قناة خطباء المنبر الحسيني للقصائد

ليلة الانصار محرم 1443
*************

على البخيامهم خير وشهــامه
على أرجال المواقف والكرامه
عليهم رحمة الباري وســلامه

**************

سلام الله وتحيه
لانصار الزچيه
هذوله ارجال الحسين
خـــــدام الرقيه

اصحاب ونعم مو مثل الاصحاب
مو عشرة وكت لا عشرة ارگاب
حبيب ابن مظاهر شايب وشاب
فرق بين المبين بين ابو انگاب

تظل بالطف فزعته أترجف الگاع
هلا بشيبه حبيب الحگهه ما ضاع

جندي وبالحرب تمم كلامه
عليهم رحمة الباري وسلامه

***********


اهل نخوه وبساله
عباد الله ورجاله
صبر وايثار وأقدام
يضعفون استحاله

وفو لله ورسوله وكل الاطهـــــــار
هذوله الكل فعلهم فعل الكبــــــــار
لاجل خيمة رقيه امتدو انهــــــــار
بسماء السابعه العاجل والاخبـــار

صحابه للحسين بارض الطفــــــــــــــــــوف
حربهم بالصدور ومو بالسيــــــــــــــــــوف

الثله الصابره انصار الامامه
عليهم رحمة الباري وسلامه

***********

يوم النخوه هاليــــــــوم
گلب الزهره ملچـــــــوم
كلمن اليوصل حسين
هوى الله عليه محروم

صارو للخيــــــــــــــام جنود حراس
تغطو بالسهـــــــــام وما حنو راس
مدري شعلماهم سيف عبـــــــــــاس
بقه اليوصل الحدهم بآخر انفـــــاس

ملاحــــــــم سطرو وأتخلدو راي
شفو ضلع البتول بهالحرب هاي

ركضو لا درع لامــــن عمامه
عليهم رحمة الباري وسلامه

****************


عاشو لجل الحسين
لذلك همه باقــــــين
ركض ركضو على الموت
أهل غيره ودواوين

تره اليتبع حسين ويمشي ويـــــــــاه
مثل عابس يصير العشگ جنــــــــاه
برير الموت چان متــــــــــــاع يمناه
عبد لحسين مخلص ربنه ســـــــــواه

من صارت حرب وأتقدم المـــــوت
توضو بالسدر والصرخه بالصوت

تره بطف العشگ جانت قيــامه
عليهم رحمة البــاري وســلامه

************



زلم موقف رجوله
اهل نخوه وحموله
على الخيمات مكتوب
عناوين البطـــــوله

صبح عاشر محرم والحچي سيوف
يقين وصــــــار عدهم هذا معروف
الشهيد الطاح منهم ميت يشـــــوف
مكــــــانه بجنة الله وروحه التطوف

قريب من الحسين هناك مأجور
هالفوز العظيم بذبح النحـــــور

تظل بوجوه انصاره ابتسامه
عليهم رحمة الباري وسلامه

*************
#رعد الفريــــــــجي
1443 محرم الحرام

#محرم_١٤٤٢_هـ
#الرضيع_ع


عبد الله يمه بحالك شلون
من العطش متفتح العيون
عطشانه أنه وانته عطشان
وعباس يم الماي مطعون


بنص الحرب والموت خطوات
بس والدك باقي وهالاصوات
صاحت عليه متعيش هيهات
عندك گمر فوگ الرمل مات


خجلانه من حسين أگله
هذا العطش لا مو محله
وحاله صعب والعله عله

وصلت الحاله ايغمض العين
وانه صحت يحسين يحسين

عبد الله ابنك لا تخليه
بلكت يشربونه وترد بيه
گلبي لچمني وخايفه أعليه


يحسين ما يحمل تره أبني
غمض عيونه وما عرفني
گتله ييمه وياك اخذني

غطي الولد تدري الشمس نار
الرمل يحرگ والعطش حار
يحسين شنهي ذنب الزغار


مودع ييمه وبلكن تعود
عيني عليك وحيلي مهدود
بس كون ترجع لامك ردود


غالي الحسين وابنه غالي
وانه غريبه بدون والي
حسين الذخر وابنه دلالي
يا دمعه البعيني تلالي


شفته رجع بس حيل تعبان
هذا ابو اليمه وگلبه نيران
من بعيد اشوف الجدم ثگلان
گلبي لچمني شلون بيه



زينب مشت واتلگت الجاي
ها خويه ابنك شارب الماي
وياي گلهه وني وياي
هاچ الطفل مذبوح خويه



وجه الگمر عطشان ينعاف
والسهم نار وينلچم خاف
شايلته زينب ردت تنوح
تحت العباه ضمته وينشاف


يم الخدر بشريني نايم ؟
أيام من الماي صايم
يا گلبي يلتحمل ظلايم
بس كون يفتح عينه اليه


لمن بچت زينب صحت آه
أبني انذبح يحسين ويلاه
يا موت اخذني اليوم وياه
ما اريدهه الدنيا بلياه


زينب اطيني وليدي اشمه
وامسح شفافه وفيض دمه
بعد الولد ما تنفع امه


مشتاگه الوليله واحاچيه
علمهد من ينام اخليه
ويفتح اعيونه وابتشر بيه

بس انتهت والمات ميعود
عبد الله يمه الولد مريود
يا ريت وجهي ماكله الدود
ولا شوف وجهك غاسله الدم




لخادم الحسين ✍️✍️
#رعد الفريجي
1442 للهجرة

#القاسم_أبن_الحسن_ع

نعي ليلة الامام القاسم عليه السلام
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


يوليدي ها يا نور العيون
يبن الحسن وبكربله شلون

جسام يمه حسينك أوحيد
ويم النهر عمك بلا أيد
واحنه حرم واهلك اجاويد
الحگ تعرف الشمر شيريد ؟

يمه لحسين اريدن موتك بساع
وانه ادري بيه رباي ما ضاع

انته عزيز وروحي أنته
وحسين أعز منك عرفته
عمامة ابوك البسهه جسام
لتخلي موتك موت سكته

يوم العرس من دمك يسيل
وتصير جثه وي المچاتيل
لهل المگابر تضوي بالليل
يا بعد حيل امك يجاسم

من تموت وي روحك وصيه
وصلهه للزهره الزچيه
گللهه امي تسلم اعليچ
وحاميت گلهه اعله الثنيه

گللهه أمي تگول وفيت ؟
بس ولد عندي وبيه ضحيت
بس روحي ظلت لكن حسين
گلالي ردي وانه رديت


لو بيدي اموت گبال عيناه
ولا شوفه مرمي ومحد وياه
ويلاه راح الوالي ويلاه


ونيت وانه امودعه الاحباب
والراس فوگه چفوف وتراب
ها يلولد ها يلصرت شاب
يمخلي گلبي ابكربله انصاب




يا كربله اشسويتي بينه
وشلون نرجع للمدينه
لامن اهلنه ولا ولينه
والشام لچمه ابنص حچينه


يهل المحنه هلاه يغاليين
مامش نفس مو چنتو عدلين
فوگ التراب اعزاز ميتين
واصعب جرح من شفت الحسين


ظليت يمه وصحت ما مات
بس جسمه كله انترس طعنات
مولاي گتله اگعد سلامات
خلافك تره يشبگون ادينه


كلمات خادم الحسين
#رعد الفريجي
1442 للهجرة