𓆩 qamari 𓆪

وَعَلَى الرَّحَائِلِ نِسْوَةٌ عَرَبِيَّةٌ
يَخْدَعْنَ لُبَّ الْحَازِمِ الْيَقْظَانِ

أَغْوَيْنَنِي فَتَبِعْتُ شَيْطَانَ الْهَوَى
إِنَّ النِّسَاءَ حَبَائِلُ الشَّيْطَانِ

مَا كُنْتُ أَعْلَمُ قَبْلَ بَادِرَةِ النَّوَى
أَنَّ الأُسُودَ فَرَائِسُ الْغِزْلانِ..

#البارودي

مثل وجه الصبح مابيه شي مكروه،
بس المشكله الماصفوا النيه..

بطن هاون صرت ماضكت غير الدوس،
وبس الناعم الناعم لكوا بيه..

عشت ريه نضيفه بنص بشر دخان،
ضلمه وجوههم واني ابن گمريه..

شفت المستحه رمله بضهر صحراء،
وشفت العيب بأذن الناس ترجيه..


#مالك_السلطاني

بعد ان سرقت الشمس السوداء هلال عيدي،
جائني ذاك الهلال سائلاً..
كم من الجروح زرعت فيك؟
فأجبتهُ،

خلهن مو وكتهن خاطر احجيهن،
يجيني الليل واكعد وانفرد بيهن..
وافتح بابهن فتحة جناح الطير..
واراويك الجروح المامراويهن..

من كتلك ادعيلي جروح گلبي كبار،
اتذكر كلتلي الله يخليهن..

ولاتنشدني عنهن كلشي مابيهن،
حمر من نار هجرك والسهر باليل..
بس انت العيونك ماادري شبيهن..

الك برزخ صور بين الجفن والعين،
اصفى من النوايا النشترك بيهن..

جي ادري الصور تتشوه من الماي،
جفيت عيوني لا يتبدن عليهن.


#عباس_العبادي

خِلّك ماصرت لوما خليلي تصير،
وصرت خِلي برضاتك جي صرت خِلّك..

علمتك عليه من الالف للياء،
تغلط بالاجابه واني اعدلك..

حرثت لخاطرك بالروح مثل الكاع،
بوسات وورد كل عمري اشتلّك..

#جبار_رشيد

دافيه مثل البحيره..
وحاره مثل الرصاص..
هيج أعرفچ دنيا مابيها سكون..
عيون لبوه وصوت كاس..
هيج اعرفچ سجن وردي..
ومنفى مامنه خلاص..
دنيا مابيها سكون..
مثل خلخال أبدويه..
والأبل ركَصت على صوت الأجراس
ومن كثر مابيچ لهفه..
وعافيه ولذة وحماس..
ما أشوفچ يمي وحده..
صرت أشوفچ يمي ناس..

#الكاطع

مِا حَيلة الرّامي أذا ألتَقت العِدا
أٓرادَ رمِي السهم فِأنقَطع الُوتِر

قطعين ذباني زماني بدار قطعين
وابد مايوم خنت الولف قطعين
گابلت العدو وبالوتر قطعين
وكسر بالكوز وصوابين بيه

#سمير_صبيح

مادام الضفيره التمت بشوگ،
يفك حلكه المشط فنه ويعاند..

تعال وياي نوكف بين العيون،
مثل ماتوكف متون المصايد..

حطني لكل تعب تلكاني شراي،
اني وياك لـأيام الشدايد..

عدنه ركاب شالت دم السيوف،
ما عدنه ركب شالت كلايد..

(واضح كلشي بيه منين متشوف،
نيتي وياك عنوان الجرايد).

#سجاد_عادل

ما مرتاح …
عيوني تستحي بس الدموع وكاح..

ما مرتاح …
منك ، مني ، من العدل ، من المات
من الجاي ، من الراح

عركة ويه الزمن ورجعنه مكسورين..
وبعيده المسافة وينسي الي طاح..

ما مرتاح …

لان شفت الشمس نزلت
تبوس الگاع وبچف النذل تنلاح..

ولان قاضي البلابل مدد التوقيف..
ومفتوحة السما والفيل عنده جناح.

ما مرتاح …

لان قفل المحبة نباگ..
وترهم عليه مفتاح..

ما مرتاح …

متروك بجزيرة وتهيت بالليل..
واجوا ربعي عليه بقافلة اشباح..

وانت شبيك..!
لمن دافعت عن روحي صابك غيظ..
مو حتى الگنافذ من تحس بالخوف..
تستخدم جلدها سلاح..

ما مرتاح .. من ربعي ولا مرتاح
تمساح بنهرهم صاحوا من الخوف..
وجازفت بحياتي من سمعت صياح..
صارعت المنيه وهزني بيده الموت..
ومدمى طلعت، صفگوا للتمساح ..

كل هذا وتريد ارتاح..؟
ما مرتاح ..

#الكاطع

كرهوني وكلتلهم احبها،
ضربوني وكلتلهم حيل..
بالشارع طردوني اخواني وصلبوني على اشباب التيل..
محد يسمع ضحك السجه..
من تدغدغها جدام الريل..
احتركت مو حباً بالكهوه،
عمي الدله تحب الهيل..
يا ام كلثوم منين الكالج،
داخل حسن يطفي الويل..
ضميني بشعرج شكاله،
اهلي يخافون من الليل..

#احمد_المطوري

كُلي كلشي ولا تكلي تحبني ليش،
انت تدري عيونك مسويتلي واهس حتى اعيش..
انت تدري خدودك اترف من شكو بالدنيا ريش..
انت تدري بـلون شعرك على لون الليل طاغي..
انت تدري الاورده المتفرعه بيدك كلها متفرعه بدماغي..
انت عندك علم برموشك يضحكن..
تدري بيهن بالخجل مرات يحجن..

انت ماعندك علم بيهن هذني،
انت لو تدري بهذني..
غازلت روحك غزل حتى احلى مني.

#مرتضى_مطشر

ردت ادخل واحاجيها،
وشفت اخر رساله شلون جان الرد..
رد يشبه سواد الليل،
شلون عيونها واسود..
رد بارد مخيف هواي..
مثل ثلاجة الموتى وبعد ابرد..

بيش احلفلك،
وهذا السهر شاهد..
عمر خلصته احبك من طرف واحد..
مثل الحارس افتر من يجي الليل،
هلي ينامون كلهم واني اضل كاعد..

#عادل_العبادي

اشيلك من خيالي،
بطيفي اشوفك جاي..
انهي وياك شوگي،
سوالفك تبدي..
اقرر نبتعد ترجع ترد وياي..
معيشني بقلق جنك مرض مُعدي..

#ميثم_المياحي

منا دربي جان وصار مناك
علمودك يالـتمن وشفاد منّاك
مدري شمالني ماجزت منك
يبويه والله كتله من ايدي بيه.

#سمير_الكناني

كون كل شارع اشوفك،
جا كضيت العمر امشي..

وكون اكابل مره وجهك،
الا اعميهن..اذا ينطبك رمشي..

مو مجرد صدفه انت،
ولا محطه ويمها اكعد واستراح..

انت كلشي🤎..

#جبار_رشيد

منو مثلي الثلج امّنه بجف الصيف،
وكله يدير باله تلوحه الحروره..

"ومنو مثلي على نيته شلون طير الهور،
اجه بلهفه وحنين وما حظه بهوره"..

ومنو مثلي سكت شاف الزرع مبيوك،
ودره البوكات كلها ببيت ناطوره ..

ولو .. روحي بنفسها تريد كلشي تكول،
اعض شفتي واكلها الكاع محظوره ..

على بختج يروحي مالي حيل الروج،
وشراعي تعب والدفه مكسوره..

و ولا ساحل بقى وادري الصخر ميطوف،
حتى اتعب وادور صخره مشموره..

وعتبنه على الصبر يا روحي مو عالعين،
إذا ميصير سد الدمعه معذوره.

#سمير_صبيح

شو اشوفك ما تحن وانت الحنين،
يصير گلبك من صبغ حنيته..

عمي بطل لا تسولف للسنين،
وانه حبل مواصلك جريته..

يالتعمر البيت لاتبني على طين،
والتعمد ما يعمر بيته..

ولاتدور الطيب واللايم جزاك،
ضل يدور طيبكم جا وينه..

من اشتهيتك يوم والساني لكاك،
بغير ملحه ورودكم للزينه..
عاد باعك ضامري وما رد شراك..
وسلمك لايد الزمن وسنينه.

#صاحب_الضويري

بطيف افكدني،بطاري،بسالفه،بغنوه،
تعال افكدني اني اسوه..

ولك وينك،
تره تسوه مراسيلي..
تاخذ من وكت عينك..

انت جبير عندي وحقي من ابجي
على عيونك اذا ينجاب طرواها..
واني عاذرها لعيوني..
من تعوفني وبوجهك الكاها..


#باهر_الجنديل

على شوگي،
ونفس جفني اليتانيك..
احن وللزعل ما منطي لزمه..

بموعد جيتك كون اندل الميل
اسطي على الدقايق حتى اقدمه

اني مناطرك نظرة غصن جان..
اخضر بس قبلت تعوفه يضمه

بررلي سبب عطري البلا روح
وليش الشمس تطلع بيها عتمه

حرت وجهك اليتراوالي مرات
واقع لو لإن مشتاگ ارسمه

اخر نظره صوغه تضل بالعيون
حد اليگضي شوفه وعينه تعمه

وعلى مهلة رجعتك كمت احشمه

ربك باقيات شچم سنه وياي
عزلت لشوفتك ونطيته سهمه

رحت بس اني ما راضيلك تروح
ضعف موقف وگفتك ردت احسمه

حرت من وادعتني اتشاهد اشتاگ
حروف الموادع چانت ازمه

بديك الخاليات شماخذ وياك
بس هذا البُعدك ردت افهمه

اذا ريتي بعدها وياي چا ليش
ما تقبل تفوت بصدري نسمه

لا يكمل بعد حلم البلياك
ولا گلبي اليريدك يرضى اهدمه

كل ظني چنت بيك الضوه يعيش
فاتتني الصبح ما تبقى نجمه

مو ما فاهمك بس اني معذور
كدام امنياتي السر اكتمه

تجرحني واشوفك بس ابريك
واوصيك استغل جروحي غشمه

وحقّك ما استاهل روحتك هاي
ومو اني التخلي بگلبه لچمه

عساك ولا شفتها اوصافها شلون
ملامح فشلة اليعثره جدمه

اشك برجعتك وتلاكفك خوف
واعزفك للظنون البيه نغمه

امنيتي على ما گد ارمش انساك
اقل شي على بعدك گلبي اعلمه

لو ناسي من الاول لا صفكت ايد
ولا عـ الذكريات الليل اقسمه

من تالي صعب نسيانك يصير
مثل الـ بالكبر يتغير اسمه.


#ايهاب_المالكي