☀ منبريّون حسينيّون ☀

فكمن له من وراء : نخلة
فضربه على يمينه
فقطعها ..
...

لو طيٌح المريم رطب
ذاك الجذع لا مو عجب
بس العجيبه انتي
يا نَخْله من سكتْي
طيّحتي چف العباس !!
....
گبل مانبدي عتبنه
اختصار العتب كله
من عساچ بنار خيمه
وجمر سوط بمتن طفله
ليش ما هزتج زينب
والنِشد هذا اشيحمله
جذع طيًح رطب وانتي
شنو طيّحتي ينَخْله
يم جذعچ چفوفه لگت
لزمي الصمت لو عاتبت
بساعتها مانطقتي
يا نخله من سكتي
طيّحتي چف العباس
...
سكتي يالچان بكلامچ
اعز فزعه لاخو زينب
بدل ماينگطع چفه
من اديه عبد الله يشرب
وچان تدعيلج رقيه
مثلي عم ارزقها يارب
بس سكتّي وگلب اخته
عليچ يدعي گد تعذب
شتجاوبين ام المحن
ابن الطفيل المن كمن ؟
وعن يا غدر صمتي
يا نَخْله من سكتْي
طیْحتي چف العباس
....
انتي عمه وهيه عمه
بكلمه تتساون ظليمه
الله ينطيچ اخو ومنچ
ياخذه وتبقى الحريمه
شامخات المن خواتچ
من بعد هاي الهضيمه
كون كل نَخْله تحدّب
صلفه التظل مستقيمه
الّلايذ بسدچ كسر
ظهر الحسين بيا گمر
ومن عنده بيمن لذتي
يا نَخْله من سكتي
طيْحتي چف العباس
...
لا بقالچ تال لاظل
علگمي ومنه رويتي
ضاميه تموتين حتى
تنچوين بما جنيتي
للگطع ايد ابوفاضل
يالخفيتي من خفيتي
حطب تبقين بجهنم
وگّدوچ شما طفيتي
ضيفچ هدر نور الكمر
الله يضيّفچ بسقر
لهاي الضیافه ردتي
يا نَخْله من سكتْي
طيْحتي چف العباس
.....
راح ابوفاضل ينَخْله
يعني ابو السجاد ماظل
جايب رماد المخيم
لحظه والدخان يوصل
ولحظه وتسمعين زينب
من تجي تسولف بهالحل
المحبس الكم بس اليه
ردوا خنصر عنه اسأل
ولا خبر من عدهم يصح
كل البقى براس الرمح
اليا مصايب شفتي
يا نَخْله من سكتي
طيّحتي چف العباس

#علي #العابد #النجفي

ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON

گالتله يخويه وين الانفاس !
گاللها يزينب راح عباس
اويلاه يعباس :
اويلاه ..
ـــــــــــــــ
رجع بس يا رجع مو ذاك الحسين
بمشية محتضر سبّلها اليدين
حين الشافته يلطم على العين
اخته تلگته تلطم على الراس
اويلاه يعباس :
اويلاه ..
ـــــــــــــــ
مو ذاك الاخو ريشه بمهب ريح
من شافت اخوها يگوم ويطيح
طلعت يا بو فاضل زينب تصيح
توّه انطبر حيدر اي ينبراس
اويلاه يعباس :
اويلاه ..
ـــــــــــــــ
من گالتله بيش من الگمر جاي
گاللها يزينب ما اجه وياي
منچ مستحي چي بدو الماي
وخالي ما يرد الاخته الاحساس
اويلاه يعباس :
اويلاه ..
ـــــــــــــــ
اول مره دون عمامته يعود
حسين الرجع بيده الرايه والجود
طب الخيمته وطيّح العامود
يعني ما بقت للخيمه حراس
اويلاه يعباس :
اويلاه ..
ـــــــــــــــ
محني يصيح وينچ يم الاحزان
قلّت ببو فاضل حيلتي الان
كسر ظهري الزمان بفگد الاخوان
وبيه تشمّتت يا زينب الناس
اويلاه يعباس :
اويلاه ..
ـــــــــــــــ
على ضلوع الزچيه رجعت الباب
ويخويه بطبرته ردّوا المحراب
مو بس الحسن كل اهلي غياب
امسوا من مشه راعي النوماس
اويلاه يعباس :
اويلاه ..
ـــــــــــــــ
بجرح عينه منو يا بت علي يروف
گوديني يزينب بعد ما شوف
گطع بينه الزمان بگطع الچفوف
صدر راعي الحميه بحافر انداس
اويلاه يعباس :
اويلاه ..
ـــــــــــــــ
#علي #العابد #النجفي



ــــــــــــــــــــــــــــــــــــــــــــ
  
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON