#محرم_1446هـ ( العباس - وزينب ع )
ما جاني خبر .. طايح عالنهر
من وحدي افزعت .. من شفت الخطر
عجت للخيم .. والحيل انهدم
من صارت صدگ .. مـا وصـفه الألـم
وين انته وين .. هسه انه وين أركض
وذاك الحُسين .. بـي الخـيـول أتـرض
خويه ارد اموت .. بس الگـلب يرفض
الــمّـن بعـيالي ويـطـشون بـيـهه
ذهيله ابلا حامي التـعـب عاميهه
حرت بيهه ارقيه زغيره وطاحت
خفت بس لا حافر يدوس اعليهه
=========ـ
سبع الگنطره .. عني اشأخره
من ضيمي صحت .. وانه امخدره
يل من الهوى .. من نمشي سوه
تـوكـف سد الي .. وتـرف اللــوه
چـنـت ابـدلال .. ماكـو شَّـبـه مثـله
وهسه ابحبـال .. وصعدوني عالهزله
صح بـيه روح .. بس انه مـو عـدلـه
انّا الـ بس ابـزودك عشـت مهـيوبه
يخيّ شوف عيوني اشكثر متعوبه
دلال اخـتك رايـح وحـگك صـعـبه
ويعبـاس گـادونـي ابحـبالي النوبه
=========ـ
حيره اتحيرت .. واشكد حاولت
انـــدل يـا كـتـر .. وين انته طحت
صديت الرعب .. بـدمـوع الگلب
ليـش البـت علي .. مگـلـوبه گـلـب
خـيـل وعــذاب .. والدنيه مو دنيه
ابـلـيــل ونـهـار .. صرت انه مسبيه
واركض واطيح .. وانــداروا اعـليه
اصيح اعله الطايح يعمه اسم لله
بعد مامش حـامـي محـامينه الله
ولا چنت امحسبه اشوف ابعيني
بنات ابـن الــزهره مشن عل هـزله
==========ـ
هذا اكبر جرح .. وذابحـني ذبح
من رحت ابيسر .. بي طفوا صبح
شحمل يا هضم .. يوصل للعضم
سوط الي يطگ .. وكلساعه انشتم
ما نستراح .. لمن حـدونه غرب
دمع ونيـاح .. تشلع يخويه گلب
من كلشي طاح .. ابداخلي الحرب
مشينه ابلا هودچ مشينه ابصحره
ودروب الشمـاته خـرابه اوْ وعــره
صفه اوداعــك لحضه ولا خـلـونه
بعد مـا ضل حيل البـنـات الــزهره
========ـ
- خيري الصفراني
✍️