الناشر غيث اللآمي(للقصائد المنبريه)

#شهادة_مولاتي_رقية_ع

ما اريد الماي اريد عيونك
بويه ورده ذابله من دونك

يشرح احوالي الذبول
راسك بحجري شأكول

....................................................

ميـــــته و عيوني تــــسولف للمصاب
شعري اسود جاني راسك شعري شاب

طفله و صعب يـا حالي
و فكدك صعب شيحمله .... تاليهه ترجع دامي

كتلي اردلج و الله
و تعلـــــقت امالي ...... و ما شفتك بأحلامي

موعدنه بــــويه هنانه .... لاجن تردلي سالم
بجفك تطيب آلامي

ما متت لسه و اناطــر جيه
بويه مو طبعك تعوف بنيه

تحبها فاطـــمة البتول
راسك بحجري شأكول

.............................................................

واعدتني تردلـي راسك بالجسد
شنهو صار و موعدك بويه ابتعد

ليش ابتعد موعدنه
و انه جنت منتظره .... افرح و ارد الحجرك

تالي الوكت خلاني
مسبيه گيــد بإيدي .... و يرجعي دامي نحرك

و الصعبه بويه اعليه
بصندوك جابو راسك ..... من عمري ريت العمرك

و الله يمك حــايره و لساني
ما نساك و ما نساها اخواني

منك الــــــــظالم ينول
راسك بحجري شأكول

...........................................


طــــير ما تقبل اشوفنه يموت
تالي راسك للخرابه هنا يفوت

موتي ردت مو موتك
لا و الله يا ضي عيني .... ما ردته بالطف موتك

ردتك تجي توسدني
بكبري و تهيل اترابي .... و فاتحه تقره بصوتك

تالي نگلب كل ضني
و ماتت يبويه احلامي ... و صندوك الي تابوتك

اليفگد اهلــــــه حالته معروفه
جرحه بس موته طبيب يروفه

و دمعه ما ينشف يطول
راسك بحــجري شأكول

.......................................

بـــــويه اسئلنك ترد ليه النشد
تدري گلبي بويه ما يـحبل بعد

بُعد الحبايب غربه
جدي علي گالاها ..... و بعدك اساس الغربه

فوگ السياط و ضيمي
انشد خواتي عنك ..... يبجن و احس ابرهبه

بعدك عدل كل ضني
و ترجع الي يالغالي ..... و ابقه اطوفك كعبه

تالي سهم الــــــفاجعه ياذيني
و فرحت گالو اجاني حسيني

شنهي يا بويه الحلول
راسك بحجري شأكول

.......................................


حلي يــــــــابويه اودع دنيتي
شلي بالدنيه و كع في خيمتي

كلشي وكع بصوابك
لو عدل لا ما موتن ..... و ابقه اباري صوابك

لاجن اجاني راسك
يعني أأيس منك ..... ما ترجع الأحبابك

موتي يردني الحجرك
بحجرك كضيت اسنيني .... لو كاعده بمحرابك

و بخرايبها الوكـــــــت خلاني
و يامر القاصي صفه و الداني

بموتي بس حزني يزول
راسك بحجري شــأكول

....................................................

#الحمد_لله_على_نعمة_الحسين_ع
✍️ الأقل زين الــعابدين الســـــعدي