اَئی ویمبِی تِلاونگِ صدا رِه
اَئی شیر کَفِنه اَمِه پِلا رِه
#غزل_تبری هیچ گِدِر روزّه اِتی شو نَدیمِه
کِلوارِه شِه دوشِ اَدُو نَدیمِه !
تَتِمی صبحِ صادق تا نِماشون
خسّه تنّه بی خِت آ خو نَدیمِه
داشتی نِداشتی شِه کم نَیّه ، امّا
ناخِشی رِه کِلو کِلو نَدیمِه
آسِمون سنگِ تریگ جِر هاکِرد بُو
زِمِسّونّه اِتی سیئو نَدیمِه
یا که بِهار اَتی دِر تِر بِمو بُو
شیرِ دار رِه خِشک هایتِه چو نَدیمِه !!
اگِه خِشکام بَیبُو کویرِ واری
زِلالِ چِشمه رِه بی او نَدیمِه
دومبِه بِلبِل گلِ را داری کِردِه
باغّه امّا بی بک آ بو نَدیمِه
نَدیمِه غِرصِه جا چِش او دَکِفِه
دلّه سینهِ کَش کَئو نَدیمِه
تاوِسّون که اُوتی تَش داشته هِوا
کوه رِه بدونِ وَرفِ سو ندیمِه !!
هِوا اگِه هرچّی غَضِب بَکِردبُو
اَندِه بِلا چِشِ جِلو نَدیمِه !!
نِداشتی سال آ ما سخت بِیّه ، امّا
روزگار رِه مِن پشت آ رو نَدیمِه
✍ #علی_شهمیری_سوادکوهی💯 @babolkenareziba
