بابلڪنار زیبا

#شعر_مازنی

دَس به دِعا بومبه که یار دَگِرده
بی صاب بَهی دِلِ قرار دَگردِه

دِروازه سر نیشتِمبه تالّی کِمبه
شه دِلّ خِش کِمبه تینار دَگرده

صدتا دَخیل دَوِسِمه دِلِ کَش
بونه مِنه سِقانِفار دَگردِه؟

نِخوامبه که ناخِشِ تَن داره یار
هرجا دَره مِوِسِه خار دَگِردِه

سازه زَمبه بوم و بِنه دِلِ وِس
شاید یاره قزل سِوار دَگِرده

یاد بَکرده مِره گِمبه دَرِکِه
اَقلاً خاطره شه مار دَگِرده

خوامبه که تیمِ جاره او دَوِندِم
مه بینجه کر دوشه بِرار دَگِرده

کمل کوفا بَیته تا کِندای بِن
بونه پَعییز چاربیدار دَگِرده؟

بِلین شعره دِلِه خِدره بکوشِم
ولکوم مه هفتِم بییِه زار دَگِرده


✍ #هادی_اکبری

💯 @babolkenareziba

#شعر_مازنی

تِه کارگر تی کارفرمای قِربون
تی جا صد جور وِ کِنده کایِ قِربون

تی سفره خالیه خِرِش نِدارنی
وِشنا بِتیم تیسا پِلایِ قِربون

پینه بَزّه پیرَن لِمبِر دَبِلقِس
تِه تنِ اون کهنه قِوایِ قِربون

صِوی سَری که اِفتاب در نِموئه
تیساپه تَجِنی تِه رایِ قِربون

تی مِز امروز سِره مِنزِل نَشونه
تی هشت سَر عائِله خِرایِ قِربون

تی دِتِر بی جِهاز کِنده عروسی
تی اصری دیمِ سر رِهایِ قِربون

ندارنی دل خِشی چکه بَزِنی
نَتوندی هاکِنی سِمایِ قِربون

هزارتا ناخِشی ره شِه وَر هایتی
هیچکِدوم نَوونه دِوایِ قِربون

تِره تنگی نفس آخر کِشِنه
کی دَره داره تی هِوایِ قِربون

گِمونِم مَلکِمیت هم نِنِه تی وَر
چه بَمیری بی سَر صِدایِ قِربون

تِه کارگر گِره دارنه تِنه کار
چه تی گِرِه نَوونه وایِ قِربون


✍ #هادی_اکبری

💯 @babolkenareziba

#شعر_مازنی


بِهار بِمو اِمارِه سر نَزوئه
چِل چِلا اَمِه مَلِه پر نَزوئه

نا اَتّا گرمِ وا اینوَر بَزوئه
نا هیچ کس اَمِه خِنِه در بَزوئه

هِوا چه بیض هاکِردِه ، سیئو بَیّه ؟
مِه دل خِدِه اَنگِشتِ کِلو بَیّه !

شِما خَوِر دارنّی مِه دلِه جا ؟
دونّی خالی هسّه مِه لَتِه لِتکا ؟

چِتی این دلِه دردِ وا هاکِنِم !
کِجِه من این سِفره رِه لا هاکِنِم !

وَنگِ رَس درِه من صدا هاکِنِم ؟
سیئو دلِه دردِ دِوا هاکِنِم ؟

وقتی ویمبِه من این همه بلا رِه !
ویمبِه که مَردِمِ رنگ زردا زارِه !

روز چاشت هَسّه ولی اَمِسّه تارِه
نَوِنِه بَئوتِن آخّه بِلارِه !

وِنِه همدیگِرِه صدا هاکِنیم
گوم بَکِردِه را رِه پیدا هاکِنیم

هرچّی هِنیشیم آ دِعا هاکِنیم
اَئی وِنِه فِکرِ فِردا هاکِنیم

گِنّه اَمِه زمین خِدِه طِلائه
بینج آ گِندِم دِکاریم که پِلائه

اگِه جانِ خِدا هارشِه اِمارِه
اَئی شیر کَفِنِه اَمِه پِلا رِه


✍ #علی_شهمیری

💯 @babolkenareziba

#شعر_مازنی

چِش را دَیّه بَرِسِه بِهارِ ما
اَمه گوش بَرِسِه بِلبِلِ نِوا

چه ناخَوِری سیئو بَیّه هِوا ؟
هم سِل سرهاکِردِ هم وارِشا وا

گرمِ خِنِه اَمِه لَمپا بِیّه سو
وارِشّه بیاردی تا کِندائه لو

نا روز معلوم هَسّه ناکه اَمِه شو
غِرصِه رِه هاکِردی اَمِسّه اَدُو

مَگه کم بِیّه اَمِه سرِ بِلا ؟
نا خِنِه باقی بِشتی نا لِکا لا ؟

مِن که نِشنُومبِه وَنگِ رَسِ صِدا
کی وِنِه این دردِه هاکِنِه دِوا ؟

نا تکلیف دارِمبی روز تا نِماشون
نا کارا کاسِبی نا که آب آ نون

نا که مرز معلوم هَسّه ناکه سامون
تا که وِنِه دَوّیم بی نام آ نِشون ؟

جانِ خِدا قادِر آ تِوانائی
تِه این دردِ بی درمونِ دِوائی

این بی سرا سامونی رِه پِنائی
تُو بَکِردِه دلِه وِسّه شِفائی


✍ #علی_شهمیری

💯 @babolkenareziba

#شعر_مازنی

شِلاب بَزّو اینجِه سِل سر هاکِردِه
مِردِم همه رِه در بِدر هاکِردِه

نا خِنِه باقیه نا لَتِه لِتکا
گِلِستونِ گُلِّ پَر پَر هاکِردِه

این سیئو ابر چه نَوُنِه کناری؟
چه توم نَوُنِه اَمه انتظاری؟

نرمِ وارِش شلاب بَیّه بَروشتِه
این دردآ غِرصِه اِماره بَکوشتِه

او خیابون دلِه روخِنِه بَیّه
اینتا بِلا اَی باز کِجه دَیّه؟

خِنِه کِلِه همه رِه او بَوِردِه
تیم نوج نَزِه تیمجار دلِه بَمِردِه

فکرِ آب آ نونا این همه بِلا
کی وِنِه این دردِ هاکِنِه دِوا؟

نا حامی دارمبِی نا که سرپِناه
کِمین گِدِر اتا دَس داشتِه صِدا ؟

الان بِهاره ما موقع کاره
چه او دَکِتِه اَمِه لِکا لا رِه ؟

جانِ خِدا تِه رحمتِ بِلاره
یعنی اینجوری رسمِ روزگاره ؟


✍ #علی_شهمیری

@@babolkenareziba

#شعر_مازنی:

نَمبه فارسی نَخِشه؛تِه شِه زِبون رِه یاد نکن
مازرونه وَچوئی؛مازندرونِ یاد نَکِن

هر کِجه دَری دَواش، خدا تِه پِشتی گِر بوشه
خَله بالا که شونی، شِه نردبونه یاد نَکِن

اون قدیما گتنه زن وَرنی، زنمارِ هارِش
گِل برار وچوئی، مشتی گَلونِ یاد نَکِن

هرکی کار داشته تِره مردِ واری جواب هاده
گَته مردی که بَئی خورده وچونِ یاد نَکِن

تِره نَمبه که دیگه شیرنی دانمارکی نَخِر
نوش جان بوه تره، تَندیرِ نونِ یاد نکن

تَش و تَندیر و هیمه مردم نون ره پَتِنه
اگه فِر دارنی اِسا هیمه کَرون ره یاد نکن

تِه دِتا جیف اگه مَشته، خانی چک پول بئیری
بانک سرمایه شونی اَتا قِرون یاد نکن

تِه که هر سال شونی مکه، خِرو خِش حاجی وونی
اتا وشنا ره بَدی بی آب و نونِ یاد نکن

خانی لَس لَس هِنیشی گپ بزنی شهر دِله
برج میلادِ بدی، شِه دَم زَنونِ یاد نکن

تِه اگر چاشت گِدِر، شومِ گِدِر خِرنی پِلا
شه پَلی شوپه گَرو بینجِ کَرونِ یاد نکن

اگه اینترنت پِشتی همه جا پیغوم دِنی
تلفن هِندلی و نامه رِسونِ یاد نکن

اتا گِل خانی بوری ییلاق او ره بخری
بوردی مه جان سوادکوه، کاکرونِ یاد نکن

ته فریزر اگه مشته، خانی کیوی بخری
اتا مردی که بیئِه ته باغبونِ یاد نکن

گنه اکسیرِ محبت، همه جا پیدا نَنِه
اُنس و اُلفت که دَره اَمه میونِ یاد نکن

اتا آدم که تِوِسه شعر مادری گِنه
مرسی مرسی باووتی، #خِنابدونِ یاد نکن

شعر:استاد #رحمت_الله_حسن_پور
💯 کانال رسمے بابلکنار
🆔 @BabolKenareZiba