🚩#باڵەانەی_جەمشێعر:
#مەولەویدەنگ :
#ٸارام_مستەوفیئەمجار سەخت تەرەن زامم جە جاران
چڵ مۮۆ دایم چون گەستەی ماران
هەر وە زۆر مەنۮەن رای ئامای نەفەس
تای ڕیشەی تاقەت شییەنم جە دەس
بڵێسەی فیراق سووچنان جەستەم
ناسۆرەن زامان گاز خەم بەستەم
دووی کەواو دڵ پۆشان سەرهەردان
زەرد کەردەن ڕوخسار پاییز دەردان
سەرسامەن عاڵەم یەکسەر جە ناڵەم
فەڵەک مۆرەی بەۮ شانا وە تاڵەم
مەینەت سەربەرزەن، شاۮیم زگارەن
ساقی! جامەکەت ئەمجار وە کارەن
بوەروە مەجلێس، لابەر پەردەی شەرم
وە دەورێ دیسان بەزمێ کەرمێ گەرم
تا موتریب وە ساز حەنجەرەی بێ گەرد
هۆردۆ مەقامێ دەوا کەرۆ دەرد
بەڵ ناکا نەی چی بەیۆ جە لاوە
وە مەقامەکەی قەقنەس ئاساوە
بەزمێمان جەم بۆ چۆن هەردە جاران
بنۆشین جامێ وە یاد یاران
هەر وە زۆر مەنۮەن نیم نەفەس باقی
پڕکەر جامەکەت، دەخیلم ساقی
ئەر ئازیز وەي تەور لێم کەرۆ ستەم
خەلاسیم نییەن ئەمجار خاتر جەم
عەرەق چون شەونم نیشتەن نە ڕووی گوڵ
تەڕ کەردەن تاتای توغرای سونبوڵ
جە قازان خەم دڵ کەردەن وە ئاو
وە تۆ ماچۆ مەگێروو گوڵاو
ئازیزم! گوڵاو بۆی خۆی کوڵم تۆن
ئەر بۆی تۆ نەبۆ بۆی گوڵاو جە کۆن؟
زەڕەی بۆی زوڵفت کەفتەن نە بەرزان
بۆی گوڵان کەردەن جە بەرزان هەرزان
ئازیز، وە مەرگت گەر ئینسافت بۆ
هەنی کافییەن بۆی زوڵفت پەی تۆ
ئیتر چ حاجەت وێت مەۮەی عەزاو
قەبووڵ کەری جەور مەگێری گوڵاو؟
#هونەر_و_ٸەدبیاتی_پێشڕو🚩 @adabiyate_pishro 🚩