لفور سرزمین زیبایی

#مثنوی_عاشقانه

بهاره ما که دنیا سوز بیهه
درازه شو امسه روز بیهه

ته دس لاستیکِ توپ مه دس عروسک
اشائی رِز رزآ هی زویی چشمک

عروسکِ خو کردمه سَرین سر
خشی جه پر کَشی این ورآ اون وَر

کَتِ پِه جا خردی ونگا وا کردی
شِشِم پِشتی مره ته پیدا کردی

مه وِسّه ناگمون سنگ کردی کپتِل
بَدی آخِد چتی بَوردی مه دل!؟

مِره یاد نشونه سور دارِ سایه
اماره اشائه پشتِ همسائه

کِله شیشِ جا آق عمو بِنِه ره زو
ته پیش شی آ ته دمبال گیتمه دو

همون جه وائه دَس دامه شه می ره
تِه دَسمالّه وندسی شه گلی ره

مه دل ته یادگاری جه بیهه خش
تِنِه اسری بهاره تَرنه وارش

اتی تو دائه می ره اون وَله وا
غم و غرصه ره چیمی بَووه رسوا

ته بوردیا خشی بورده ته همرا
مه کوره گِرره کی اَی هاکنه وا

بَدی مردم گپ مه دِلّه بوته
بَهیته غرصه ره مه تَن بدوته

به تِه سرخِ گلِ تن هیمه چوئه
به ته افتاب چنه دنیا سیوئه

مه دل سیو کلوش وسّه تنگه
مَله میونِ کائه وِسّه لنگه

برو چِش بَیته کا هاکن دواره
تِناری دل بهییه پاره پاره

گِتی دلّه هاپِه نَووه هوایی
چه زود گت بَیّه این دنیا خدایی

شه خدّه دردرو راضی دارمبی
سَرِ کلاره شه قاضی دارمبی

تِره پیدا کمبه بِرمه ی میون
شِه خدّه پر دمبه کهو اسمون

برو پِچکِ ریکا بَواش دواره
همون ریکا کَلِکِ سر سواره

✍ #رویا_اسداللهی


🇯‌🇴‌🇮‌🇳
@LafoorMyCountry

برای حمایت از ما، لینک بالا را👆👆به گروه ها و دوستانتان فوروارد کنید.