-
عندنا قروب تفاعُلي بجمع بنات الحلقات الكنتَ بحفظ فيها
الحلقات دي كلها أون لاين وختمو فيها عدد من البنات ما شاء الله على مرَّ السنين الفاتت وتحديدًا أيام الحـ**رب دي!
أها أمس واحدة من البنات رسلت قالت عايزة واحدة من البنات تسَمّع لَي هسي الآن عشان شبكتي ما متاحة!
ليه شبكتها ما متاحة إن شاء الله خير؟!
لأنها داخلة بي ستارلنك ماسكينّو دعَّامة
😃!
البت شبكتها كعبة
وصحبتي فتحت مكالمة بالنت عشان تسمّع ليها، حرفيًا البت حاولت أكتر من 20 مرة كل شوية تبدا آية والشبكة تقطع وترجع تتصل تاني وهكذا كم وعشرين مرة
وبتقول لي صحبتي دي عليك الله اصبري علي معليش الشبكة هنا كعبة
هسي منو عليك الله اليقول معليش؟!
ذكرتني صحبتي في الجزيرة طولتا منها شديد، يوم اختها دخلت بي ستارلنك فقلتا ليها عليك الله فلانة صحبتي كيف وليه ما بتجي معاك للشبكة وفاقدنها و و
قالت لي بتجي الشبكة يوم حلقتها بس تسمّع للشيخة وترجع طوالي!
صحبتنا قاعدة في الحاج يوسف لي يوم الليلة ده
رسلت لينا في عز الدانات والضرب والكهربا المافي والموية البشتروها و و
رسلت تبشّرنا إنها ختمت تبارك الله!
صحبتي بتحكي لي بي طالبة كانت هي بتدرسها في حلقة أون لاين، البت فجأة غيابها اتكرر فصحبتي بتسألها يا فلانة ليه بتغيبي عن وقت الحلقة؟!
قالت ليها يا شيخة الحلقة بتكون بعد جلسة الكيماوي حقتي ومرات بعد الكيماوي بكون غايبة عن الوعي فما بحصل وقت الحلقة، وتشيل وتعتذر
يعني هي طول الوقت ده بتجاهد في حفظها وهي عندها كانسر وبتتعب ويغمى عليها وبرضو ما خلَّت الحفظ؟
هسي اليعتذر منو!!
ذكرتني واحدة من شيخاتنا في المعسكر كانت بتدرسنا الحلقة وتمشي لي جلسة الكيماوي وتجي راجعة تمسك حلقة الفجر
تبارك الرحمن
أنا تقريبًا لو قعدتَ أحكي ليكم القصص واضرب ليكم الأمثلة البوست ده ما ح يشيل ولا يكفي واللهِ!
ياخوانَّا القصة ما قصة زمن أو تفرُّغ للقرآن
ولا قصة منو فينا وقتو متاح وصحتو كويسة وظروفو سمحة!
الناس دي مع الدعامة بتحفظ
وفي عز الدانات بتحفظ
وهي عيانة بتحفظ
وهي ماشة تاخد الكيماوي بتحفظ
القصة كلها هنا ده= قلبك
لو قلبك ده صَدَق
واللهِ لو في فراش المو**ت بتحفظ
العايزة أقوله
شايفين ديل؟؟ كلهم حجة علينا
ح يجو يوم القيامة يقيفو معانا في حتة واحدة
وربنا يقول لينا ديل كان عندهم نفس الحـ**رب الكانت عندكم
ونفس الظروف بل اسوأ
أديتك العافية عملتي بيها شنو؟
وأديتك الوقت أنفقتيهو في شنو؟!
وقتها ما ينفع أبدًا نقول "ربّ ارجعونِ لعلِّيٓ اعَمَلُ صالِحًا فيما تركت"
الجواب وقتها حيكون شنو؟! "كَلَّآ"
في الخِتَام زي ما قالت تسنيم:
_قادرة؟ =ما تقصّري
_ما قادرة؟! =اتقَدَّرِي
"انفِروا خِفافًا وثِقَالًا وجاهِدوا بأموالِكم وأنفُسِكُم في سبيلِ الله"
♥️- صفِيَّة مُصطفى.
#قرآن.
