مالت دنياي وفرهدنه البين زينب لاوين ترحل يحسين ...................................................... عفتك خويه مدري أشلون مشيت وخطن أجدامي أمشي وكٌلشي يمشي وياي شوكي وجرحي وأحلامي وآنه بكل خطوه أتعثر وأرجع أشتــم عطرك هيل من طر فجر الله الحد مــا بين نجمك آه يسهيل عطشانه وحيلي أتطشر حرمة وتركض نص الليل بعدك يحسين وكـــــل عمري دمعه وآهات او ويل ما جن خمسين عمري طفين زينب لا ويــن ترحل يحسين ......................................................... أخذني الشوك مدري الوين خويه وتاهت أفكاري شفت روحــي أعله كبرك ماي تتبده وتشب ناري شميت أترابك يبن أمـــــــي وحسيتك هم عطشان يا وسفه لو جنت وياهم جــــــــــــا وصيت الدفان جا كتله أمن الدوس بصدرك صاير صدرك ميدان وتلث تيام أعله الغبره باقـــــــــــــي أوسد التربان جثه بـلا راس عفتك بعدين زينب لا وين ترحل يحسين ......................................................... لملمت الجروح وجيت أودعك وأمشـي مكسوره أمشي وخويه جني أهلال بكل خطوه ألك صوره مره أرسم شاطي أعله أجروفه فارس ريشاته أكبار طايح عطشان ومتوذر وبجوده حلــــــــم أصغار ومره أرسم خيمات أطفالك ويلــــي وتاكلها النار ومره أرسم نسوانك تركض حفاي وبيها شصار وأرسم عباس راس وجفين زينب لا وين ترحل يحسين ......................................................... مثل ما جيت من الشام رحت أمشي بنساوينك واكعد كعدة المكسور وأضــــل أفكد حياطينك أحسب للباقي من عمري تخلص وأتلاكه وياك وترجع كعدتنه ولمتنه وترجــــــع زينب بحماك عهد الله يحسين وزينب مالحضــــــة بيوم أنساك باجر لو بيه أيمر موتــــــــي شايل تابوتي ألكاك حتى لو طيف وأتكحل العين زينب لا وين ترحل يحسين ......................................................... جبت كل ذكرياتي وياي يحسين وكمت كوه أسولفهن سوالف شوك وأتحسر علـى الخوه وي أم عباس شما أكعد يعرض كدامي الماي وأتكلــــــي عباس شسوه ويصب مدمع عيناي كلتلها الطف جان شويه وعباسج جان أهواي ما قصر يا يمه وحكج وفـــــــه بعهوده وياي ونقره بكل ليل سورة ياسين زينب لا وين ترحل يحسين .................................................. خادم خدمة الحسين الشاعر محمد الموالي