ТУРКИСТОН Қай кунким, жаҳонга келди Туркистон, Жаҳон шу майдонга келди Туркистон. Азиз тупроғингни бир бор кўрганлар Дингаю иймонга келди, Туркистон. Султонлар бош уриб ётган заминда Бош уриб султонга келди Туркистон. Ҳар гал бул бўстонга келганда ёғий, Оғриқ устихонга келди, Туркистон. Тарих йўлларида туркулар учди: О, қандай замонга келди Туркистон?! Урҳоси фалакка етганда азал Ой деди: осмонга келди Туркистон! Бу кун таъзим ила келдик, англадик: Англаган инсонга келди Туркистон. Йўқ, бошқа от ила ётлар келмади, Ўзи Туркистонга келди Туркистон! Улуғ Яссавийни ёд этиб, Мирзо, Юракда фиғонга келди Туркистон!.. Мирзо Кенжабек •┈❁✿❁┈• @xojagon_uz @m_kenjabek •┈❁✿❁┈•