت ابصوطه اشكر ألمهه
ولخيامكم ماضل قدر بالنار ضل يضرمهه

حگهه اتفيض وتزهگ روحك
موش اشويه اثگال اجروحك
----------------------------
ولموت الاكبر سيدي قصت الهزله وحره
فاضت انفاسك عالهزل من شاهدتهه ابحسره
الينضر خدرهم بالسبي گلي اشيضل ابعمره
يالميت انته من زمن وموتك الجاي اتنطره


يالميت موتين ابعمرك
موتت سم وموتت صبرك
---------------------------------
علي سليم الحسناوي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_الوداع في ليلة العاشر

يزينب حظري دمعچ اجيت الليلة اودعچ
ما تركـتچ مــــــن زغـــــر يا بعـــــــد كل العمــــــر
___
الحسين::

عمــــري كله وياچ يصـــــــبح كان ما كان
نعيش ليلتنه الاخيرة ابدمعة واحزان
يا اعز مـــن روحي عندي واغله انسان
كل حياتي وياچ واشعر كَلبي عطشان
وداعچ هدم الحيل قريب ويخلص الليل
رايح ايطر الفجر يا بعد كل العمر
_
زينب::

سنين عشنا بروح وحدة موش روحين
خلصن وهالليلة تكَظي هاي السنين
شوف ما شبعانة منك وانته بالعين
يمي واشتاكَ لحنانك خوية يحسين
عمر خلصته اشتاكَ اموت ابطاري الفراكَ
كَلبي ما يحمل هجر يا بعد كل العمر
_
الحُسين::

ألاخت وألام حسبتچ كل حياتي
لحظة لحظة وياي عشتي بذكرياتي
وداعچ ابهاليلة اصعب من مماتي
بيچ اوصيچ واوصي ابكل بناتي
صعب يا وكت الوداع يروح ويخلص بساع
خوية منچ شعتذر يا بعد كل العمر
____
زينب::

من فكَدنه امنه وابونه والحسن غاب
انته ابوي وانته امي واغله الاحباب
عندي يا ابو اليمه اغله من الهوه الهاب
لهسه من جرح الغوالي كَلبي ما طاب
العزيز اشلون اودعة يظل بعيوني دمعة
الله يطيني الصبر يا بعد كل العمر
___
الحُسين::

بالــــــــدمع مرســــومه والهم اه ياليله
كل خليل ايـــــــــوادع اليــــوم ابخليله
شــــــوفتچ چانت الي كل هم تـــزيله
شمعة وتذوب بحزن شفت العقيله
صعب يا كسر الكَلوب اشوفچ شمعة وتذوب
اتحملي يا ام الخدر يا بعد كل العمر
_
زينب::

باچر العاشر يصبّح منه ويلي
طول ابليلك علينه ها يليلي
واحد لواحد اودعه وما يجيلي
ماتظل اعيون عدي من عويلي
صبح باچر منايه واضل ابلايه رايه
باچر انصير ابعسر يا بعد كل العمر
____

أسالكم الدعاء رائد الاسدي





ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_ليلة الوداع ليلة العاشر بين السيدة زينب عليها السلام واحبابها


ليل الوداع اشسوة بينة شيبنة من اتوادعينة
واحد يودع الثاني شيبني حال اخواني
=============================
من اصــــعب ايام العمر ليلة وداع العاشر
ابخيمة الچبيرة اتجمعوا احبابي والكل حاضر
صار الحچي چلمة ودمع والجفن ضل مساهر
كل لحضة احسنها بسنة شاب الگلب والناضر
يا زينب ايصيحون كلهم احباب الگلب لا ما املهم
دلالي ضل يعاني شيبني حال اخواني
============================
فگد الولد يدمي الگلب ياعمة اوصي بأمي
واسيها من يلفي الخبر جسام طايح مدمي
امي الحنينة ام الوفة حنيها عمة بدمي
حلمي اموتن وي هلي وباچر أحقق حلمي
للخيمة باچر ما يزفوون باچر شهيد وتجري العيون
بعمي الابو وصاني شيبني حال اخواني
==========================
شمعت شبابي لو طفت عمة وتغمض عيني
يعينچ علي يا ام الصبر لو وصل صوت ونيني
مگطع اجي فوكَ المتن وخلفي الابو ايناديني
بعدك على الدنيا العفا مصابك علي ماذيني
تناديني امي ياضوة العين ويتجمعن كل النساويين
امگطع وصل تلگاني شيبني حال اخواني
==========================
اعله الخال ثلثين الولد كل الخلكَ تدريها
العباس خالي ومن اهد الحومة العب بيها
عون انة ابنچ بت علي ربات ايدچ تعرفيها
وي خالي باچر مقتلي روحي لخوالي افديها
وداعچ ييمة باچر ادموع گلبچ علية ايلوج مفجوع
موت الشرف ناداني شيبني حال اخواني
===========================
ميت على لساني الحچي بالگوة احچي حچاية
صح بالمعارك چن اسد لاچن حنين هواية
من هسة ميت من بدت زينب تودع الراية
تمشين من بعدي بيسر لا كافل ولا حماية
عنچ يزينب امشي بالجود مگطوعة من عباسچ ازنود
ويمچ رقية اتاني شيبني حال اخواني
=============================
ما مر على گلبي مثل لحضة وداعي لزينب
گامت صور باچر تمر فوكَ الهزل تتـــسلب
شميني واشتم ريحتچ ياخوية اجيت ابمطلب
صدري من اودعچ للحرب للخيل يصبح ملعب
باچر الخيل ابصدري ادوس واعله الرماح امعلگة الروس
حالچ يزيد احزاني شيبني حال اخواني
===========================
أسالكم الدعاء رائد الاسدي




ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_الكافل_عليه_السلام


دليني صوب المشرعه وانه اعتنيلك
وسوالف بگلبي اشكثر خويه اشتكيلك

دليني ياكافل
وينك يبو فاضل
اتلم. حيلك وتگصد الي لو انه اجيلك
-------------------------------------------------
دليني ياصوب النهر حتى انه اندل دربه
تيهت صوبك ياگمر وختك ولوهه الغربه
ارد اشتكيلك بالجره وحچيلك اعله الصعبه
يتجاسر اعليه الشمر عباس شاهد ضربه


اوصلك الصوب النهر وتشوف المتون
عگبك تولاني الهضم يابعد العيون

محد علي سائل
وينك يبو فاضل
اتلم. حيلك وتگصد الي لو انه اجيلك
---------------------------------------------------
من المخيم للنهر خويه المسافه ابعيده
والدرب بي خيل وزلم وشلون اطره اوحيده
كل خطوه اخطيهه اب علي عمر الهضم ماريده
الفاگد الراي واهل شيصح يكافل بيده


شيصح بديي وانته اليصح وتغرب اشلون
يالبيك ملزوم الخدر ياهيبة ام اعون

مودمعي دم سايل
وينك يبو فاضل
اتلم. حيلك وتگصد الي لو انه اجيلك
---------------------------------------------------
يالنايم وتنزف ضوه والسهم شابگ عينك
انزف نواضر عالدرب ملتني جلمت وينك
بكل صوط عيني اعله النهر بلكت ترد جفينك
عباس شبعوني هضم عطشانه خويه الزينك


خويه حرگ گلبي الشمر من گلي وينه
كفالج اعله المشرعه مطفيه عينه

يتشمت العاذل
وينك يبو فاضل
اتلم. حيلك وتگصد الي لو انه اجيلك
---------------------------------------------------
يالتمسح اثاري جنت وتخاف حيل اعليه
عگدوو اجفوفي بالحبل ولحره شو مسبيه
لو بيك باقي جم نفس عباس لحگ ليه
لا قدروو حرمت مره لا قدروو علويه


حرمه وحيده ابنص غرب وتخيل الحال
بذيالي ايتام ونسه وينك يكفال

يل عالنهر نازل
وينك يبو فاضل
اتلم. حيلك وتگصد الي لو انه اجيلك
-------------------------------------------------
ياكافل اهل الله صحت نسوان بالبر طشت
بالنار هجموو عالخيم زينب بقت تتلفت
نار ويتامه امجلبه خويه بعباتي ولهبت
احمي اليتامه امن الحرگ لو طفي روحي الشبت


نار ويتامه والحرگ ولهبت عباتي
احتار خويه ابمحنتي لو لم بناتي

گلبي قهر شايل
وينك يبو فاضل
اتلم. حيلك وتگصد الي لو انه اجيلك
---------------------------------------------------
علي سليم الحسناوي

#محرم_الحرام

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_للانصار_(دمعة)
لسان حال الامام الحسين ع يخاطب الانصار

أناديكــم و لا اســــمـع
جواب ايسَّكت المدمع
بچيتـــــلكم دمع غالــــــــي لفگـــــد غالي
و تعب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
رحتوا و راحـــــت انفاسي
كسرتوا ظهري و احساسي
طيحتكـم مثـــــل طيحت
راعــــــــي الكلفة عباسي

يعــــــز و حيل يجرحني انادي و مــــا تردون
يَمَـــــنْ چنتولي واحـدكــم شايلــــني بالعيون
يفرسان الصَفه اتـــنـــخه و لا چنـكم تسمعون
و تسمعون اطلب الناصر عجيبة و ما تفزعون

باساميكــم أون و الهَج
و جثثكم عالارض ترتَج
حِنيت و ضلـــــــــعي مَحني الكــم اگبالي
و تعب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
دمعـــــــتي صارت ابطـولي
دريتــــــوا بيـَّه گلـــــــــولي
بچيت اعليكـم لحــــــــدما
سيفي و درعـي ناحـــــولي

حتى العِمَّة البراسي لكســــرتي صَبَّت ادموع
و لا حاسبكم اصحابي چنت حاسبكم اضلوع
لو واحد وگع منكـــــم اركــض لجــله مفزوع
اشوفه يلوع و استشعـر گلــبي بداخلي يلوع

جمر دهـــري آيا ويلي
حِرَّگ بيكم خيم حيلي
قبل لا نارهم تسعـــــــــر عله اعيـــــــــالي
و تعب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
مثلكم عنده مِنْ مثلي
ماشيتوني چــــن ظِلي
لبستوا گلوبكم بالطف
فوگ دروعكـــم لجـلي

دوه جروحي و نظر عيني و نعم مـن عدكم انصار
ابــــوذر بيكـــــم أتفاخر و سلمــــــــــان أويه عمار
بســالة مالـــك الاشتـــر تجــــــــــــري بدمكم الحار
غِيـــرة سيـــوفكم تلمـــع مثــــــــــــل لمـــعة الفقار

كسرتوني أشـــــد كسرة
و فجعتوا فاطمة الزهرة
بوجهي الحسرة بانْت حـــــــــتى بخيالي
و تعب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
مـــن رحتـــــــــوا ياسبعيني
وِذَر لَمّـــــــيتها ابنيـــــــــني
الاكبر ياهـــــــــو مـن جاسم
بعـد مـــا فَـــــــــرزِنت عيني

ثگيل إبني علي و شفته من كثر السحگ خاف
اشيلن بيدي خاصـــرته يـــــوگع مني الاچتاف
ابساعة زفته القاســـم آجاله المــــــوت زَفَّاف
بعده بأول اسنينه و لَسَه كلــــــشي مــا شـاف

بدمــــع رمــلة تحنيله
و عله الاكبر عمت ليلة
عليهن دمعي مــــــــــاي و دم صفه يلالي
و تعب ميموني من هضمي و بچه لحالي
يالانصار. يالانصار
ـــــــــــــــــــــــــــــــــــــــــــــــــــ
عضيدي الهـــــــــزلي راياته
مــــا رد اعــله خيمـــــــــاته
تِاخَر و الهـــــــــوى العـــالي.
رد اعلـــينه ريــــــــشـــــاتـه

رحت صـوب الشريعة انزف فاگد روح الاحساس
شفتــها اعمامـــتي انسلبــــت لمــن طـــاح عباس
نعمة شلون تتگـــطـع كـــون اچفـــــــــوفه تنباس
واحدهن مثل صـــدري عليه بالحـــــــافر انداس

صرت يَمَّه ادگ و انحب
شگللها بعــــــــد زينــب
عَمود الخيمة من عامــــــــوده إجه ابالي
و تعب ميموني من هضمي و بچه لحالي
ـــــــــــــــــــــــــــــــــــــــــــــــــــ
و الاكلـــف عليَّ و اصعب
على اعيالي الخيم تنشب
و انه اعـــــله الرمح راسي
ابنيتي ارقـــــــية تتسلب

الحوافر نامت ابضلعي مــــــن نمتوا يالاصحاب
سلبـوا محــبسي امن ايدي و سلبوا مني الاثياب
لحيتي ابدمي خضـــبوها و رمل ترسوها و تراب
و زينب ركبــت الهَــزلة و حِدَّه ناگتها ســــــــلاب

بناتي فزعـــــن بهيمة
عليهن ما بقت خيمة
سنابك خيلـــهم سحگـــــــت عله اطفالي
و تعب ميموني من هضمي و بچه لحالي
ـــــــــــــــــــــــــــــــــــــــــــــــــــ
الحمدلله
#علي_حسين_الكناني

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_للخدمة


عاهدت رب الجلالة   اخدم المصـطفى والة
   انة وشعندي بنين   فدوة لتراب الحسين
عاهدت رب الجلالة
---------------------------------------------
خدمتي لحسـين تاج    وشرف ما مثــلة شرف
يرظة رب الكون عنـي   لخدمـتي هذا الهدف
بخدمتة اليخلص يحصل  مرتبة ما تنوصف
الهج بأسمة ونوح   ودمـعي مالحظة نشف
دمعي مابطل مسيلة  روحي افديهة قليلة
تروح كل العالميــن   فدوة لتراب الحسين
----------------------------------------

اليخلص بخدمت امامة  حسين ويوفي العهد
ينول بالدنية مكــانـة   ومنزلة وعز ومجد
اليقتدي بيه وطريقـة   يمشي بيه ومايرد
يسجل ويحسين اسمــة   يبقة خالد للابــد
اليحب يبقة مخـلد   يخدم الهادي محمد
ينادي بطول السنين  فدوة لتراب الحسين
------------------------------------------- 
يكَظي دور الدنية يبدي  دور برزخ والحساب
البچة اعلى حسين دمعة   لايفكـر بالعذاب
يحظر بساعة مماتة  ولو نزل تحت التراب
يلكَة كَبرة جنة صايـر   لاحـساب ولاعقاب
بسمة من الهج ونادي  بالحشر ينسر فؤادي
ما امل من الونيــن  فدوة لتراب الحسين
----------------------------------------------
كل شخص ياخذ نصيبـة  مـن عزاه القدمة
الناعي والرادود الهـم   مرتـــــــبة متقدمة
والكتب الهم قصيــدة  تكتب اسمة فاطمة
والحظر ودموعة سالت   لايخاف الـحطمة
والبذل مالة لجلهم     مايبعدة الباري عنهم
نبذل الغالي الثمين    فدوة لتراب الحسين
-------------------------------------------

سجلت يم الزچيــة    موقف وبيه افتــخر
باچر ابيوم القيامــة   ما احضر اي عذر
تطلع الزهرة الزچيـة    تلتقطني بالحــشر
ومن امر فوكَ الصراط  من ايدي تاخذني وتمر
تنادي ياربي اجبـــني      ارحم الي بچة على ابني
دومة ظل لجله حزين   فدوة لتـراب الحسين

-----------------------------------------------

أسألكم الدعاء رائد الاسدي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_للسيدة_العليلة عليها السلام


حن الگلب طاح الدمع اه يا هلي هم ننجمع
سهم الهجر نص الگلب صاباني
يهلي بجفاكم عاشرت احزاني
=========================
من اشتاكَ اصيحن ياهلي. ما وصل صوت صياحي
وكل ساعة اطيح وانتچي. واوگف واكض صفاحي
شــوكَ وسهر فگد الاهل. جفني من اهدهم صاحي
أصبح وامـــسي بدمعتي. وما گطع صوت نياحي
شصبر بعد مر الصبر ما ينحمل يهلي الهجر
هذا انه حالي من مشوا خلاني
يهلي بجفاكم عاشرت احزاني
=========================
اليفگدلة غالي اعله الگلب. ما يون ونة بهيدة
شلون اليفاركَ كل هلة. وسكنوا ابديرة بعيدة
عافوني خلاني ومشوا. علة وهجر و وحيدة
طبع اليفاركَ من يحن. غير الدمع ميفيـــدة
فگد التحبة اشگد صعب ما ينجبر كسر الگلب
اهوة الدمع صار الدمع يهواني
يهلي بجفاكم عاشرت احزاني
==========================
يومي بدموعي يبتدي. لو بدت تطلع شمسة
يغرد الطير من الصبح. چان ويون لي هسة
انشد وادور كل كــــتر. يا هلي منكم شنسة
بكل جانب اتذكر إثر. چنتوا لي زهرة أونسة
وياه اعيشن كل أثر لهلي بخيالي شگد صور
شنسة وذكرهم عايش ابوجداني
يهلي بجفاكم عاشرت احزاني
==========================
امشية عليك الله استچن. يا هوة وارحم حالي
لا تفــــــتح الباب ابچذب. وافرح اجاني الوالي
وتكثر ظنـــوني البالفكر. ومحظرة كلشي ابالي
بالگوة اوصل عتــــبتك. يالباب اشـــوفك خالي
خاب الرجا وخاب الأمل وأتمنى يلفيني الاجل
ما چنت اظنن لو رحت تنساني
يهلي بجفاكم عاشرت احزاني
==============≠===========
كل ساعة احسبها بسنة. وانة انتظركم يهلي
بگلبـي طلع شيب القهر. غيم وتشتت شملي
مشتاگة اشوفك انتظر. يابوية طارش ودلي
سودة الحياة ابلا ضوة. بالعمر بعدك شلي
شلي بحياتي ابلا ابو لا أمي يمي ولا اخو
وحيدة وعليلة والدمع يرعاني
يهلي بجفاكم عاشرت احزاني
===========================
أسألكم الدعاء رائد الاسدي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

1446 هـ
#قصيدة_لمحرم_الحرام

((يمه الاكبر))


رايح يضــــــي عيناي
وبگلبي تبچي اشواگ
ورگــــه بمهـب الريح
موتي ييمه افـــــراگ

جرح الحبيب بروحي اتعثر
ماكــــو شبيهك يمــه الاكبر
موتني نضره بعينك وأكــثر
رايـــح تــــگـــــلي شــــلون ..

حتى الغرام بگلبي أطشر
أترف جمال بهيبه ومنضر
يمه المدامع تمشي وتكبر
تعــــب التـــــعبته يهــون ..

علي .. يانفحه مالـت صبح
بــــــره المخيم ذبح
وداعك جرح والملح

علي .. بــــره المخـيم سهم
صيواني ترضا انهدم
مــــابيه أعـــاشر ألم

يبني يالاكبر يبني يالاكبر
"""""""""""""""""""""""""""""""""""''''''''''

بعيــــــنك تّلم الروح
وياخذني طولك وين
بوجهك لگيت هـواي
شفت الگمر وحسـين

مثــــل البـــراد تسير چنك
تفرح حياتي أبسمةّ سنـــك
موتي يجيني من أبعد عنك
عطشــــانه وأنتــــه المـــاي ..

كــــل امنياتي بنضرةّ عينك
يمه بصفنتي تعيش سنيـنك
بروحه يضمك صار حسينك
حــــــاچيــــني يـــــــاسلواي ..

علي .. ياســـيد المملكه
يافارس المعركه
مجندل زلم آفكه

علي .. بطولك تغازل سـمه
حبك سره وي الدمه
شايل عشگ فاطـمه

يبني يالاكبر يبني يالاكبر
"""""""""""""""""""""""""""""""""""''''''''''

هجرك جروح وموت
شد گلبي يبـني وياك
أزرعني رمح وســيف
وأترسني من طرواك

تمشي وترد ودور عيـــونك
فدوه غديت الدمع جفونك
رتبت جلاله اتشيل متـونك
شيـــــخ وابـــن معصـــــوم ..

شيخ ومضيفك صار الحومه
معزب يالاكبر طش علـــومه
خيام العده وصارت مهدومه
فـــــــارس وأبـــــــن جيدوم ..

علي .. سبحان رب المله
نور ومشه بكـربله
يا أحلا من الحله

علي .. گالو محمــد رجع
وخيبر بعد ونشلع
جيش أوقاره أنزع

يبني يالاكبر يبني يالاكبر
"""""""""""""""""""""""""""""""""""''''''''''

فراگ بدمعتي عليك
عايف حسرتي وليش
صحره بجفاك الروح
وحدك تگابل جيش

وحدك يسالب حـيل البيه
عيني بطريقك يبني أربـيه
من تمشي يعني آنه مسبيه
وحبـــل الچفـــــوف يصير ..

من تمشي يالاكــــبر أتعذب
لو شفتك بدمـك ومخضب
وبتراب الحومه يبني مترب
بــــس گــــلي عـــالتـــدبير ..

علي .. لتگلي مــــارد بعد
حزن بدليلي انولد
أنطيني يبني وعــد

علي .. مابيه اعيش الوهـم
رت القميص وأشـم
مو بيتي يبني انهدم

يبني يالاكبر يبني يالاكبر
"""""""""""""""""""""""""""""""""""''''''''''

عگبك شتات الحال
عگبك هـــزل وآلآم
عگبك سبـايه نروح
يوليدي لهل الــشام

ترضــا بدمعتي تنزل جمره
ترضا المخيم ينحب حسره
تالي متــــــالي اهلك أسره
ونـــــركب هــــــزيله بنوح ..

أركــــب هزيله وتدمع عيني
ياجرحي يبني وجرح سنيني
عايفني وأنــــته ألي تمشيني
بيــــدك دخــــذها الــــروح ..

علي .. ضهر الكلام انكسر
شحچيلك بيـا قهر
وين الربه والســهر

علي .. محــــنيه راح العــمر
مـــــني تبـــده الصبر
غيابك عصرني عصر

يبني يالاكبر يبني يالاكبر


عبد زينب
محمد الابراهيمي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

1446 هـ
#قصيدة_لمحرم_الحرام

((تترس الجود))


شحلاتك وانته رايح تترس الجود .. ابو فاضل
اگـــبالك حتى صار الجيش مگرود .. ابو فاضل

يبو متن الندي
يتشـبه والـــدي
اخوي ومسندي .. اخوي الكافل

اخوي وكافلي
يگايد محـملي
يريحانةّ عـــلي .. اخوي الكافل

من هاشم الحـد عبدالله ينخاكـ
بصوت الحيره گنالك علي وياكـ
جيــب الماي تسلم خـويه يمناكـ

ابو فاضل ...

"""""""""""""""""""""""""""""""""""''''''''''

شغلاتك وانته لازم عروةّ الماي .. ابو فاضل
يتسبيح الوفه يعذيبي وفياي .. ابو فاضل

عمود أمخيمي
يناموس وحَميّ
شجاع العلگمي .. اخوي الكافل

يخواض الحرب
ياصعب الصعب
يامــــاي الشرب .. اخوي الكافل

من طرف الخيام أگلوب وعيون
ملهــوفين تــدري وهـــل يتانون
اسمــــــك صار بحروف اليونون

ابو فاضل ...

"""""""""""""""""""""""""""""""""""''''''''''

شگواتك ياگلب وتلزمك ضلوع .. ابو فاضل
جاب الماي اخوي ودربه مگطوع .. ابو فاضل

كضيـت الگلب
مسدود الدرب
لا هســه يطب .. اخوي الكافل

والهســه بطـت
والچلمه غــفت
وروحي اتلوعت .. اخوي الكافل

راح حســـين غــاير والـــدمع لاح
ومن بعـيد اشوفه عـــالترب طاح
ورد مكسور ضهره وبالجرح صاح

ابو فاضل ...

"""""""""""""""""""""""""""""""""""''''''''''

وغلاتك رد اخوك وحاسر الراس .. ابو فاضل
وصاح بصوت زينب راح عباس .. ابو فاضل

ياجيـــشي انكسر
وايده اعله الضهر
عفته اعله النـــهر .. اخوي الكافل

لامـــن بمنته
ولامن يسرته
وكلــفه ونته .. اخوي الكافل

مصيـــــوب بعمد والــراس نصين
وهوه يگول فدوه الگلبــك حسين
المهم سالم وفدوه چفوفي والعين

ابو فاضل ...


عبد زينب
محمد الابراهيمي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_للسيدة_زينب عليها السلام

يالتدفن اخوتي ادفني وياهم
*** خلوني عليـــــلة عكَب عيناهم

كَلبي ينفطر من يـمر طرواهم

شلون انسة اخوتي وانسة ملگاهم

عباس الكَمر وحسين محلاهم

عالغبرة عفتهم سايل دماهم

عمة يا علي ادفني حذاهم

ما اكدر اروحن صعب فرگاعم

بوية ياعلي اعله الترب عفناهم

اعزاز اعله الكَلب مااكَدر انساهم

بنص كَلبي تظل للموت ذكراهم

وبيوم السبي يحظرون ردناهم

كل واحد مچان الدهر خلاهم

ما اكدر اباري كل يتاماهـــــــم

ناموا بالكبر والترب غطاهم

وسعلي الكبر ذولي اخوتي ماهم

*/**
أسالكم الدعاء رائد الاسدي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_لسيدي_ومولاي_العباس_
رباطات في شجاعة العباس

شال احوالة .. شال احوالة.. شال احوالة
حمل والجيش كلة شال احوالة
=====================
تارسة الهيمة .. تارسة الهيمة .. تارسة الهيمة
ادين وروس منهم تارسة الهيمة
====================
فوكَ عدوانة.. فوكَ عدوانة .. فوكَ عدوانة
مطر غيض ومراجل فوكَ عدوانة
=====================
ما يلاگونة .. ما يلاگونة.. ما يلاگونة
صعد دخان راسة ما يلاگونة
========================
مات من خوفة.. مات من خوفة.. مات من خوفة
التگابل وي سيفة مات من خوفة
========================
مايطخ راسة .... ما يطخ راسة.. مايطخ واسة
يطخ الكون كلة وما يطخ راسة
=======================
=======================

رباطات بعد مقتل العباس
======================
طاح بالحومة.. طاح بالحومة .. طاح بالحومة
عطش ويفور گلبة طاح بالحومة
======================
وما اطة بجودة.. وما اطة بجودة.. وما اطة بجودة
يسار يمين اطة وما اطة بجودة
======================
صايبة ابعينة.. صايبة ابعينة.. صايبة ابعينة
اسف سهم المنية صايبة ابعينة
=======================
طار الهامة .. طار الهامة .. طار الهامة
عمود الشوم ويلي طار الهامة
=======================
صاح يا خوية .. صاح يا خوية.. صاح يا خوية
لخوه حسين مرة صاح ياخوية
========================
========================

رباطات عن السيدة زينب عليها السلام بعد فقد العباس عليه السلام
=====================

حيل مالومة.. حيل مالومة.. حيل مالومة
يعباس انة اخيتك حيل مالومة
=====================
طاح كفالي.. طاح كفالي.. طاح كفالي..
عمود الخيمة طايح طاح كفالي
=======================
طايحة الراية.. طايحة الراية.. طايحة الراية
اصد صوب الشريعة طايحة الراية
=======================
متانية سكينة.. متانية سكينة.. متانية سكينة
على امية بخيمها متانية سكينة
=======================
راح ما جانة.. راح ما جانة... راح ما جانة
نريد الماي منة راح ما جانة
=====================

أسالكم الدعاء رائد الاسدي




ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_لقضاء_الحوائج وشفاء المرضى


سائل اجيتك يا حُـــسين العافية
خادم يدكَ بابك ابنيتة الصافية
يالتعرف ابنيتي حققلي امنيتي
__
يالعزيز اعله الله اسألك وانته باب الله الي
بجاهك العد الله اطلب وأسأل العالي العلي

تسمعني يا ابو اليمه ادري وجوابك رحمه
اسأل تشافي كل داي و كل مريض اتسلمه

يحسين اسألك وانته دمعة بعيني
مـــــن البلاء وكل مـــــرض تشفيـــني
احفظني لبيتي حققلي أُمنيتي
___
كل مـــرض يعحز العالم عنه ويحير العقل
شوية من تربتك يشفه وبالعلاج اشكَد سهل

حتى العلكَ ماينقاس من حظرتك يشفي الناس
شده اعله ايدك وانخاه بصادق النيه وإحساس

يالتستجاب ابكَبتك كل دعوه
يا ابو الشهامه والكــرم ومــروه
اشمرله چفيتي حققلي أُمنيتي
__
يوصل لاعلى المراتب الطب ويوكَف بعد
بس ابو السـجاد عنده مرتبه ما الهه حد

يدخل ضريحك معلول اعمى ولونه مشلول
حتى الخبيث اتشافيه صحه وسلامات اينول

آيا حُســــــين ابلهـفة لو كَلــــناها
ابحركَت كَلب من تطلع شمحلاها
سلملي عافيتي حققلي أُمنيتي
_
يم ظريحك لمن اوصل بيه اشمن ريحتك
ايـبلل الشـباچ دمعي يا حُســين امروتك

الزم ابشباچك حيل ودموعي عالخد تسيل
اتوسلك يا مولاي عدك يبو اليمه دخيل

عبدك واجيتك وانته تدري ابحالي
رايـــــد طلــــبتي يا حبيبي الغالي
بالشدة عوچيتي حققلي امنيتي
____
سر عجيب الي بحظرتك يختلف كلشي تحس
جنة الله ومـن تطبها بيها ترتاح النفس

يمك رفعت ايدية واطلب بصافي النية
ابدي بسلامي وادريه ايرد السلام اعلية

مــن عـندة ما اشــبع ولا املــــنه
امشي بطريقه وادري دربه الجنه
من عندة تربيتي حققلي امنيتي
__

أسالكم الدعاء رائد الاسدي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة وفاء الزهراء.. لأم البنين ..
………  الهجري المقطوع……
.
.
يالوفيه…
اليوم حـانت غـربتچ
جيت اشيع اجنازتچ
اجري دمعي العبرتچ .. يـ ام البنين
.
ـــــــــــــــــ ❁ ❁ ❁ ـــــــــــــــــ
.
حانت الليله وفـاتچ
             جيت اقـبل ادموعچ
يالهديتي أبني بالطف
              اربعه من اضلوعچ
فاطمه آنه اوجـروحي
              تعرف ابموضوعچ
مرتوي  ضلعي نواعـي
              من هظم ينبوعچ
.
بالمنيه……
صوتچ الما ينسـمع
يشرح آهات الدمع
مثلي گلبچ منشلع. .. يـ ام البنين
.

ـــــــــــــــــ ❁ ❁ ❁ ـــــــــــــــــ
.
ما أظن بالـدنيا يـوجد
                 أمـرأه ابمقـياسچ
من يمر ذكري اعله بالچ
                   تختنگ أنفاسچ
أشعر بأسمي يخالط
              دمعتچ واحساسچ
يـالنـبـع درچ بـطـوله
              ثمـرتـه حـراســـچ
.
يالبهيه… .
أنتي روح من السمه
حبـچ بگـلـبـي ارتـمه
محلى أسمچ فاطمه .. يـ ام البنين
.
ـــــــــــــــــ ❁ ❁ ❁ ـــــــــــــــــ
.
لسـه آثـار اعله گبـري
              الدمعـتـچ موجـوده
وابو فاضل لسه عنـدي
                 اثر طبع اخـدوده
عمـره يوم وشـم تربتي
                 الوگفته المريوده
وكل صباح اتخبّـريني
               كبرن ابنـي ازنوده
.
يالابيه ..
لومه دمعچ من وجد
ومـنـولد  هـذا  الولد
لثاري أنجـبتـي أسـد ..يـ ام البنين
.
ـــــــــــــــــ ❁ ❁ ❁ ـــــــــــــــــ
.
مـايكـفـي مـن اوفـي
               الـچ ضلعـي الــدامـي
ابني عفته ودم وريده
               وعفت چبده الظامي
الـتـراچـي ماشـلـتـهـن
               مـن رمــاد اخـيـامـي
شـلـت  چـفـيـن  الكـفـاله 
                   التـرجـمن آلآمـي
.
بالقيامه ..
اطـلب ابـثار الگـمـر
شلت چفه من النهر
بيا ذنب زنده انبـتـر  .. يـ ام البنين
.
ـــــــــــــــــ ❁ ❁ ❁ ـــــــــــــــــ
.
غمضت عينچ واعاين
               طفت عين اهلالي
نبـض گلبـچ   مـن تـوقـف 
                     انهـدم دلالـي
ابرحـيـلـچ يالحـنـينه
             بيـتي اصبح خالي
بعد يم العـتـبه ياهـو
             الغـربـتـي ينـعـالي
.
وآنه عندي …
ضلع مكسور وجرح
وگـبـر رايـد يتـضـح
وليل ينشد عن صبح…  يـ ام البنين
.
ـــــــــــــــــ ❁ ❁ ❁ ـــــــــــــــــ
.
الي اهدت دمها لجلي
             بيش اوفي ادماهه
صــرتي بضـعه انتي مني
                  وآنه بضعة طه
الفاتحه التـقـريها لجلي
               اليوم الچ اقراهه
وربي يگضي حاجة الي
               المهجـتچ اهداها
.
هالمسيه ..
العرش بيچ احتفه
يابحــر مـن الـوفـه
يلي كلـچ عـاطـفه ..  يـ ام البنين
.
.


حسن الموالي الفاطمي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة #گعديه .#اخلاقيه..#حسينيه
على طريقة
(مفروض عالناس حبك ياعلي)
.
.
أتعلم أخلاق ... ثورة كربله
وأخذ الدروس من الميامين .
.ياخادم حسين
.

مره دولاب النوايب
                   تشعر بحظنه يظمك
اخو عندك للمصايب
                   ينولد متجيبه أمك
يحطك بروحه وضميره
                حاير وكل همه همّك
.
چن عطش بيك ارتوه
بظلمتك يصبح ضوه
يستلذ شم الهوه ..  ابريّته لمن يشمك
.
عالدنيا ربحان .. من تلگه الأخو
واجملها تحضى بصاحب الدين ..
.ياخادم حسين
.
.
.
أشكر الباري بسجودك
                    لو لگيت اللي يريدك
صاحبك ذاك اللي تشعر
                   ينبض بأسمه وريدك
هواي فكر يلي رايد
             لأي سبب تخسر عضيدك
.
من بعد أي مشكله
اصفن وعاين إله
لحظه بيها اتخايله
           لمّن أيموت اعله أيدك
.
العمر فلسين ... مايسوه بعد
لو بي فگدت الصاحب الزين ...
.ياخادم حسين
.
.
.
بالغضب حبل الموده
                   بالك ابسرعه تگطعه
واليگصّدك بعتذاره
                   منكسر لا. لا. ترجعه
التعيش بريته شهگه
            تحچي گبلّ اللسانه دمعه
.
من يگول أنت جراحي
لا تگله اسود صباحي
قبله رد ابن الرياحي
         ينصر حسين ويتبعه
.
بس حرك اشفاه ... يتلمس عذر
ابن الزچيه حطه بالعين ....
ياخادم حسين
.
.
.
گلبك الطيب احفظه
                      وبالتكبر لا تنحره
يعلى شانك بالتواضع
               والخطى بحقك اعذره
تأمل وانظر إمامك
              ارتقى حتى اويه مُهره
.
من گله دلالي انفطر
ادري العطش يكسر ظهر
آنه ما ضوگ النهر.
           والعذب عينك تنظره
.
من ترتوي احشاك ... آنه ارتوي
اتعلم وأخذ البراهين ..
..ياخادم حسين
.
.
.
لو چنت مخطئ تعذر
                     وبالخطيئه لا تكابر
الجرحته اطلب سماحه
                 محتمل متشوفه باچر
ظهرك يظل محني لجله
                 لو سكن ارض المگابر
.
بقوس الوتر اذبح سهم
استعجل واعلن ندم
مد چفك وداوي الألم
          فعلك اتخلده المنابر

الصاحب الزين... هو اليعتذر
موش اليعيش وعنده وجهين...
.ياخادم حسين
.
.
آنه كل  فاگد أگله
                شما كثر نوحه وأنينه
بالمجالس خله يهدي
                   الهم العبره الحزينه
الغايب الزهره تسجله
                حاظر بدمعه الحنينه
.
يهديله عبره من الهظم
يتقاسم وياه اللطم
الطبره وي كسر العظم..
          شما حظر مجلس حسينه
.
مذبوح الانفاس ... نعرف مايرد
لكن تسجله ويه المعزين ...
.ياخادم حسين
.
.
حسن الموالي الفاطمي
.
.

.ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

#قصيدة_ليلة_الوحشة
لسان حال السيدة زينب ع تخاطب جسد الحسين ع

شتاگيتلك. بعــد الـــــوداع ابلحظات
حنيــــتلك. بس عطّــــــلنّي الخيمات
خوية جيتك بعد ما طفيتها
و اليتامة الضـــايعة لمّيتها
شتاگيتلك
ـــــــــــــــــــــــــــــــــــــــــــــــــــ
امن التلة نظرتك لمـــــــن اتنـازع
امن التلة اشوفــك للخـــيم راكع
امن التلة عيني لذبحــك اتــباوع

شما اناديلك چنــــــت و انته طريح
توگف و ترجع عله اســهامك تطيح
و چن اسمعك ردي لخيـامچ تصيح

رجعيلهن. عندچ ابنـــــــــيات ازغار
حاميلهن. مـن الحـــــــــوافر و النار
و انه خويه احچايتك سويتها
و اليــــتامة الضـــــايعة لميتها
شتاگيتلك
ـــــــــــــــــــــــــــــــــــــــــــــــــــ
رجعتلهن بناتـــك بيه مــــا بيه
رجعتلهن. عليك اضلوعي محنية
رجعتلهن رَجْعَت وحدة مسبية

للخيم رديت مـــا اعـــــــرف شگول
و يَمَّك اسمع گامــــــت ادگ الطبول
خوية داست فوگك و جتنه الخيول

لاخيامك. دمك وصل ويه الخيل
و ايتامك. شيلمها لــو صـار الليل
رغم تعبي خيـلهم رديتها
و اليتامة الضايعة لميتها
شتاگيتلك
ـــــــــــــــــــــــــــــــــــــــــــــــــــ
ورة أطفالك. ركضت ابكـل اراضي البَّر
ورة أطفالك. و ارد فحطــانة للخَــــــدَّر
ورة أطفالك. صرت سالــــــوفة للعسكر

حرمة بالخمسين عمري شرد اصير
و الركض ينــرادله حيــــــــل الزغير
اشتكي لعباسنه و كل كل ساع ادير

أذتـــــنــي أركض تعــاينلي ارجال
دم متــــني. من السياط اسود سال
ابچف عفافي اعيونهم سديتها
و اليتامة الضـــــــايعة لميـتها
شتاگيتلك
ـــــــــــــــــــــــــــــــــــــــــــــــــــ
أوصلت يمك. امن الدخـــــان مخنوگة
أوصلت يمك. چني خيــــــمة محروگة
أوصلت يمك. لگيتك جثة مسحــــوگة

شباقي منك هسه مـــن وين التگيك
وينه صدرك خوية اريد اشبگ عليك
هذا يا ظــــالم گطـــــــع خنصر اديك

شيكــــابر. گلبي الينظـــــرك ذابل
بالحــــافر. صدرك لظهــــرك نازل
دمعتي فوگ الجرح صبيتها
و اليتـامة الضـــايعة لميتها
اشتاگيتلك
ـــــــــــــــــــــــــــــــــــــــــــــــــــ
راح ارجع. و اردلك و انه عالناگة
راح ارجع. و اگلك خويه مشتاگة
راح ارجع. بعــدها ابراسك اتلاگة

نمشي باچر باليـــــــسر درب الطويل
خويه و اعله الناگة خل رمحك يميل
و اعله دم امتوني دمعاتك تسيل

ليلـــية. نگعد سوه خويه انوح
مسبية. و اتعاتبــــلها ابمذبوح
ونِّتي لدرب السبي ضميتها
و اليتامة الضـــايعة لميتها
شتاگيتلك
ـــــــــــــــــــــــــــــــــــــــــــــــــــ
الحمدلله
#علي_حسين_الكناني

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON