سروودی هەواڵ
به دوو چاوی وەک زرێبار گەرمی گرینه
دەشتی شینی مەریوانە سەرگەرمی شینه
له تاڵەسوار دادەبەزن، دوو سواری سوورپۆش
میوانی تۆن کاک فوئادی دڵگەرم و ڕووخۆش
میوانی تۆن هاتوونەتەوە له تەورێزەوە
بیانگرە بیانگره له ئامێزەوە
ئەیکەین به هێز غەمی قورسی رۆڵەکانی تۆ
به قرمژنی گوللـەباران ڕووناکە ئاسۆ
له هەواڵی هەواڵانی تەورێز و تاران
چەپک چەپک گوڵیان پێیە پڕپڕ به دامان
بیاندوێنه با بۆت بڵێن سروودێکی نوێ
گەش و ڕوونتر لەو سروودەی که بیستووته دێ
دەستە دەسته، لاوانی سەربەست و شۆڕشگێڕ
بەرامبەر به جوخەی ئیعدام به دەنگی دلێر
ئەگوڕێنن تەخت و بەختی دوژمن ئەلەرزێ
ئەڵێن دوژمن راوەستاوی بەرامبەر به کێ
بەرامبەر به رنووی قورسی شۆڕشی وەستاوی
دژی شێڵاوی باوەر و هێڕش هەستاوی
وا بەیانه بۆیه وایه ئەی سەرله شێواو
ئەستێرەکان ئەتوێنەوە به نووری هەتاو
زەردەخەنەی گرینگی خۆر له زاری لاوان
ئاڵای سەر ئاسۆی بەیانە کاتی تیرباران
مەگری مەگری دایکی شەهید گریان گرانە
ڕۆڵەکانت سەرووی تۆ بوون لەو کوردستانە
.....
دادە مەلەکە دەڵێ کاک موسلح رێبوار کاتێک هەواڵی ئیعدام کرانی ماجد و ئەمجەدی برامی پێدەگا، ئەم شعرە دەهۆنێتەوە و لەودا کاک فوئاد بەردەنگ دەگرێ.
@Komala1