#فزاعيات شور
[يعلويات هاشم… ذبحوا السادة]
[يعلويات هاشم… ذبحوا السادة]
______
ضل بس العليل الحالچن يبرة
وهوة علته كلما مشة أتعثرة
خل يشد گفاه بعمامتة الخضرة
وخل يشيل عوچيتة ويگف برة
[خيل الشر أجت… عالخيم هدادة]
[يعلويات هاشم… ذبحوا السادة]
أجت الخيل تركض صاكة أرحيهة
لو حرگوا خيمچن ياهو يطفيهة
اركضن والتگع كلچن سند ليهة
بدربهة الخيل خافن تسحگ اعليهة
[عنچن يالحرم …مابقت نشادة]
[يعلويات هاشم… ذبحوا السادة]
يعلويات خلصت بعد مامنهة
وين متونچن لسوط حضرنهة-
من وحدة أعلة وحدة العبي شدنهة
حتى اليعثروهة أنتن تعيننهة
[الضعنچن مابقة… حارس ولا قادة]
[يعلويات هاشم… ذبحوا السادة]
شدن حيلچن والشدة مگظية
وعلوية يكون تباري علوية
أول تالي زينب تمشي مسبية
ناگتهة هزيلة وماهي مرجية
[تحضرن للسبي… وهالحان ميعادة]
[يعلويات هاشم …ذبحوا السادة]
موش أولامچن هذا الدرب تمشن
وطول الليل سهرانات ما تغفن
على سوگ الشماتة شلون لو فتن
يويلي بمستحاچن بالمشي أتعثرن
[وعليچن چم نذل… بالسوط يتمادة]
[يعلويات هاشم… ذبحوا السادة ]
أمن السوگ القصرهم فرجة سووچن
وأنواع الشتم والحچي سمعوچن
والذيچ الخرابة أنوب ودوچن
يوم أگشر صدگ بالشام راووچن
[ياهو الماسمع… حادي الضعن نادة]
[يعلويات هاشم… ذبحوا السادة]
على رماح الهظيمة الروس مو منظر
ضايع لونهن من گد سموم البر
بكل خطوة أحس جرح النحر يكبر
يهز بالروس وأگبال الضعن يفتر
[راس حسين وي.. أخوانة وولادة]
[يعلويات هاشم… ذبحوا السادة]
________
✍::️حسين حمدان الدلفي