خدر الفواطم لنشر القصائد الحسينية

#تراث موشح

الخيل يهل الخيل يا فرسانها
الحرب ساعه اوتشب نيرانهـا
ــــــــــــــــــــــــــــــــــــــ
الخيل يهل الخيل يا مردم الخيل
الحيل المن ينضخر منكم الحيل
هله هله تصيح بت حامي الدخيل
وعينها على الوجن كت جروانهـا
ــــــــــــــــــــــــــــــــــــــ
يا انصار حسين يا روس الحزم
بيكم وبسيوفكم يگوه العزم
بت علي ترضون ما بين الزلم
توكف وليهـا تصد عدوانها
ــــــــــــــــــــــــــــــــــــــ
يا انصار حسين يسباع الرجال
يا ليوث الحرب يا موت الأبطال
هاي زينب بت علي خير الأعمال
جاعده وتتناكم بصیوانها
ــــــــــــــــــــــــــــــــــــــ
يا أنصار حسين هاي أخت الحسين
زينب الما حصلت غير الونين
هاي زينب بت أمير المؤمنين
تحجي وياكم غدت بالسانها
ــــــــــــــــــــــــــــــــــــــ
يا أنصار حسين بت حيدر تگول
عالخيم خيل العده تحوم وتجول
والله يكرام العذر ماهو امقبول
منكم ولا اگول من خوانها
ــــــــــــــــــــــــــــــــــــــ
اشلون عن خدر الحرم تتعذرون
وغدت من عين الحرم تنبع عيون
لا وحك الله عليكم مايهون
الحرم تنضام يا وليانها
ــــــــــــــــــــــــــــــــــــــ
يا أنصار حسين يا ليوث الحرب
زين يصحاب الوفه عدكم كلب
تخلون الحرم بديار الغرب
خدّر وبعدت عليها اوطانها
ــــــــــــــــــــــــــــــــــــــ
لن حبيب يصيح ويهز صارمه
لا على بختج يبت حامي الحمه
اليوم دون الخدر نسبح بالدمه
ليوم اكر عيوج بميدانها
ــــــــــــــــــــــــــــــــــــــ
لا تخافين أيغدي عنج الخوف
والأنصار امجرّده بيض السيوف
اليوم يم الخدر خل عينج تشـوف
نسلب ارواح العده من ابدانها

الشاعر المرحوم
الحاج مُعين السباك

(180)
#اللهم_عجل_لوليك_الفرج

خدر الفواطم
لنشر القصائد الحسينية (@Alfoatm3)

#اللهم_عجل_لوليك_الفرج

#تراث

حميده اشما تشوف حسين ابو اليمه يجي يمـهـا
تـذكر عودهـا وتسيل دمعتهـا بوجـه عمهـا
ــــــــــــــــــــــــــــــــــــــ
حميـده مـن تشـوف حسـين عمهـا تـسـيـل دمعتهـا
وتـذكـر عـودهـا الـي جـان سـهـران علـى راحتهـا
وعمهـا مــن يشـاهـدهـا يصـوت ويـن عمتهـا

يزينب سكتي الطفله
عليهـا مبينه الذله
بلـچن بيچ تتسله

وبلچـن تـخـف ونتهـا وبـواچيهـا ويـخـف هـمهـا
ــــــــــــــــــــــــــــــــــــــ
تكلـه ابـيش اسـليها وهـي تبـجـي علـى والـدهـا
ودمعهـا بكثـر جروانـه يخويـه اثـر بـخــدهـا
يخويـه حسـين للكوفـه وي ابنـك علـي ودهـا

تـره علـى فـراك ابوهـا تمـوت
يخويه شـو تـون بسـكوت
وتجــري دموعهـا بـلا صــوت

خـل ابنك يخويـه بيـد والدهـا يســلمها
ــــــــــــــــــــــــــــــــــــــ
تغـير حال ابـو السـجاد علـى الطفلـه وابوجيهـا
وراد حسـين للطفلـة علـى الفركـه يسليها
بعون الله يحصـل طارش لوالــدهـا يوديهـا

بعـد لا تضـل ملهوفـه
لا بـد توصـل الكوفه
لاچـن عودهاتشوفه

يـولا جـرح والـدها يضـل كلســاع يلجمهـا
ــــــــــــــــــــــــــــــــــــــ
ضـلت واعله كـل طـارش حميـده عيونهـا تـربـي
وتجـري دموعها وتصيح علـى عـودي انخمـش كـلـبـي
إكــولـن يــوم المبــارك عليــه بـي يمن ربــي

وشوفن والدي بعـيني
وحـــاجي ويحـــاجيني
وكلـه لـيش ناسيني

مـن مثـلـك لعد بتـه حنانـه اشـلون يحرمهـا
ــــــــــــــــــــــــــــــــــــــ
تصـيح هنـا يعـمـي حسـين مـاجتي مـن ابـوي علـوم
عجـب لا خـبـر لا طـارش مـن يـوم المشـه لليـوم
يعمـي والدي وحـده وأخـافن يـغـدروه الگوم

وحده ولا أو خـو يـمـه
مـن اخوتـه ولا بـنـي عمـه
علـــــــی بختـــك لا يبواليمه

تعـرف بلـدت الكوفـة وتعـرف غـدر وادمهـا
ــــــــــــــــــــــــــــــــــــــ
ولـــــو ردت لعمتهـا تـرد ودموعهــا تجـــري
ابوهـا عـدل يـو مجتـول مـتحيره ومـا تـدري
تصيـح هـنـا يعـمـي ضـاك علـى فـراك الـولـي صـدري

اضـل برجـا يعـود النـه
يـولا اكطع الضنه
يعمه ايست منه

يعمه وجبدتي بفراك ابوي الدهر سمها
ــــــــــــــــــــــــــــــــــــــ
حميدة وزينب بهل حال ولن صوت ابو اليمه يصيح
حميدة وكامت الطفله وكلسا من هضمها اتطيح
ومن صدت لعد عمها ومن شافت ادموعه تسيح

صاحت يافخر غالب
عليمن هالدمع ساجب
يعمي والدي غايب

يعمي ودمعك اليجري بجبدي النار يضرمها
ــــــــــــــــــــــــــــــــــــــ
الي هاي الدهر ضمها وبعدني خايفه من البين
تهون مصيبتي بس كون يسلم راس عمي حسين
هاذي طلبتي من الله لاچن هاي تحصل وين

حميده جان رجواها
عمها حسين يرعاها
تالي الـــدهـــر خــلاهـا

يتيمة وعودها مسلم وعمها حسين يتمها

المرحوم الحاج مُعين السباك

#اللهم_عجل_لوليك_الفرج

خدر الفواطم
لنشر القصائد الحسينية (@Alfoatm3)

#اللهم_عجل_لوليك_الفرج

#تراث

سجادك يداحي الباب گوم اوعاين الحاله
من عگب اليسر سموه والسم مرد دلاله
ــــــــــــــــــــــــــــــــــــــ
ظل من عگب ابوه حسين ونه ايجر بثر ونه
ابعينه الماي لو شافه يهل دمعه اويصد عنه
يگول اشلون اضوگ الماي وحسين انحرم منه

مارحموه عدوانه
واهل بيته اورضعانه
كلها انفنت عطشانه

ظلو جثث بالحومه اوداستهم الخياله
ــــــــــــــــــــــــــــــــــــــ
كلما يذكر المظلوم تسحب دمعة اعيونه
ليل انهار مايهجع اومن حزنه انخطف لونه
گامت تعتني الشيعه اوعلى حزنه يلومونه

يگلوله ارحم احوالك
حزنك مرد دلالك
ياهو اليظل لعيالك

وانته السلف تاليه اوبدر الدين وهلاله
ــــــــــــــــــــــــــــــــــــــ
ابحسره ظعن عن دنياه امن امته جدك الهادي
اوجدك حيدر الكرار راح ابسيف المرادي
اومك گضت مظلومه اومن اضلوعها اتنادي

اوعمك غيث وفاده
السم مرد افاده
الچتل الكم صبح عاده

وبهاالشرف باري الكون خص المصطفه او آله
ــــــــــــــــــــــــــــــــــــــ
لمن سمع ناداهم اونار الحزن وگاده
يگلهم مثل متگولون صار النه الچتل عاده
لاچن ياهو من عدكم گبل سامع امن اجداده

منه اتسلبت نسوان
اوطافو بيهن البلدان
اومن عدها احترگ صيوان

اوشافن راس واليهن عدوه اعلى الرمح شاله
ــــــــــــــــــــــــــــــــــــــ
عيني ماتصد ليهن واشوفن زينب اگبالي
الا اذكر هضيمتها واذكر لوعة اطفالي
يهل الوادم تلوموني امن اتلف بالحزن حالي

شفت الشام بعيوني
والسلسله اعلى امتوني
واهاليها يشتموني

اورحنه ومجلس الطاغي اوخواتي وگفن گباله
ــــــــــــــــــــــــــــــــــــــ
يتمايل طرب شفته ومن الفرح يتثنه
ويعاين لعد زينب اوزينب تجذب الونه
يمه راس ابوي احسين وبناته يشوفنه

ابعود ايجلب اشفافه
اوباري الكون ماخافه
يهتف فرح بسلافه

والباري نكر وحيه وبالميعاد ما باله
ــــــــــــــــــــــــــــــــــــــ
يحيدر تم عليه هل حال يتكاثر عليه همه
حسره ايجر بثر حسره ويون اعلى ابو اليمه
حتى احرب عدوه اعليه ياحامي الحمه اوسم

خلا يلوج او چبدته ممروده
اوحصل عدوه ابچتلته مگصوده
يتم الباقر ياعلي من عوده
خلاه تجري دمعته اعله اخدوده
ــــــــــــــــــــــــــــــــــــــ
گام اوغسله الباقر واشاف الاثر بمتونه
حن گلبه اوصفگ بيده اوسالت دمعة اعيونه
يگله ياذنب عامل اوحالك مايرحمونه

لسا يبويه امخزنات اجروحك
فوگ النوايب والهظيمه اونوحك
الله يساعد عالمصايب روحك
ــــــــــــــــــــــــــــــــــــــ
وشاله ونزله بگبره اودمع العين يتجاره
اوتمت تنحب الفركاه عياله اوتصرخ ابداره
مامست مسيته اعليه الا ابگبره يتواره

وحسين ظل ابكربلا اثلث تيام
تلعب عليه اخيول ذيج الظلام
ماحصل واحد من جميع الاسلام

يحفرله گبره ابيده او يسكن روعة اطفاله


السيد المرحوم
عبد الحسين الشرع

#اللهم_عجل_لوليك_الفرج

#تراث

أدور عليك يبن امي ولا واحد يدليني
عاد أنته بضعيف الصوت يامظلوم حاجيني
ــــــــــــــــــــــــــــــــــــــ
جيتك من قلب مكسور أنه أختك المهضومه
جيت بروح لهفانه أدور عليك بالحومه
جيتك خويه حاجيني عليك أمك المظلومه

وين بيا كتر مطروح
جسمك هم بعد بي روح
يبن أمي صدك مذبوح

وين الي ينظر لحالي ويم جسمك يوديني
ــــــــــــــــــــــــــــــــــــــ
صدك نايم على التربان خويه وعلوجه مقلوب
صدك سحكت عليك الخيل بالميدان من كل صوب
صدك خويه نزف دمك وگلبك بالسهم مصيوب

ولـمـن ياصـبي العين
طلعت السهم يحسين
مـن كلبك طلع ثلثين

وهذا السهم هو الحال ما بينك وما بيني
ــــــــــــــــــــــــــــــــــــــ
حر وعطش وبجسمك ألف وتسعمية صواب
فوك جروحك ودمك گلبك بالسـهم ينصاب
بعد شلون تتمكن تنهضلي وترد جواب

وأدري ياضوه عيناي
لو ما هل المصايب هاي
متقصر يخويه وياي

وحاشاك بمثل هاليوم محتاره تخليني
ــــــــــــــــــــــــــــــــــــــ
حالك هذا وأنته أنوب خويه أسمع بعد حالي
بأيتام وحـرم كـلــــبي تمحن وأنشده بالي
وين أنطي الوجه وانه أخوتي مذبحه أكبالي

وكلسا طفل من عندي
يروح وينفطر جبدي
وأنه بكربله وحدي

صواويني خذتها النار والعيله وصواويني
ــــــــــــــــــــــــــــــــــــــ
هجمت فرد هجمه الخيل خويه وشبت النيران
وهامت عيلتك كلها من النيران للميدان
لجن ياضوه عيوني ضلت بالخيم رضعان

وأنه تمحنت بيها
شلون النار أطب ليها
وأخلصها يواليها

رضعانك بوسط النار وانه العده مسلبيني
ــــــــــــــــــــــــــــــــــــــ
خويه محيره ضليت وأتلفت يمين يسار
أعوف الخيم رضعانك تتحرگ صغار كبار
أطب للنار أخلصها أخاف أنه أحترگ بالنار

والأيتام ملتمه
هاي تصيح ياعمه
وين حسين ابو اليمه

وهاي تصيح يازينب حر العطش ماذيني
ــــــــــــــــــــــــــــــــــــــ
رضعن بوسط نيران وأيتام بحوافر خيل
ماتت بالسحك وعيال مامت والدموع تسيل
وأنه وحيده مظلومه بيه بعد ماضل حيل

وعباس الاجيت وياه
هسه من كمت أنخاه
أضن كلي يزينب أه

عليج شبيدي يعيوني يزينب وين جفيني
ــــــــــــــــــــــــــــــــــــــ
خذاك الدهر من عندي يخويه وأكَطعت بيه
مصايب كربله يحسين مدري أمنين أجت ليه
من الخدر والصيوان تــالــيه لــبـني أميه

هيجي الدهر خلاني
وضيم وهضم راواني
صرت من عكب ولياني

أرد السوط بيساري وأستر وجهي بيميني
ــــــــــــــــــــــــــــــــــــــ
ها شتكول يبن أمي ردلي بصوتك أجوابي
تقبل بعد أشكيلك هضمي وجمرة امصابي
أنته بالسهم مصيوب وانه فراكك أصوابي

أنته بروحك بجسمك
وانه مجرحه بهضمك
يخويه خلي اجي يمك

أداوي جسمك بروحي وانته بشوفتك داويني
ــــــــــــــــــــــــــــــــــــــ
يخويه ان جان ماعندك هـمــه تكوم لعيالك
لاتهتم ياماي الـعين أنه خلافك بدالك
أحمي عـيلتك أنه يخويه واحرس أطفالك

لجن يحسين أخاف أعليك
ضامي ومحد يرويك
خلي أعتني وأگصد ليك

أقدم ألك ماي العين وأشرب يابعد عيني


الشيخ هادي القصاب

#اللهم_عجل_لوليك_الفرج

#تراث

زينب هالمسية اتصيح وين المرتضه وينه
عدنه مابگت وليان ماتنهض تحامينه
ــــــــــــــــــــــــــــــــــــــ
انته البلضنك مندوب وانته التحضر الشدات
وانته اتأمن الخايف امن الودام يبو الحملات
ماتسمعت عتب زينب تصيح اوتسچب العبرات

وينك ياعلي وينك
انهض واطلب ابدينك
ذبحوا ياعلي احسينك

اوسلبوا حلل نسوانه اوحرگو كل صواوينه
ــــــــــــــــــــــــــــــــــــــ
گبرك ياعلي يلمك وعيونك الليله اتنام
وابناتك صايره ابشده واعليهن دايره الظلام
من چلچل عليها الليل زينب لمت الايتام

فگدت من يتامه احسين
طفله اوجرت منها العين
طلعت تصفچ الچفين

واتدور على الطفله بالوادي اوميادينه
ــــــــــــــــــــــــــــــــــــــ
شافت من بعد فارس لعد صوب الخيم يجبل
گامت زينب اتنشده اومنها الگلب متوجل
يفارس ماشفت طفله اومنها الدمع گام ايهل

كاللها سمعت اونين
يزينب بالمعاره الحين
روحي الجسم اخوچ حسين

اظن اهناك تلگيها والفارس جرت عينه
ــــــــــــــــــــــــــــــــــــــ
من سمعت حچي الخيال زينب راحت ابهمه
تصيح ابصوت وين انتي يبعد الروح ياعمه
سمعت من بعد ونه اووحده اتحاچي ابو اليمه

تگله بعدت اخيمي
اولحد من هلي يمي
اريد اسدر لعد امي

ماتنهض توديني لعد امي يبو اسكينه
ــــــــــــــــــــــــــــــــــــــ
يبويه اظلم عليه الليل اومن خوفي انخطف لوني
واهلي صارو بعيدين ماضن بعد يلفوني
ركضت زينب اوصاحت لتخافين يعيوني

گامت شبگت اعليها
اوتلوذ من الوجل بيها
اوعمتها تحاجيها

يعمه اشوصلج لهنا واندور تخلينه
ــــــــــــــــــــــــــــــــــــــ
تگلها الخيل من هجمت (اوعودي) حرگو اخيمه
اعلى وجهي من الخيم فريت من الخوف ياعمه
اجيت الگيت ابوي حسين نايم وگعدت يمه

يعمه وجن عليه الليل
وانشبني الوجل والويل
من اسمع صهيل الخيل

ألوذ ابكتر ابوي حسين واتوسد على ايمينه
ــــــــــــــــــــــــــــــــــــــــــــــ
يويلي زينب ابيا حال صارت حين سمعتها
لزمت ايدها ابچفها او لعند الخيم جابتها
گامت تصرخ العيله عليها حين شافتها

غدن يتزودن منها
او يحبنها ويشمنها
بطل حيلي او ينشدنها

عنه اليا كتر رحتي اونبچي اعليچ ضلينه

المرحوم السيد
عبد الحسين الشرع


#اللهم_عجل_لوليك_الفرج

#تراث

زينب شــافــت الميمون مجبل والگلـب فرفر
صاحت وين اخوي حسين عنك وگع وتگنطر
ــــــــــــــــــــــــــــــــــــــ
يمهر احسين سولفلي اشعندك جايني ابهمه
عنــك مايله العــده اوخــالــي من ابـو اليمه
عليمن هالــزلــم والخــيــل بالميـدان ملتمه

اسمع بالمعــاره اصيــاح
بالكــــون المبشر صــاح
خاف حسين منك طاح

وتولوه عدوانهاو دار اعليه عالعكسر
ــــــــــــــــــــــــــــــــــــــ
مالك دمعتك تجري واشــوفك جايني مهتم
تــدگ ابــحــافــرك يمي او تتـفــكــر للمخيم
من سرجك يسيل الدم كلي منين اجاك الدم

گامــت تخمش الخـدين
هـــلـدم ماتـگـلـي امنين
خافن دم اخوي احسين

گام اعليه يتجاره او منه انصبغ واتغير
ــــــــــــــــــــــــــــــــــــــ
يمكــدر مـا تحــاچينــي مالك دمعتك تهمل
شابح للخيــم بالعين بيها اتحشم او تصهل
تريد امن الخيم واحد عليك يلوح ويصول

ماتـــم بالخــيــم رجــال
تمت بس حــرم وطفـال
بس واحد بگه ابيا حال

جسمه امن المرض ناحل اوكلها يهم مايگدر
ــــــــــــــــــــــــــــــــــــــ
اخذني وياك يا ميمون وعلى احسين دليني
ابعيني ارد اشــوفنـه لخيي من عمــت عيني
بلچن بي بعد ظنه اويگوم الوالي ايحاچيني

راحـــت للمعــاره اويا
تحشم بالولي او تنخا
عــايــن زينــب ابعينا

أومه ابيمنته لخته لوليها گام يتفكر
ــــــــــــــــــــــــــــــــــــــ
ناداها ابضعيف الصوت يختي ليش اجيتيني
ردي الخيمـتــچ يختي او ويه اعــداي خليني
أريدن شــربة اميه تــراني العــطــش ماذيني

والله انمــرد دلالــي
والحر غير احــوالي
ردي اوباري اطفالي

أخافن تهجم العدوان ومن الخوف تتذعر
ــــــــــــــــــــــــــــــــــــــ
تگله اشلــون ارد عنك وعــوفنك يبعد الــروح
وانته تشخب اجروحك وبحر الشمس مطروح
خليني اتم يمــك يبعــد اهــلــي وجيم النــوح

يخــويه ارد اودعنك
واشبع يا الوالي منك
ادري بــس ارد عنـك

اصير ابولية العدوان يامظلومه واتسير
ــــــــــــــــــــــــــــــــــــــ
يا تالي هلي يحسين گلي اشلــون بطفالك
ماتگدر على افراگك او كلها امدلله ابجالك
عالهزل يماي العين ياهــو ايــرچب اعيالك

اوياهــو اللي يبـاريها
الحــادي لو كطع بيها
يخوي اسمع بواچيها

يهد الحيل يبن امي او منه الصخر يتفسر

المرحوم السيد
عبد الحسين الشرع

#اللهم_عجل_لوليك_الفرج