#حصرت_حر_بن_یزید_ریاحی کربلاده حرّ ایـدوب ثابـت مقام عشقنی
اشگیله تپراقدا یازدی توبهنون سرمشقنی
ایلمیشـدی بیـر اوزون مدّت خداونده گناه
عقلنه ایتدی رجوع گوردی ایدوبدور اشتباه
ایتمسه توبـه اولار محشـر گونینـده روسیاه
اشگیله توپراقدا یازدی توبهنون سرمشقنی
عقلـی ایلـردی ملامت نفس شومین متصل
چوخ نصیحتلر ایدوبدور بلکه ایتسون منفعل
عاقبت اوز ایتـدقی اعمالـدن اولدی خجل
اشگیله توپراقدا یازدی توبهنون سرمشقنی
نور حق ایتـدی تجلـی خاطـر غمناکنه
ویـردی بیـر تغییر حالت فهمنه ادراکنه
تا اوزین سالدی شهنشاهون قدوم پاکنه
اشگیله توپراقدا یازدی توبهنون سرمشقنی
ایتدی فرمایش امـام آرتـورما قیـل و قالوی
باشـوی قوزا گوروم کیمسن بیلوم احوالوی
من او بدبختم دیدی قورخوتموشام اطفالوی
اشگیله توپراقدا یازدی توبهنون سرمشقنی
من او بدبختم یول اوسته مانع اولمشدوم سنه
من او بدبختـم سنـی تسلیم ایدردیم دشمنه
من او بدبختم خطا سنـدن گلوبـدور شیونه
اشگیله توپراقدا یازدی توبهنون سرمشقنی
من او بدبختم که غرق اولدوم گُنه دریاسینه
من ساتردیـم دینمـی دینسیزلـرین دنیاسینه
من او بدبختم که عاق اولمشدی اوز مولاسینه
اشگیله توپراقدا یازدی توبهنون سرمشقنی
من او بدبختـم خجالتـدن یوزیمی دوتموشام
من او بدبختم که جام غصّهدن قان اوتموشام
من او بدبختم پیمبر قیزلارین قورخوتموشام
اشگیله توپراقدا یازدی توبهنون سرمشقنی
من او بدبختم یوزوم قاره گناهیم چوخ ذلیل
تاپماغـا چاره قـدوم پاکـوه دوشدوم دخیل
بـو گنهـکاره اؤزون اول درگـه حقـه دلیل
اشگیله توپراقدا یازدی توبهنون سرمشقنی
حمدلله اولمَدیم توفیـق ویـردی حـق منه
قالمـادیم حیرت طریقنده یئتیشدیـم ایمنه
خاک پایونده توکوپ گوز یاشی یالوارام سنه
اشگیله توپراقدا یازدی توبهنون سرمشقنی
ایتـدی فرمایش امام ای حـرّ سـن آزادهسن
ایلـدون توبـه قبـول ایتـدی خدای ذوالمنن
گوردی چوخ یاخشی ثمر واردور نهال توبهدن
اشگیله توپراقدا یازدی توبهنون سرمشقنی
قوزادی باشین دئدی ای میرحق ای شاه دین
قوی گیـدوم گمره سپاهی ایلیوم آگاه دین
ویر اجـازه مـن اولـوم اوّل شهیـد راه دین
اشگیله توپراقدا یازدی توبهنون سرمشقنی
قوی بو صحراده لباس جنگی اوّل مـن گییم
قوی گیدیم گمره سپاهه سوزلرین حقین دییم
قوی منی بیرده خانملاردان گیدیم عذر ایستیم
اشگیله توپراقدا یازدی توبهنون سرمشقنی
گیتدی بیر بـاش خیمگاهه زینبه ویردی سلام
عرض ایـدوب ای سرپرست عترت خیرالانام
گلمیشم عُذر ایستیم یولدا سیزی قورخوتموشام
اشگیله توپراقدا یازدی توبهنون سرمشقنی
گیتدی میدانه نصیحت ایتـدی قـوم و قارداشین
جـان ویرن وقتـه امام آلدی دیزی اوسته باشین
گوردی بوحالی فرحدن توکدی گؤزدن گؤزیاشین
اشگیله توپراقدا یازدی توبهنون سرمشقنی
روز عاشورا سپاه کوفه چوخ مسروریدی
مـرد نصـرانی حسینـون قتلنه مأموریدی
قتلگاه کربلانی گـوردی رشگ طوریدی
اشگیله توپراقدا یازدی توبهنون سرمشقنی
سویلـدی سنــده یـارالی نور حقّه ناظرم
گِچ گناهیمدن منی عفو ایت پریشان خاطرم
سن کیمی قربانه قربان اولماقا من حاضرم
اشگیله توپراقدا یازدی توبهنون سرمشقنی
من مسیحیزاده، عیسی دینینون پابندیم
اهل توحیدم، خـدای لاشریکـه بندهیم
ایلدیم توبه گذشت ایله منی شرمندهیم
اشگیله توپراقدا یازدی توبهنون سرمشقنی
«کهنمـوئی» بنــدۀ حقـسن، ولـی آزاده سن
بوینـوا گَـل سالمـا ذلّـت طوقنی دنیاده سن
ایت حقیقی توبه، حرّین توبهسین سال یاده سن
اشگیله توپراقدا یازدی توبهنون سرمشقنی
#مرحوم_کهنمویی