أذكر أول ما بدأت أنزل المستشفي الحكومي اللي جمبنا للتدريب أثناء الكلية، تاني أسبوع في المستشفي دخلت عيادة الباطنة للتدريب، وجدت دكتور كبير فالسن(حوالي خمسين سنة)، اتعرفت عليه  وقدمتله نفسي وإني حابب أتعلم وأخوض التجربة بدري، فرحب بيا جدا ووجدت صدره رحب إلي أبعد حد  وأخذ يشجعني قولاً وفعلاً .. جابلي كرسي وقعدني جمبه عالمكتب وقالي أنا هشخص وخد بالك من أسئلتي وبعد ما أخلص هشرحلك  ، كان كل حالة تدخل يشخصها ويقعد يشرحلي وبعد ما يخلص ميرضاش يكشف علي الحالة الجديدة إلا بعد ما يتأكد إني فهمت . الدكتور محمود إكتشفت بعد كده إنه واخد الدكتوراه وعلي قدر كبير من العلم (أخبرني بذلك مدير المستشفي بذاته)  وهو اللي عرفني علي موقع Medscape وغيره مواقع كتير ومراجع فادتني جدا ، فادني أكتر من دكاترة الجامعة اللي بيدرسوني طول سنين الكلية(مع إحترامي وتقديري لهم ولفضلهم)  رغم قصر المدة اللي لازمته فيها، وبالمناسبة المواقع دي نصحت بيها ناس كتير جدا . الدكتور محمود توفي إلى رحمة ربه من وقت قريب ، وكل الناس اللي دلتها علي المواقع وكل نصيحة طبية بنصح بيها أي دكتور  أنا متأكد إن هيكون ليه فيها نصيب من الحسنات إن شاء الله . فنعم الرجل هو عليه رحمات الله ، ويا حبذا لو كان كلّ الأطباء علي هذا الخلق العظيم والنّبل الشريف والصبر على الصغير وتحمله . قال رسول الله صلى الله عليه وسلم: إذا مات ابن آدم إنقطع عمله إلا من ثلاث صدقة جارية أو علم ينتفع به أو ولد صالح يدعو له .