ويلي اعليك يبن امي يادمع الذي ايردك
لو ما تشبه القرأن جا ما كطعو جبدك
.......
ياخويه الحسن سموك وانه اتكطعت جبدي
رايح وين اخذني وياك غيرك جم حسن عندي
ما استاهل انه افرك بعدك وين اضل وحدي
من هسا الطفوف اتقوم و زينب باليسر تبدي
حار السم خويه اعليك بلجن دمعتي اتبردك
لو ما تشبه القرأن جا ما كطعو جبدك
.......
باجر لو يمر عاشور الزم ظهري واتحير
ردتك للخيم حماي لمن تهجم العسكر
ردتك عون اليه اتصير وي عباس المشكر
شمحله الطف لونك بي ما يتكطع الاكبر
بغضا بمك الزهراء وبحيدر علي و ضدك
لو ما تشبه القرأن جا ما كطعو جبدك
.....
جبدك بالطشت هاليوم وراسي بالطشت باجر
مرتين انكتبلي الموت مره وياك اضل حاير
ومره بعاشر بعاشور صدري ايهشمه الحافر
ساعتها العيال اتيه واهنا لوعة العاشر
لو تحظر يخويه وياي زينب تحتمي ابسدك
لو ما تشبه القرأن جا ما كطعو جبدك
....
ياريحة ابونه الحيد وابوجهك علي انشوفه
اشعنده السهم وياي حته النعش ميعوفه
نعشك بالسهم يرموه وراسي بحجر بالكوفه
وبعين الكفيل اينام سهم وينكطع شوفه
وياهو الي يحشمك كوم لو من كبرك ايكعدك
لو ما تشبه القرأن جا ما كطعو جبدك
.....
باجر تنكطع جفين ايسار الكافل ويمناه
يالحسن لون وياه محد يجرء ويدناه
عندك خل نصير اجنود والطف نختصر ملكاه
مَلك اعله الخيام اتصير و زينب تطمئن والله
بعناد النبي وجبريل ماخلو نفس عندك
لو ما تشبه القرأن جا ما كطعو جبدك
.......
بمعركة الضماير جان سيفك بالحرب وحده
والوادم شراها ابليس سمعو كل حجي العنده
بس صوتك ولاسمعوه ماي ابكربله اتبده
و من فجعت محمد بيك مدري اشحصلت جعده
من شافو محمد بيك كالو بغضا ابجدك
لو ما تشبه القرأن جا ما كطعو جبدك
......زهير الابراهيمي
@HxzEU1#قناه_نشر_القصائد_المنبريه