قناة خطباء المنبر الحسيني للقصائد

#الرسول_الاكرم

#جديد
استشهاد النبي الأعظم صلى الله عليه وآله
حضور الزهراء لعزاء أبيها

مجاريد :

جيت ابكسر ضلعي المسيه
أدوّر على الينصب عزيــــه
وايشاركنــي ابـأوّل رزيـــه
بمصيبتي ابسيْــــد البريــه

أوّل رزيــــه الشـيبـتـنــي
وأعظم مصيبه اللي افجعتني
وردت على اعيوني وعمتني
امـن الأبـــو حيــن اليتمتني

وينه اليواسيـــني يشيعه
وعينه تـهــل الهالفجيــعه
واينادي يا حامي الشريعه
كسروا ترى ضلع الوديعه

مسموم أبويــه راح مسموم
ابگلبـه رزايا اشكثر واهموم
ومن بعد عينه هجمت الگوم
وصار العَلَي ما صايــر ابيوم

يا شيعه حزني رايح ايطول
ليوم اللي نعشي يمسي محمول
وزينب تظل ابگلـــب مذهــول
وكل يـــوم عدها اعزيـز مچتول
وينه اللي دمعه اعلينه مهمــول
ايواسينه يبگه وحزنه ايطــول
___
#فاطمة_كريم
٢٠٢٤ م

#أبوذيات في استشهاد الإمام #الحسن المجتبى عليه السلام
.
.
عليك الدهر گلبي بحزن ينشد
تگطــع چبــدك وما بعــد ينشـد
اليجي لدارك يخويه وبعد ينشد
يشوف الدار من بعدك خليـــه

حسافه تنچتل يا خوي بالسم
يمن وجهك لعد الجرح بالسم
عگبك ثغري حاشه ابيوم بالسم
وصفن أيامي من بعدك عزيه

جِرَع مِنِّ المَحَن أكبــر سَهمهــــا
وتِغيَّر بالسَمِ ارسومـه سَهمهــــا
اشعدها اعداه واترامِـي سَهمهـا
وتصيب ابنعشه گلب أمه الزچیه
_
#فاطمة_كريم
#الامام_الحسن

#الامام_الحسن

#نواعي في استشهاد الإمام الحسن المجتبى عليه السلام
.
.
حال مولاتي الزهراء عليها السلام
وزن : البحر الطويل + طور : لفى عاشور

وين اليندب المسموم .. وعلى امصابه يصب دمعه
ويحضر مجلسه مفجوع .. ويون لوليدي وينعه

وين اللي يساعدني .. على امصاب ابنيِ المسموم
بسواده يحضر المجلس .. ويِنـادي آه يا مظلـوم
ويساعدني بدمع عينه .. ويواسي گلبي المهموم
اوليدي چبده وَذْروها .. وزينب حايره اتودعه

شافت بالطشت چبده .. وازداد الجرح جرحين
بمثل هذا الطشت تدري .. راح تشوف راس حسين
منهـو اويـاها هالليله .. يون ويلطـم الخـديـن
تشوفه ويلي يم جده .. العده من دفنته اتمنعه

ما بين البقيع اليوم .. وما بين النصب مآتم
أفتر والله يا شيعه .. ودمع عيني يصب من دم
رحل مسموم ، رحل مظلوم .. ابني وگبره اتهدم
ومحد والله هالليله .. على گبره يوج شمعه

آه يا يمه ..آه يا يمه .. آه يا يمه .. آه


مجاريد :

ونّوا على ابني وساعدوني
وبالمجلس ابچوا وگابلوني
بيه الأعــادي مرمــرونـي

مسموم چبده گطعــوها
ويم النبي جثته امنعوها
وتالي الزمن گبْته هدّموها


وكأني بمولاي الإمام الحسين عليه السلام يبكيه ويقول :

يخويه الدنيا بعدك موش حلوه
يا من للگلب يالحسن سلـــوه
اويــــلاه يا طيـــــب الخــوه

وسفه يضمك خويه لتراب
توّك بأربعينك خويه تنصاب
واتنام ابلحد واتعوف الأحباب

وكأني بحال مولانا القاسم عليه السلام :

عگبك يبويه موحشه الدار
واعليك دمعي يبگه مدرار
ويبگه دليلي مشتعل نار

يا بويه منك ما شبعه
بيك الدهر تالي فجعنه
وشتّت عگب عينك شملنه
___
#فاطمة_كريم
٢٠٢٤ م

#الامام_الحسن

في مصيبة طعن الإمام الحسن عليه السلام
مجاريد :

فوگ الغدر يا ويلي طعنوه
واوحيـــــد ابن النبي خلوه
انگلبوا عليه ابساعه خانوه
فوگ الصبر ياويلي قهروه

وحـــــده يون بفاده حسره
ووسط الگلب يا ويلي كسره
اششايل بعد جم جرح صدره

اصحاب والله اشلون صابوه
بساعه شديده ليش ضربوه
وسط الفخذ يا ويلي طعنوه
وامصلاه من تحته يسلبوه

وحده يعالج جرحه بيده
مآلــــوم والحاله شديده
ويلاه على ابن الصميده

يدريهم ويدري ابغدرهم
ويدري ابفعلهم وابمكرهم
الله يعينـــه اعله قهـــرهم

يدري الـــولي شلي وراهم
ولهالسبب أحقــــن دماهــم
بس ما سِلم والله امن اذاهم

ويلي على الوالي وحسرته
مظلـــوم ما راعوا كسرته
الله يـــا معظــــم محنتـــــه
__
#فاطمة_كريم

#دخول الشام
#نعي طور : يا بويه يا بويه
.
.

يا بويه يا حيدر
بالشام الي احضر
شوف العدا اشسوت
گلبي ترى اتمرمر

يا حاضر الشدات
تتركني لا هيهات
صرنه وسف فرجه
بين العدا وشمّات

يا بويه قهروني
يا بويه أذوني
مثل الجرى بالشام
ما شافت اعيوني

احضرني يالوالي
وشوف اشجرى ابحالي
حرمه وأطب ديوان
ما چانت اببالي

وراس العزيز احسين
يدمي يبويه العين
بالطشت لن خلوه
وگلبي انجسم نصين
_
#فاطمة_كريم
#السبي
#الدخول_الى_الشام

#دخول_الشام
#نعي

#مجاريد

يا طبة الشامات صعبه
ضيم وهضيمه ونار غربه
والنجف صار ابعيد دربه

يا ريت حلال المشاكل
يحضرنه وايجينه بو فاضل
وايفك عن ايدينه السلاسل

يا ريت يحضرنه ويجينه
ايشوف الأعادي امربِّطينه
والناس تتفرج علينه

وَگْفونه على الساعات ساعات
بين العده واعيون شِمَّات
وفوگ الآه ضگنه اهواي آهات

من عمت عين التصد لينه
وعين الفِرَح والله اببچینه
وإحنه النِعَم كلهه امن ادينه
جدنه النبي وحيدر علينه
____
تمت بحمدالله تعالى
#فاطمة_كريم
#السبي
#الدخول_الى_الشام

#دفن_الاجساد

#جديد
#نواعي
وكأني بالإمام المهدي عجل الله تعالى فرجه الشريف مخاطباً عمته زينب عليها السلام ..

طور : سامحيني

عمه زينب .. عمه زينب
ينكسر گلبي امن اشوفج بس تونين
عمه زينب .. عمه زينب
أدري ما يبرى ابديلچ جرح الإحسين

عمه زينب .. عمه زينب
يا شريكة حزني وآلامي والإدموع
عمه زينب .. عمه زينب
گلبي مو بس المُصابه والله مفجوع

گلبي مجروح .. گلبي مجروح
وتنزف آلامي على جرحچ يَعمه
گلبي مجروح .. گلبي مجروح
شفتي چم آلام چم ضيم اويه هضمه !


وكأني بها تخاطبه :

انكسر ظهري .. انكسر ظهري
من شفت جدك يعمه غاب عني
انكسر ظهري .. انكسر ظهري
فرگته كلشي خذت يا عمه مني

وغاب بدري .. غاب بدري
عمك العباس من ظل عالشريعه
غاب بدري .. غاب بدري
آيا مهدي وضاعت اخلافه الوديعه


طور : الفراق [ مالي غيرك ]


آيا مهدي .. عمتك زينب سبوها
آيا مهدي .. عالهزيــــله ركّبوها
آيا مهدي .. ابحبل وابسوط اضربوها

آيا مهدي .. هالهزيله يســروني
آيا مهدي .. عمه چم مره اضربوني
آيا مهدي .. لو بچت عيني اشتموني

آيا مهدي .. بت علي آنه وسبوني
آيا مهدي .. بالخرايب گعـــدوني
آيا مهدي .. ابراس الإحسين افجعوني
___
#فاطمة_كريم
٢٠٢٤ م

#دفن_الاجساد

#جديد
#نواعي_دفن_الأجساد_الطاهرة
.
.
مجاريد :

جيت لدفنتك  والگلب ذايب
امگطــع لگيتــك عالترايب
ما مثل يومك بالمصايب

بيدي أجمّــع بويه جسمك
امطشر يبو السجـاد لحمــك
وغسلك صُبح من فيض دمك

يحسين بويه اشلون أدفنك
وما ظل عضو سالم والله منك
والله ما مثل يومك وحزنك

حاير أنزلك يالأبو اشلون
وانته بالكلب يا بويه مطعون
وجسمك ويلي امفتت ومطحون

الميت عالترب راسه يخلوه
وإنته اعله الرمح راسك يشيلوه
وثلث تيام عالغبــره يعوفوه
____
#فاطمة_كريم
٢٠٢٤ م

#جديد
#نواعي #ليلة_الحادي_عشر ( الوحشة )
.#ليلة_الوحشة
#الحادي_عشر
.
أبوذية :

أفتـر عالجثث وأعثر وحيــلي
تِهدّم عالأخو وما ظل وحيـلي
ردت بس خيمه هالليله وحل لي
تِلـــم أيتــامــي واتظلــل عليــه




طور : جاوبني يا علي

يا خويه يا غريب
أودعك بالنحيــب
وداعــاً يا سليب
يا خويه يا حُسين

وأمشي بدرب صعب
وتِظل اعله الترب
يسبوني للغُــرب
يا خويه يا حُسين

ايركبوني عالهزل
ايربطوني بالحبـل
ويِتشتت الشمل
يا خويه يا حُسين

بعدكم يَخــوتي
ابخرايب گعدتي
اشعُظم مُصيبتي
يا خويه يا حُسين

ظليت ابلا أهــل
وما ظل بعد أمـل
راح الإلي كِفَــل
يا خويه يا حُسين
__
#فاطمة_كريم
٢٠٢٤ م

#جديد
#نواعي #العليلة عليها السلام 💔
.
.
مجـــاريـــــد :

ويـــلاه يـا گلب العليــله
حين الضعن أنوى رحيله
ظلت المدمع بس تسيله
واتنادي بعدكم مالي حيله

ظلت دمعهـا بـس تصبـه
واعيونها اعله الوالي تربه
واتگول بعدك عمري غربه
وويّــاك حمّـلت الأحبــه

يا بوي خِلْتك بيش أسِدها
والمثلك أبو يا بوي عدها
ماظن فرگته تنسد بعدها
واجروحي بعدك من يشدها

ايهون المرض واتهون الآلام
انچان يمك أگضــي الأيــام
وابعيني اشوفك مو بالأحلام
حتى لو خذونــي تالي للشـام

فرگــاك يا بويـــه شـديـده
وأدري شوفتك تصبح بعيده
خلني وهالتعب بويه أريِـــده
وأمشي بضعن سكنه وحميده

بـس لا تخلـوني ابهالـدار
اوحيده يبويه ودمعي مدرار
وكل يوم اتنطـر على النار
انتظر منكـم تلفي أخبـار


طور : جاوبني يا علي

يا بويه لا تروح
وتتركني للجروح
منّي تُروح الروح
يا بويه يا حُسين

دمعي يظل جمر
وابابك أنتظـــر
مَگْدر على الهجر
يا بويه يا حُسين

خذني يَكل هلي
غيــرك فــلا إلي
ارحمني يالولــي
يا بويه يا حُسين

أتحمـل الألـم
وي حرگة الخيم
بس فرگتك سهم
يا بويه يا حُسين

بس فرگتك عذاب
يا بويه واغتــراب
خذني مع الأحباب
يا بويه يا حُسين

تــدري بعليلتــك
اتعيش اعله شوفتك
وتذبحــها فرگتــك
يا بويه يا حُسين


طور : يا ليل طول ساعاتك

يا ليل .. راحوا أحبابي
يا ليل .. وأنطر غيـابي
وحدي يا ليــل الأه
بين الهــــم والويلاه

يا ليل .. محــد بُگالي
يا ليل .. ظل بيتي خالي
وعيني ظلت عالباب
أتنطـــر الغيّــاب

يا ليل .. وأدري الراحولي
يا ليل .. هيهات إيجولي
أدري الرايــح مَيّعــود
ويبگه گلبـــي ممــرود


طور : الفراق ( مالي غيرك )

آيا بويه .. أبگه كل ليله بحنيني
آيا بويه .. وبس خبر أنطر يجيني
آيا بويه .. اعليك ما يِبطل ونيني

آيا بويه .. امتانيه تبگه العليله
آيا بويه .. اعليكم المدمع تسيله
آيا بويه .. تحسب الليله اعله ليله

بانتظارك .. وأدري لا طارش يجيني
بانتظارك .. حتى لو تِخْلَص سنيني
بانتظارك .. راح أظل يا ماي عيني

وأدري تبگه .. بويه نايم عالوطيه
أدري تبگه .. ابلا دفـن بالغاضريـه
أدري تبگه .. وريت يا روح الزچيه
أدري تبگه .. اوياك تاخذني المنيه
_
تمت ببركات مولاتي العليلة عليها السلام
#فاطمة_كريم
٢٠٢٤ م

#جديد
#العليلة عليها السلام 💔
#گوریز
.
.
وكانت فاطمة العليلة عليها السلام قد هيأت الدار لاستقبال أبيها ، لأنهم أخبروها بأن أباها قد رجع من العراق ، ففرشت الدار بعد أن كنستها ، وكذلك هيأت مهد أخيها عبدالله الرضيع ، وبينما هي كذلك ، وإذا بالباب تُطرق ، فإذا بعمّتها زينب ...

مجاريد :

اتگلها يعمّه ويــن الأحبـاب
بفراگكــم ذاب الگلـب ذاب
وحتى الجِفــن بغيابكم شـاب
ولا طارش المنكم دگ على الباب

يا عمّه بيكم شنهــو الصار
ولا لفت منكم ويلي أخبار
يا عمّه ليش ابمتنـچ آثار
ودم ابعباتچ ليش واغبار  !

حيلچ منهدم وامغيّره اللون
ومنچ ذايِبه يا عمّه لعيــون
هذا الحال يعني ابگلبچ اشلون
طولچ منحني وامشيبه لجفون
___
#فاطمة_كريم
٢٠٢٤ م

#جديد
#العليلة عليها السلام 💔
#گوریز
.
.
وقبل أن يخرج الحسين عليه السلام من المدينة ، ودّع بني هاشم ، ومحمد بن الحنفية ، وأم سلمه ، وبعض عمّاته ، وأهل بيته الذين وقفوا للوداع ، وعزيزته فاطمة والمعروف أنها كانت عليلة ، فزحفت نحو مركب أبيها ، وهي تقول له : (( خذني معك يا أبه )) !

وكأني بجواب والدها :

فائزي :

ردي يبنتي لمنزلچ لا تِفجعــيني
وبالصبر إدعي يالحنينه واندبيني

ردت او دمعتها على الوجنه جريه
واتوجهت تنــخـه كفيـل الهاشميه
طاحت وناحت يمه والحاله شجيه
اتگله يعمي ارجوك بس لا تخليــني

عباس عمي بالشدد يالدوم مندوب
اتوسطلي يا عمي رجيتك آيا مهيوب
گِله العليله تحتمل كل هاي الإدروب
التذبحني تدري الفرگه واتزوّد ونيني

يا عمي مَيْهمني الدرب شوفتكم ادواي
إلكم يعمي خادمه اخذوني رجواي
وحدي اظل اشلون آيا ماي عيناي
وتدري يِزوّد علتي إلكم حنيني

ايگلها يعمي طلبتچ عالراس والعين
لكن جرى المكتوب بينه وفرَّگ البيــن
اجرچ على الله ابذبحتي وابذبحة حسين
ردي يريحانة الــوالــي واعذرينــي


وكأني بها توجهت إلى عمتها زينب عليها السلام فأجابتها :

امن الشام أخاف اعليچ وامن الغاضريه
وسط الخرابه لو نظرتي اختچ رقيه

بالشام أخاف اعليچ آيا گرة العين
لو شفتي بعيونچ يبنتي راس الحسين
ووياه شفتي راس عبدالله تموتين
اچبیر الرمح عالراس يا ويلي عليه

بالشام أخاف اعليچ والله بعد عاشر
بدرب اليسر لو عاينيتي أفضع مناظر
وعالطشت لو شفتي رقيه ميته باچر
اتروحين أخاف أوياها يا عمه امن اديه
____
#فاطمة_كريم
٢٠٢٤ م

#جديد
#العليلة عليها السلام 💔
#گوریز


عن الإمام الرضا (عليه السلام) : هذه البومة كانت على عهد جدي رسول الله (صلى الله عليه وآله) تأوي المنازل والقصور والدور، وكانت إذا أكل الناس الطعام تطير وتقع أمامهم فيرمى إليها بالطعام وتسقى وترجع إلى مكانها، فلما قتل الحسين (عليه السلام) خرجت من العمران إلى الخراب والجبال والبراري، وقالت : بئس الأمة أنتم، قتلتم ابن بنت نبيكم ولا آمنكم على نفسي .
كامل الزيارات ص ٢٠٠


وأيضاً جاء غراب فوقع في دمه ، ثم تمرّغ وطار ، فوقع بالمدينة على جدار فاطمة بنت الحسين عليه السلام ، وهي تبكي على فراق أبيها واخوتها وعمّاتها وأعمامها ، فرفعت رأسها فرأت الغراب ملطّخاً بالدم ، فبكت بكاءً شديداً ، وأنشأت تقول :

نعبَ الغراب فقلت : من تنعاه .. قال الإمام ، : فقلت: من؟ قال : الموفق للصواب
إن الحسين بكربلا بين الأسنة والضراب .. فابكِ الحسين بعبرةٍ ترضي الإله مع الثواب
قلت: الحسين ؟ فقال لي: حقا لقد سكن التراب .. ثم استقل به الجناح فلم يطق رد الجواب


قال محمد بن علي عليه السلام : ( فَنَعَتْهُ لأهل المدينة) ، فقالوا : قد جاءتنا بسحر بني عبد المطلب ، فما كان بأسرع من أن جاءهم الخبر بقتل الحسين بن علي عليهما السلام .
اللهوف في قتلى الطفوف ص ١١٥
العوالم ص ٤٩٠


فـــائـــزي :

يا ريت لا طــال العمر ياريت يَغْــراب
امخضب أشوفنك يويلي ابدم الأحباب

يا ريت لا طال العمر وأنظر بالإعيون
ابدم والدي يَغْراب والله امخضب اشلون
يعني الإمكدر حان واهلي ما يعودون
واشلون ايعود الكطعوا جسمه اعله لتراب

هيهــات إليّــه يرجـع امـــدلل الزهـــره
يَغْــراب وانته امخضب امن ادموم نحره
وكلبي يحس ابخيــل جنها اتدوس صدره
وانظر ابعيني نــار جنها تحـــرك أطنــاب


مجـــاريد :

حَـسّ الدليـل وذابـت الـروح
وگلبي يگلـي الوالي مذبـوح
واعله الترايب جسمه مطروح

بگلبي أحس مگطوع نحــره
والخيل تسحگ فوك صدره
من عمري يا ريت اعله عمره

أبوذية :

يسكنه ..
النزل وحشه وبعد ياهو يسكنه
وبعد منهو لجرح كلبي يسكنه
يريـت ابنـوح نتگابــل يسكنه
وكُون اعله الأبـو ننصب عزيه
__
#فاطمة_كريم
٢٠٢٤ م

#الهلال
#الليلة_الأولى
#جديد
#الهلال ودخول محرم
طور : ما يحاچيها
.
.
( بالسمه اهلالك .. للمقتل علامه )

لفيت الليله آيهـــــلال الأحزان
لفيت وطلعتك ما خلّت اخوان
عليّه اتعيد آيهلال الأشجـــــان
من طف كربــله لدخلة الديوان

( بالسمه اهلالك .. للمقتل علامه )

اهلالك طلعته تحمل علايـــم
وهضايــم تتبع بگلبي هضــايم
اشوف ابلا نحر  شيخ الهواشم
ذبيــح امسلب وعالغبره نايــــم

( بعيني المقتل .. آيهلال أشوفه )

تنعاد المحـــن تنعـــــاد الآلام
يهـلال وتزيد ابگلبي لسهـــام
هجوم الخيل ويّه حرگ الاخيام
وميسوره أروح الكوفه والشـام

( وبالغصب أمشي .. عن أهل المحنّه )

يهلال النوايـــب والرزيـــات
أيامك عليه اشلون مُـــــرات
ما أنسى مرارك أبد هيهــــات
كافي امشينه بأيامك سبيات

( جرحك ابگلبي .. حاشه ابيوم يبره )

وبعد يهلال واليصعب عليه
بيك ابيوت أحبابي خليــه
رجعت وكلشي ما ظل بعد ليّه
وحشه الدور عگب أهل الحميه

( آيوحشتها .. تشعب والله گلبي )
__
تمت ببركات مولاتي العقيلة زينب عليها السلام
#فاطمة_كريم
٢٠٢٤ م

#الليلة_الأولى
#الهلال
#جديد
#الهلا ودخول محرم
.
.
مجاريد :

الليله الإمام المهدي محزون
ومن دم يويلي ايهل الإعيون
وگلبه من الأحزان مطعون
وهاي المسيه ابحالته اشلون

لابس سَواده وگلبه حاير
وابباله تمر أهوال عاشر
جده الغريب ابلايه ناصر
واتدوسه يا ويلي الحوافر

اهلال الحزن والدمعه والنوح
اعليه المسيه ايجدد اجروح
بمصاب جده المات مذبوح
ولليسر عگبه زينب اتروح

شهر الحزن شهر العزيه
بفـاده تـارك چـم أذيـه
اجروح الگضوا بالغاضريه
وعمْته اللي ودوها سبيه

أبوذية :

بگلبك چم عزا ناصب وماتم
يَمن كل عمرك امحرم وماتم
عسى لهلال لا يِكمل وماتم
ولا تسمع خذوا زينب سبيه
_
تمت ببركات المولى صاحب الزمان
#فاطمة_كريم
٢٠٢٤ م

تمت المشاركة من تطبيق: خطباء المنبر الحسيني

#الهلال
#الليلة_الأولى


#جديد
#قميص_الحسين
وزن : #الفائزي
.
.
الليله القميص البِدِّمه تنشره الزهره
ويبدي العزا والنوح لمصيبة العشره

يبدي العزا من تنشره ويتگاطر ابدم
وكل ناحيـه يمليـها بأحزانـه محـرم
هذا قميـص الصـدره بالحافر تهشم
والخيل ردت تالي يا ويلي اعله ظهره

هـذا قـميـص الصـوّبـوا بالسـهـم گلبـه
وذبحوا رضيعه وكل هله وخوته وصحبه
عطشان مات وما سگوه لو حتى شربه
عطشان او ظل الماي يجري والله كتره

هذا قميص البي دِمه من جسم الأكبر
حين اللي شاله وجسمه عالغبره تنثّر
وبيه دم نحر جسام ويّه دم الأصغر
مذبوح ظامي ما شرب لو حتى گطره

هذا القميص البيه دِمه چفين عباس
ودم عينه المصيوبه ويّه طبره الراس
ودم صدره تالي هالذي بالخيل ينداس
مثل أمه تالي مو ضلع ينهشم صدره

هذا قميص البيه كل اجروح الإحسين
ابعين البصيره ننظره مو شوفة العين
وأعظم مصيبه اللي عليها انزيد الإونين
ابعين الگلب لو شفنه بيه ادموم نحره
__
تمت ببركات مولاتي الزهراء عليها السلام
#فاطمة_كريم
٢٠٢٤ م

تمت المشاركة من تطبيق: خطباء المنبر الحسيني

#جديد
#الليلة_الأولى
#الهلال ودخول محرم
وزن : البحر الطويل
تقرأ القصيدة بجميع أطوار البحر الطويل + تقرأ في النعي بطور : لفى عاشور + التغريد الحزين
.
.
سلام الله على اجروحك .. يمهدي وجفنك المقروح
سلام الله على گلبك .. اشكثر يا سيدي مجروح

آه يا مولاي .. آه يا مولاي .. آه يا مولاي .. آه
____
إجه امحرم يبو صالح .. ويعين الباري دلالك
عليك ايجدد اجروحك .. ويغيّر بالحزن حالك
يمهدي وچم صور تفجع .. يرجّعها على بالك
صورة چم طفل عطشان .. وصورة چم طفل مذبوح
____
وبعد صورة گمر طايح .. گمر مگطوعه چفينه
مصيوب ابعَمَد راسه .. وسهم نابت وَسَط عينه
وأظنّك بالخيم تسمع .. يمهدي ونّة اسكينه
تبچي مره عالعباس .. ومره اعله الرضيع اتنوح
____
اببالك چم شباب الراح .. يمهدي وراحت اسنينه
هذا الوذّروا جسمه .. والله لوالده ايعينه
وذاك امن العرس محروم .. بدِمه حنوها چفينه
ابدال الزفه والحنه .. دمّه اعله الثرى مسفوح
____
وبعد أعظم مصيبه اعليك .. تشاهد جدك وصبره
گبل ما ينذبح بالسيف .. تدوسه ويلي العشره
وتالي اعله الثرى مگلوب .. يمهدي ينگطع نحره
وعلى راس الرمح راسه .. اگبال الهاشميه ايلوح
____
تمت ببركات مولاي صاحب الزمان عجل الله تعالى فرجه الشريف
#فاطمة_كريم
الجمعة ٢٤ / ٥ / ٢٠٢٤ م

تمت المشاركة من تطبيق: خطباء المنبر الحسيني

#الهلال
#الليلة_الأولى
#محرم #نعي
طور : يا ليل طول ساعتك
.
.
وكأني بالزهراء عليها السلام وهي تنادي في هذه الليالي ..

كل عام .. أگصد بدموعي
كل عام .. وايدي اعله ضلوعي

يمكم أبچي اعله حسين
وأنده وين الباچين
.
.
كل عام .. أگصد للمأتم
كل عام .. ابضلعي لمهشم

وألطم خدي والراس
لحسيني والعباس
.
.
كل عام .. أتعنه وأگعد
عالباب .. يا شيعه وأنشد

وينه اللي يبچي اوياي
لبني المحروم الماي
__
#فاطمة_كريم

تمت المشاركة من تطبيق: خطباء المنبر الحسيني

#الامام_الجواد

#جديد
#گوریز استشهاد الإمام #الجواد عليه السلام 💔


-  كما في جنّات الخلود : تورّم جسده وكان يقطر جلده شبه الدم ، فلمّا قضى نحبه أمر المعتصم بأن يرموا جسده الشريف من أعلى السطح إلى الأرض ، ومنع الناس أن يحملوه ويشيّعوه ويدفنونه ويدنوا منه ، وبقي جسده ملقى على الأرض أياماً بلا غسل ولا كفن ولا دفن ، وكان يسطع منه رائحة المسك والعنبر ، فلمّا علم المعتصم ذلك خاف الفتنة وخشي الفضيحة أمر بدفنه .

📚 نور الأبصار للشيخ المازندراني  ص٢٧٦ 


آيالجواد ويا مُصابه
ويا حسرة اسنينه ويا شبابه
ايذوب الگلب والله لعذابه
فوگ الغدر شنهو اللي صابه

آيالشباب المات مسموم
وجسمه تورّم ينزف ادموم
وفوگ الچتل يرمونه الگوم
مِنِّ السطح ويلي المعصوم

مثل الذي امن الگصر ذبوه
وجسمه على التربان جروه
وفوگ السم يويلي جسمه خلوه
مرمي ثلث تيام عافوه
مثل الذي بالخيل داسوه
وراسه اعله راس الرمح رفعوه
وعگبه الضعن يا ويلي يسروه
وما خلوهم الوالي يِدفنوه


أبوذية :

ظل آه
إلچ چم ولد ما مدفون ظل آه
يزهره وجسمه عالتربان ظل آه
حسين العَلـ  ـحَرم رايه وظلاه
تالي ظل على الغبره رميه
____
#فاطمة_كريم
٢٠٢٤ م

🏴 #شهادة_أمير_المؤمنين_ع
📜 #قصيدة_لطم

الشايــــل  الدنيــــــا  بأمــانــــــــــــه
شـــــلون  خالــــي  ايظل  مكانــــــه

اشـــلون دنيانــه تظل ابلايــه عينــه
وينـه  يا دنيــا  حنانــه وينـه  وينــه

ـــــــــــــــــ ·❆ · ❆ · ❆· ـــــــــــــــــ

جــان خيمه وكلنــه نلتــم ابظلالــــه
امعلميــن ابخيــــره إنعيش ودلالــــه
اليــوم يادنيــا نودعــه اشلون حالــه
لادوا  لجرحــه  يفيـد  وحل  رحالــه

ـــــــــــــــــ ·❆ · ❆ · ❆· ـــــــــــــــــ

يتّــــــــــم ابفگــــــده اليتــــامــــــــه
عگبــــــه   ما ظنـــــي  سلامــــــــــه

گلبي بغيابــه  اريـــــد  الله  يعينــــه
وينـه  يا دنيــا  حنانــه وينـه  وينــه

📝 #بنت_الشمري

ـــــــــــــــــ ــــــــــــــــــ ـــــــــــــــــ

كـل  مكـان وكل گلب  حن  لغيابــــه
واليتامــى  تصيـح  واويلي ييابـــــه
راح والكـون  امتلى  بهمــه  وعذابـه
ظل دمع ونياح  يتــوالى اعله  بابــه

ـــــــــــــــــ ·❆ · ❆ · ❆· ـــــــــــــــــ

الدنيــــا  ظلمـــة  بــلايـــــة والـــــي
راح منهــــــــا الأسمــــــه  عــــالــــي

ذكريــات  البقت  لايـامــه وسنينــــه
وينـه  يا دنيــا  حنانــه وينـه  وينــه

📝 #ولائـية_وافتخر (دعاء العامري)

ـــــــــــــــــ ــــــــــــــــــ ـــــــــــــــــ

كـل مسيّــه  ومغربيــه ايطر خيالــي
ما اصــدق  عني غــايب  مــا بقالــي
بحلمي مشتاقه اشوفه العنـدي غالي
عِمت  عيني وبغيابــه دمعــي هالــي

ـــــــــــــــــ ·❆ · ❆ · ❆· ـــــــــــــــــ

كــــــم  طفــــــل   ذابت  مهجــتــــه
مــــن  رِحــــل  راحت   بسمــتـــــــه

يا هظيمه  ويـا  هظيمه   ويــا ونينه
وينـه  يا دنيــا  حنانــه وينـه  وينــه

📝 #خادمة_أبي_الفضل

ـــــــــــــــــ ــــــــــــــــــ ـــــــــــــــــ

آه يعيـــون  اليتامــه  او يا  جزعهـم
بالنعش محمـول  شافــوه وفجعهــم
الچان بيده الطاهــره يمسح دمعهــم
ونسوا حتى اليتم بوجوده ووجعهـم

ـــــــــــــــــ ·❆ · ❆ · ❆· ـــــــــــــــــ

وانحنت  ويــــــه   ظهــــــرهـــــــــم
حتــــــى  حيطانــــــه  نزلهــــــــــــم

الدور كلها اتيتمت  بعـــده  وحزينــه
وينـه  يا دنيــا  حنانــه وينـه  وينــه

📝 #فاطمة_كريم

ـــــــــــــــــ ــــــــــــــــــ ـــــــــــــــــ

چــانت الايتـام  متغطيــه بحنــانـــه
ومطمئنّه وغـافيــه  بســده  وامانــه
لخــاطر الفقره ايتــلاوه وي زمانــــه
راح شيعوضـه وشيخلفون ابمكانـــه

ـــــــــــــــــ ·❆ · ❆ · ❆· ـــــــــــــــــ

ال  يحبــــــونـــــــه   ويحبــهــــــــم
جــــــرح فگــــــده بنص گلبهـــــــــم

گلوبهم  ظلّت  تــون  لجله  وحزينـه
وينـه  يا دنيــا  حنانــه وينـه  وينــه

📝 #أم_محمد_الحجاج

ـــــــــــــــــ ــــــــــــــــــ ـــــــــــــــــ

راح  ثـار  الله وقلب  بنتـه اشيجبره
ريت كــل اسنيني أفديهـــن لعمــــره
تبت ايــد اللي  تِجَــرّه  ابليل  قــدره
هــام اعظــم  اوصيــاء الله  يطبــره

ـــــــــــــــــ ·❆ · ❆ · ❆· ـــــــــــــــــ

امـــن السمــــه  بــــانت  عــــلامــــة
انهـــدّت    اركــــان    الإمــــامـــــــة

من  لفـونـي  وعالمتن  لَن  حاملينــه
وينـه  يا دنيــا  حنانــه وينـه  وينــه

📝 #زينب_الخفاجي

ـــــــــــــــــ ــــــــــــــــــ ـــــــــــــــــ

تمت ولله الحمد
#١٦_رمضان_١٤٤٤
اللهم إلعن قتلة أمير المؤمنين ع