Бу күннэргэ өрөспүүбүлүкэтээҕи Онкология диспансерын искэни эминэн эмтээһин уонна онкогинекология отделениелара тэриллибиттэрэ 35 сылын туолар. “Саамай сыаналааҕа – тэриллэрбит буолаллар. Барыта “экспертнай кылаастаах” КТ, МРТ, эрэнгиэн диагностическай установка, 6 эпэрээссийэ саалатыгар барыта куосмаска курдук экраҥҥа көстө турар. Толору сэбилэммит эпэрээссийэ саалаларыгар биһиги хирурдарбыт, омуннаабакка эттэххэ, түүннэри үлэлииллэр. Хас да симиэнэнэн эпэрээссийэни оҥороллор, онон киэһэ хойукка диэри үлэлииллэр. Билигин үрдүк технологиялаах аппаратуралар баар буолан, кып-кыра хайаҕаһынан “точечнай” ньыманан киирэн, бүтүн искэни ылан кэбиһэр буоллулар. Иһин-үөһүн хайытан хаан-сиин буолбакка, ыраастык, түргэнник үтүөрэр буоллулар. Ыарыһах балыыһаҕа сытар болдьоҕо аччыыр. Онон маннык үрдүк таһымнаах хирургия көмөтө ыарыһахтарга табыгастаах буолла. Ордук бүөр, тыҥа, ис уорган искэннэригэр оҥороллор. Онон аныгы технологиянан аппаратура тупсубута – үлэбит биир ситиһиитэ буолар” – диэн кэпсиир м.н.к., СӨ доруобуйа харыстабылыгар штаты таһынан кылаабынай онколога, СӨ онкологтарын Ассоциациятын бэрэссэдээтэлэ, Онкология диспансерын искэни эминэн эмтээһин отделын салайааччыта Феодосия ИВАНОВА. Ол туһунан матырыйаалы “Кыым” хаһыат чэппиэрдээҕи, сэтинньи 28 күнүнээҕи нүөмэригэр суруналыыс Саргылаана Багынанова суруйуутугар ааҕыҥ.