الشاعر علي الزيداوي

السلام عليك يارسول وحبيب الله




محتاجينك    يارحمه وياباب النعمه

محتاجينك    ياشمس الله واول لچمه



اجيت بؤءد واستعباد تُهتك كل وكت حرمه

اجيت وللبداوه اشكال تتمرد على الزحمه

ينهاب القتل والمال والعين الصدگ تعمه

تتصدر قبائل موت تغزي ايام على الكلمة




محتاجينك  ... تترافع وتصون الحرمه

محتاجينك  ... ياشمس الله واول لچمه




اجيت وهل ربيع سنين عجفت وانطوت يمك

محمد يا رحيم وخير خضر چم ثمر  بـ سمك

من يثرب لحد البيت نفحة جنة نشتمك

اذوك ولا فهموك طعنو چم نبي بحلمك





محتاجينك ... كسرو خاطر عين النجمه

محتاجينك ... ياشمس الله واول لچمه




جبريل و علي  وقران ينعوك وضوه العتره

بچتلك حد بياض العين بيت احزانك الزهره

مثلك ما يصح ويكون رحمة كوّنا الكبرى

انتَ المصطفى وأيات اسمك بالسماء مخضره




محتاجينك ... قرانك ما جاي انفهمه

محتاجينك ... ياشمس الله واول لچمه




وتوالت علينه اشكال نهشت بينه واتعدت

يبو الزهرة وعلي ضلموه واسلامك عليه ردت

عصات وابرهه والفيل وسيوف الغدر حدت

عدت چي علي قران بسم المرتضى عدت



محتاجينك ... سموك وما گالو سمه

محتاجينك ... ياشمس الله واول لچمه




يا ليلة وبدى التوديع ياخذ حيل عترتكم

وحسين انچفه ويريد يشتم من معزتكم

وعيون الحسن بدموع صدت عد ملامحكم

وبده لحن النعي يرثيك واتوشحت زهرتكم




محتاجينك ... ياشوف الله ودونك نعمه

محتاجينك ... ياشمس الله واول لچمه



خادم النبي واله الاطهار
الشاعر علي الزيداوي

يخويه بهل الضعينه   جينه يحسين
بعد عزنه انسبينه       جينه يحسين


يبن امي وحمانه           جينه يحسين
بعد صاحب لوانه
العسكر فرهدانه

وتدرينه شبدينه    

طفلتكم  رقيه              جينه  يحسين
عد راسك رميه
وافتها المنيه

ويلچمك حچينه 


يبو الاكبر يغالي           جينه يحسين
بعد عزي ودلالي
تعال انظر لحالي  

نسوه مگيدينه


شام الهم سطرته             جينه يحسين
وابوي الهم ذكرته
يزيد بذل دحرته

الك دايم بچينه

 
رضيعك هذا راسه        جينه يحسين
متهشم اساسه
نذل حكم الرئاسه

بخرابه مگعدينه

اهل بيت الرساله       جينه يحسين
لفينه  بغير حاله
يمينه ولا شماله

لبو فاضل حزينه


لا جاسم والاكبر       جينه يحسين
لا عون ولجعفر
ايتام وي خدر

منك للمدينة


قصرهم شكله عالي       جينه يحسين
الماعرفوا خصالي
قدرهم من نعالي     

ريسهم نهينه


تقبل صبري مني       جينه يحسين
بيكم عالي ظني
مصايبكم عمني

يا اوسع سفينه




علي الزيداوي

حسين حسين حسين


من مهدي وعاشگ حبك راسم دربي وياك
يادمعي يامرجع حزني مالكني هواك



يافكري وياماي عيوني ياشاغل حسبات ضنوني
دمك عنواني لثارك طالب عايش واريد


يامنهج ياراية وثورة يالتنزف آيات بنحره
منصور بقتلك خالد واصبح طفك نشيد


انتَ الفوز الما يخسر تعله وتكبر حسين



يا رآية ورفت للعالم يامبدأ شامخ
ما سالم
كل ظالم بسمك يسمع ينخض يصبح سراب


طفك ثابت ما يتهاون لاءك ثورة وما تتعاون
وي حاكم يحكم شعبه بجور وقسوه وعذاب


انتَ الشعله الما تطفه ضاوي بطفه حسين




درسي انتَ ومضمون افكاري يامنبر حزني واشعاري
واليتك ماشي بدربك ذايب انزف جريح



خسران الما ناصر دمك مايشهر سيفه لضد ضلمك
عهدي بكل ساعة وكل ايامي اهتف ذبيح


انه بذكرك اتعافه وكلي اتشافه حسين


ياثار الله البسمك قائم سجيل وعالظالم ناقم
ما يخشى ولا يتحاشه بثارك روح ودماء


مهدينا لحد گبرك يحضر ويراويهم موته الاحمر
ويترجم حزنه يهل ادموعه بليلة عزاء

انتَ الثار الما يبرد دمك سرمد حسين




خادم الامام الحسين ع
الشاعر علي الزيداوي

((الامام الحسن المجتبى عليه السلام))


ليلة دمع سابــــع صفر

چانت تحضرلي الصور

چبد وطشت  ** مني شردت

  سابع صفر


ياخويه مدري شگد اخذ مني الحزن

زينبكم انه مدلـلـه وليلــــــي اليجن

يادمعة مــــــن بعدك تهيد وتستچن

وعيوني ليك تحولن سيل ومــــزن


خويه واحس سمك مضه

بحشــــــــــاي يبن المرتضه

چنك نلت   **  مني شردت

           سابع صفر


اسهام نعشك صورن كــــــل كربله

من چثت حسين انترس بيها الفله

طشت الذهب وي طشتك انعرضن على

امي الزچيه وللعرش دمكم عله



چــــــــبدك تسمم والتوه

وحسين هم چبده انچوه

حيل اتعبت  **  مني شردت

            سابع صفر


سابــع صفر أرث وتوارث للگـــمر

يوم بعــدد كــل السماوات اشتهر

لعيونكم مخلــــوقة ياهيبة مضر

جســــام بوصيتك تحزم وانتصر


من يبرز يهـوّن المحن

من شمرته ضنو حسن

منك شبت  **  مني شردت

           سابع صفر


انعيك واشتاگ واحن مثل الهوه

واتذكر ايامك الي رسمن ضـــوه

يامحله طلعتكم لمن نلتم ســوه 

خويه الحسن من غيبتك گلبي انچوه


بعدك دمع ما ضل الي

ياخوية ياريحة علي

وانه شخذت ** مني شردت

             سابع صفر


ياخويه نيران الطفت مــــن دلتك

شبوها مـــــره بخيمتي وبخيمتك

رمله واملها استعرن بنص جمرتك

من طاح جســــام اندبتني ورادتك



وبكربله ماضل امل

مذبوح ياخير العمل

وانه انشدت  **  مني شردت

          سابع صفر





علي الزيداوي

أمشي الك      ياملك دلالـــي

أمشي الك      ياأعز كل غالي



ياحبيبي وعمــري    عاشگك من زغري
الك يرخص نحري    لـــــو ردت وفايه

خــادم وعد بابك    وانحـــــــني لعتابك
ذره من ترابــــــك    للعلل كفـــــــــــايه

كل مسافه جروحي   تدي واعلن نوحي
وافتديك بروحــــي   وانه شايل رايـــه

أمشي الك       وانتَ حسبت بالي
أمشي الك       ياأعـــــز كل غالي




يانجاتي وعـــــــزي       ياوسامي ورمزي
انتَ درعي وحرزي       وبالحشر تنجيني

كل هلي وكل مالي      يرخص ومو غالي
يالبنيت امــــــالي       رايــــــدك تحميني

انتَ ضي العتره         نرجي منك نضره
للعراق العمــــره         عاشگه وسابيني

أمشي الك          وانته شايف حالي
أمشي الك         ياأعــــــز كل غالي




مو عجيبه ونحرك    النه يمتد رفضك
ياحسيـــن شكبرك   دنيـــا ما تكفيلك

موكبك أحزاني     لكربـــــــــله وداني
ياوحـي لقراني     كل خميس دخيلك

أربعينك ثوره     عبرتي وهم عبره
مانريد نخسره     كل جدم يمشيلك

أمشي الك       ياچبير وعالي
امشي الك       ياأعز كل غالي




كل محـــب وزاير      الك جـــــاي وناذر
يضل يبچي وحاير    من عظيم الخدمه

منذهل ويشاهد     والعيون تراصد
كل چبير وقائد      للخدم متحزمه

والخلگ تتســـاوه   چن حشره تتهاوه
يل الطريقك ساوه   كلها خــادم أسمه

أمشي الك       ياأميــــــر والي
أمشي الك        ياأعز كل غالي



انتَ نور المحشر    من يصير المعبر
تشفعلنه وتگــدر    ياشفيع الســـاده


ياأمــــان الدنيه    ياحلم كل مُنيه
خادمك بالكنيه   الوســـام امراده

بيك ياميزاني    داگ ومـا عاني
ياثگل اوزاني    خدمتك معتاده

أمشي الك     والدمــع يبرالي
أمشي الك      ياأعز كل غالي




من اطب ياخذني   عطرك ويترسني
يافرحتي وحزني    ممتلي بوجودك

من أشـــم زوارك   أنحنــــي واتبارك
من جميع اكتارك   وأرتوي يم جودك

يم أخوك الفاضل    كل نتيجه وحاصل
اليقين الفاعــــل     رآيتـــــك وي زودك

أمشي الك       والنجم يدنالي
أمشي الك       ياأعز كل غالي




علي الزيداوي

السيدة رقية ع


عمري  هلال  *** سلبو كل حلمي وفجعوني

وبيا حـــال   *** طفله بيا ذنب ويسبوني

          مهضومه وحرت بأمري

         العاشر اكبر من عمري


رقية انه وحلم عمري ودعته بأمان الله
اهون بالصبر روحي منذكر وجه عبد الله
من شفت النبل صابه وبنحره السهم صله
بيني وبينه سجاده عثره وطاري اسم الله


انزف اه  ** وي دمعي المابطل ساعة

واويلاه  ** من دهري الحشم اوجاعه

       أيوب اتعجب صبري

      العاشر اكبر من عمري


بمحراب المنيه ايات صلو كل هلي وخوتي
حضرت الجروح بليل سكته وما طلع صوتي
اصد بوجه ابوي حسين وارسم حلمي وموتي
واصفن واذكر حچايات عمي وسيد مروتي



وي الليل     **  اگعد نتعاتب للعاشر

دمعي يسيل ** ع الخد ومكسوره خاطر

      حزني واهاتي وصغري

     العاشر اكبر من عمري 


سرنه والمنيه ابرت شمسنا وگمر والنجمات
وكل نگله  جدم گلبي يفطر وجه الــــولايات
عمتي الزرعت بروحي حيل وعفت احچايات
مو مـــــــوكب ضعن قران بيه تترتل الآيات


عندي احساس ** ينزف قــــــربان القران

والعبـــــــاس  ** ع الشاطي بلايا الذرعان

        ياوسفه وسالم نحري

        العاشر اكبر من عمري


نزلنه بكربله رايات رايه تكــــــــــــاود برايه
جله الغيم بسما الطفوف هل راعي المسنايه
تكفل بالشريعة هناك واعـــد سكنه بحچايه
عطشت غيره گــــــاع الله تروت زلم وفايه


طلبو ثار   **  بغضن وبحيدر عادونه

شبو نار   ** بخيام ونضعف رادونه

     مستعره ويلهب جمري

     العاشر اكبر من عمري


اه الشـــــام اوف الشام زيد بلوتي بلــوه
حدو بينه بلا وليان واليحدي بله مـــروه
عمتي وبالعليل تگود تحدي بريحة الخوه
بعد الاكبر وجسام امشي ولا اثر سلـــــوه



اوف الشام  ** طشتك يابويه العذبني

ضنو نام   ** گلبي ويم راسك موتني

       يل رايد تنشد ذكري

      العاشر اكبر من عمري 



خادم الامام الحسين ع
الشاعر علي الزيداوي

الامام السجاد ع


بانت آيـــــات التكوير
بالطف الصار وميصير
مذبوحه القداســــــــــه
زلزلهم نحــر القربان
متحني بدمه القران
وانه وعمتي الحراســه




نهر ممتد حزن روحي ويبات أبريتي الدخان
جزاء الذبــــح وعـــــد الله رابع آيه بالانسان
وراس الشمس والعباس مذكورين بالحسبان
ذو القربى وضوه التطهير والياسين بالعنوان




من البسّمله وللنـــــــاس
لحروف المصحف حراس
حسين بلايه راسه




سلاسل من ضوه وآيات وتسبح حچي التنزيل
من راس الرضيع الچان ينزف نـــــذر  للترتيل
مره نميل صوب الراس مره الراس النه يميل
هزله النوگ يا عبـــــاس والهودج ابلا تعديل



ضعن الآيــات الاطياب
مهيوب وزاكي الأنساب
طاهر من اساسه





من مجلس عُبيد الله ولمجلس يزيد الشر
رفعنه الثورة دم وقول شّهدنه السما والبر
سمينه الطفوف نذور ترجمنه العطش والحر
تسبيح .. ورضا وآيات وصّلينه اعله المگدر




بدروب الوعره وتگييد
ويصد الراس من ابعيد
يحدونه بشراسه





اعتليت اعوادهم قران بينت النسب والحق
صموا كل سمع بأحقاد لا رف الضمير ورق
معميين بالشيطان چان الشوف عندي ابشق
اتليت الخطاب بروح  حجمت اللسن تنطق




والعار اتلطخ بالقوم
سولفت وضحت اعلوم
هديت الرئاسة




ردينه ودربنه الچان بين الــــــدار بين الطــــف
شاورت الضعن والروس وارواح البدت تصطف
صوبچ كربله ناوين والقــــــــران بأهله أعــرف
احنه العتره اصل النور ولفوگ الثره اشــــرف



بثِينه لطاهه الشكوات
ذبحوا ياجدنه الآيات
بسيوف الخساسه

ـــــــــــــــــــــــــــــــــــــــــــــــــــــــــــــــــــ

إِنَّآ أَعۡتَدۡنَا لِلۡكَٰفِرِينَ سَلَٰسِلَاْ وَأَغۡلَٰلٗا وَسَعِيرًا (4) الإنسان



علي الزيداوي

حسين ثــــــــــورة تمددت


ياسفينة نوح ياسيد الشباب
ياذبيح انحرم من اخر شراب
يايقين اترسخ برغم المصاب
عاشگينك لو صبح حبك عذاب


للاحرار اتجسدت  ... حسين ثورة اتمددت


ياعظيم وموقفك كلش عظيم
انتَ بسم الله الرحمن الرحيم
انتَ ياسين وسراط المستقيم
العاده شخصك صبح شيطان الرجيم


للاجيال اتخلدت ... حسين ثورة اتمددت


ياامان الله الچذب مثلك امان
لوله دمك مانطق كلمة الاذان
حسين مبدى شامخ لهذا الزمان
حسين كلمة الماغلط بيها اللسان


بالافكار اترسخت ... حسين ثورة تمددت


ياهضم زينب وسكنة ملوعه
تناطر العباس راعي المشرعة
ياگلب شافت چفوفه مگطعه
حارت بيا عين تنظر مصرعه



الف عام اترددت ... حسين ثورة اتمددت


كل زمان حسين .. ماتطفه الشمس
من يمر كل عام نتعلم درس
ابكرامة نعيش وبعزة نفس
بينة افكارك مواعض تنعكس



بيك روحي استشهدت ... حسين ثورة اتمددت


ياحبيب الله ياشبل الرسول
يبن حاميها يبن فحل الفحول
بينة عاشور وابد لا ما يزول
عهد ضد اعداكم نصول ونجول



ابد لا متحددت ... حسين ثورة اتمددت



يادرب الاحرار يااروع مثل
ياعمود الدين ياخير العمل
ما نزل عن دربك شمهما حصل
العذاب وياك احلى من العسل



على الجور اتمردت ... حسين ثورة اتمددت



عهد ما ننسنه مصيبة كربله
والمثل عباس راعي المرجله
جمره بينه اتعيش نبلة حرمله
كلمن يضدك حُسين انقاتله



ابد لا متواردت ... حسين ثورة اتمددت





خادم الامام الحسين ع
الشاعر علي الزيداوي

( السبي )


جدم صوب الرحيل  ***  والأَخر ضل عليل

سبو للشام صوتي   ***  وروحي يم اخوتي

                أسافر مستحيل



ليلـــة وداع الاحــــــبة ليلة تنعـــــــــد بعمر
اء يحال الودعتهم شعلـــــو بگلبي جـــــــمر
نجوم  ع الغبره تهاوت نجمه نجمه بلا عذر
عيني بعين الله لاحت لاجله سلمت الامـــر


جفو راحو امس   ***  گمر مني وشمس

الك ربي شكوتي   *** روحي يم اخوتي

                اسافر مستحيل  



ليلة العاشــــــــــر رزيه يخترس يمها الوصف
يوكف التاريـــــــــــخ عدها بالمواقف ينعطف
ليلة عرش الله لاجلها غضب بــس زاد اللطف
سورة الحمد انحروها تساگطت حرف وحرف



نحر صدر قرار    ***  رغم موته انتصار

السبي زود بلوتي *** روحي وي اخوتي

                أسافر مستحيل



ياهضيمة اطلع سبيـــــه واني طبيت بشموخ
ضعني بيه ارجال تحدي شحدها ناگتنه تنوخ
الكل يعرفوني عزيزة انــــه زينب بت شيوخ
اخ وكتي شگد صدعني وروحي ماليها شروخ



صدگ ليلة عذاب   ***  حبيبي اعله التراب

ردت يلفيني موتي ***  روحي يم اخوتي

              أسافر مستحيل




عمه يالسجاد صعبة حسين يتسمى الغريب
وين الاكبر وين جاسم وين الانصار وحبيب
صدى صوت الخوه اسمعه بس انادي ولا مجيب
أتغيب العباس عني وغصب رافگت النحيب




طفو مثل الشمع  ***  بس نوح ودمع

ماتنفض رجوتي  ***  روحي يم اخوتي

            أسافر مستحيل




ودعتكم جسد ناحل روحــــــي نذرت آمنيات
نـــــذر بين حسيـــــن رادت بين كافلها تبات
حيره وي الضعن امشي وضعني مابيه الاُبات
أحساس البروحي شأوصفه اختلط موتي وي الحياة




غفل راحو سوه   ***   الماي وي الهوه

الصبر چانت دعوتي *** روحي يم اخوتي

             أسافر مستحيل





خادم الامام الحسين ع
الشاعر علي الزيداوي

سجلني خادم يامولاي .. سجلني خادم يامولاي


ياحســــــين بهويتي ومرجعيتي مانسيتك
ياامامي بضميري ومنهجيتي شگد هويتك
ياشهــــــيد العقيدة شچم مناره شاهديتك
ياكياني وجودي ياصمـــــــودي عاهديتك


حسين ... حسين ... حسين


وين اسبل دموعي يامالك حنيني ياكياني
وانه دونك مبتلي ضايع وارابيلك واعاني
اقبل دموعي حبيبي يااميري علّي شأني
يلي حزنك مانسيته ولاجفيته ولا نساني


حسين ... حسين ... حسين



بداعتك امك ياحبيبي ياحسين اشفعلي ساعه
بالحشر حبك خلاصـــــــــــي يانجاتي يامناعه
يابرد يمطفي ناري ياخياري واحـــــــلى طاعه
اسمــــــــــك يختم جوازي يا مناي وياشفاعه



حسين ... حسين ... حسين



انتَ روحي وانتَ نور عيوني يامرود كحلها
ياشمس ضوت ظلامي ياگمرتي الهب املها
دنيا وحشه بلا وجهك ياحماي ونفسي كلها
شيعتك عندك امانه وغالي چفك لم شملها



حسين ... حسين ... حسين



دمك يروي الضماير ما تلاشه و بينه ثـــــوره
قائد احرار المنايا تبقى عايش بينه عبـــــــره
ما نهاب اعدانه نرهب كل ظلامه عدنه فكره
مدرسة طفك روتنه مانسينه وخذنه شمـره


حسين ... حسين ... حسين



كون ياكلمن يحبك يتضح باخــــــلاقه فعله
انتَ آيات الطهاره من نقلدك احــــــــنه نعله
بالسمه وجهك قرينه واقتدينه باضوه شعله
خادمك ناذر حياته يلي بأسمك قــدره يعله



حسين ... حسين ... حسين






خادم الامام الحسين ع
الشاعر علي الزيداوي

مــــــــو دمع النزل مني    يمر سال

وعسى عمر اليمر بعدك    يمر سل

اخذ لحسين لوعاتي     يمرسال

وگله ام البنين اتريد جيه




حتى الهـــوه البطف      مر علينه

وصفت گاع النوايب    مرعى لينه

لـــون عباس لحظة      مر علينه

يشوف شلون تسبه الهاشمية




خادم الامام الحسين ع
الشاعر علي الزيداوي

رحلة السبي



أذكر موطني - وظهري ينحني
وتعرض كرامتنه

وأستذكر هلي  -  وريحة منزلي
وسادة عشيرتنه



ااه يارحلة سبينه اتخرس حروف الوصف
ايه ايه بضوه المصحف سرنه وبلايه عرف
گِيودنه انطبعت بدينه وسببت حــالة نزف
مــــــــن خرابة لعد خرابة بالرمايل نلتحف



يمرني كل مسه  ..  انه الحارسه
وياحاله حالتنه
واستذكر هلي  ..  وريحة منزلي
وسادت عشريتنه




وبعزاء ربنا انتعزه وبوصــــــــية ابن الفحل
بعين الله الروس هايه والفده وكل الحصل
العاشر شبيه مـــــن مراره ماتوصفها الجُمل
داسو بصدر النبوه واذبحـــــــو خير العمل



عليل وعائله  ..  سورة وبسمله
ياغربه غربتنه
واستذكر هلي  .. وريحة منزلي
وسادت عشيرتنه




النوگ هزله واحنه هزل والحدي طال وبعد
تسئل وتنزف رقيــــــه وسكنه ياعمه شبعد
وابن اخوي المرض هده واستحه وبيه استند
الضعن سويته خيمه وصرت تچايه وعمد



زادن بلوتي .. متوني ودمعتي
ظلمه خرابتنه
واستذكر هلي .. وريحة منزلي
وسادت عشيرتنه



الشام اه الشام يوجع مجلس الشؤم الامر
من يلاعب خيزرانه فــــــوگ شفات النهر
ابن ابو سيفان يسئل ياهي حاليله الدهر
انه من تربات حيدر نجمة اخت هذا الگمر



ماليهم رعب ..  بالسلم وحرب
ياعلي شيمتنه
واستذكر هلي .. وريحة منزلي
وسادت عشيرتنه




خلصت رحــــلت سبينه ورجعت بالعايله
ردت الروس لاهلها وگضت صحبت كربله
ها يخوتي ليوث حيدر زينب انه مدللـه
من بعد عشرت عمرنه حايره افتر بالفله



چفك محملي .. ياريحة علي
يامحله خوتنه
واستذكر هلي .. وريحة منزلي
وسادت عشيرتنه




صوفرت ارض المدينة بعد بيمن نحتمي
دم ترس بيبان اهلنه اسبعطشهم هاشمي
ااه  ياام  البنين  بزود  اخوتي  توسمي
العليله بلا رقيه واثر چفها بمعصمي


محمد من سئل .. زينب وشحصل
چا وين لمتنه
واستذكر هلي .. وريحة منزلي
وسادت عشيرتنه



خادم الامام الحسين ع
الشاعر علي الزيداوي

يريت الكون سبني    مو سب بية

ولا شام اليمرني      مو سبية

انه وداعة العاشر   موسى بيه

اشگ بطن الارض لو شلت اديه




حزن طفك حده ايامي    وعاماي

وعسى شوفي مثل جابر   وعاماي

التظن جربة ابو فاضل   وعا ماي

بحر عباس وفه لعد اخيه



الدموع بفگد ابو اليمه       لاهلها

وليالي شهر الامحــرم        لاهلها

سكنة تنوح وتـــنادي        لاهلها

الصفو كلهم جثث فوگ الوطيه





عسى لا هل دمع عيني   ولنساب

شــــــرف للعالم العتره     ولنساب

چنت مااظن سبيه اطلع    ولنساب


عگب عباس سبع الغاضرية





خادم الامام الحسين ع
✍الشاعر علي الزيداوي

( السيدة رقية و الشام والخربه)


يندهني الوجع من تغفه العيون
حيطان الخرابه اتلچم الامـتون
تدي جروحنا مغطيها الاتــراب
شيغمض الجفن والنايبه تهـون




اه الشام مر الشـــــــام ما تنوصف حالتنه
ابوي اعله الرمح راسه ساعه موت طبتنه
عاشر كربله ما طاب هّم  زادت مصيبتنه
تشهادنه سبايه الناس صح عدلين بس متنه



ندبت وبس صدى يرجعلي ويگول
سبيه ميسره وحاميها مــــــــكتول

گاع وما يصح لا سگف لا باب
شيغمض الجفن والنايبه تهون





غربه ومايصح حماي النه وللضعن كافل
سم حچي الشماته احجار ناس وسلف متحامل
شگله الماعرفنه وراد يسئل اه يالسائل
احنه القربه بالآيات والتفسير والنازل



ليالي العشر والترتيل والنور
بالاحزاب هذا الضعن مذكور

بعدكم لا هنالي النوم لا طاب
شيغمض الجفن والنايبه تهون





هزله النوگ وجروح الجدم بدروبهم وعره
لضه النار ولهب الاخيام خلّف بالگلب جمره
هذا الــعلثره مذبـــــوح محمد شامه بنحره
ومن طاح الگمر عباس گبل الخيل رض ظهره



ثكاله والرعب والخوف وايتام
واتشوه رسم آيات الاســـــــلام

ودّمــت شمسنا والگــــمر غاب
شيغمض الجفن والنايبه تهون





مجلس شؤم طبيناه وابن الدعي يتشيم
راد الذل يراوينه هو بعزنه حيل اعــــــلم
خطبة عمتي زينب والسجـــــــاد من غيم
مطروا واعتلاها الطير روس الحشد وتلعثم



من صاح المنادي وحان الاذان
هذا البطشت لحسين قـــــران

ولهذا الاذان انفاسنه اسباب
شيغمض الجفن والنايبة تهون





طشت الذهب لاشفته ولا صديتلي بعيني
عمن من كونهن شافن وينضرن على حسيني
حضنته ولنها حضنت موت غفله وهود اونيني
ولعزه الصبه حنيت مــت  ورخصن اسنيني




يا اخر نفس لانفاسها الروح
وتلاگن سوه المجروح مذبوح


ما يهنالي عيش ابُعد الاطياب
شيغمض الجفن والنايبه تهون





خادم الامام الحسين ع
✍الشاعر علي الزيداوي

#الدفن



اواري اجساد الاطهار * طفت بالطف الاقمار
              شدفن جوه الاتراب
               عزاز وكلهم احباب
               لدماكم نطلب الثار

بعمد من بالضعن مروا والاجساد خضبه بدم نحرها
ما راعوا يتامه ولا نساوين خولي ولا شمرها
لگينه حسين متوذر على الگاع وهوت عمتي بنضرها
وصدت علشريعه وشافت چفوف طاحن من گمرها


بچي ونياح الايتام * لابوها وخوه وعمام
             صرعه وصفو غياب
             عزاز وكلهم احباب
             لدمائكم نطلب الثار



حزينه الكوفه تدمع من بالآيات لفينه لعمتي ذكره
عزيزه اسنين عاشت بيها وايام جزت والنار سعره
هاي مخدرة حيدر علي الزود خذت من عنده شمره
ثار اجدامها من تمشي علگاع يجي الكافل يطشره


خذونه لقصر الاوغاد * لباغي أنّـسـب لزياد
              اطهر نسل وانساب
               عزاز وكلهم احباب
               لدماكم نطلب الثار


بإرادة الله من بالسبي ورديت ادفن روح الآيات
المعصوم دفنه اتولى معصوم حجه لحقنه واثبات
شلته اباريه مگطع للاوصال بچت عين السماوات
دم حسين موقف خالد يعيش كتب للذله هيهات


بدور الطف مطاعين * نشامى وحيل غالين
             شباب بظهر شياب
             عزاز وكلهم احباب
             لدماكم نطلب الثار



لن صوت النحر يابويه خليه عبدالله اعله صدري
والاكبر وسده يمي ولمه وياي بوس اوداج نحري
وسلملي اعله زينب گلها الاحسين يگول اتعزي اصبري
بعزاء الله العقيله الكلفه ام عون اخيتي تقبلي عذري


رايه بيوم عاشور * كفيله وللضعن سور
        بعد متغيب الاطياب
         عزاز وكلهم احباب
         لدماكم نطلب الثار


رحت صوب الشريعة وگلبي مصيوب واجر بثوب حيلي
ولميت الچفوف وشلت الاسهام من عينه لدليلي
عمي وصاحبي وتارس ضوه العين عباسي  وخليلي
دفنته وگتله عمتي گالت وياك تشكر من كفيلي



الانصار الغدو حيف * نحور انچوت بالسيف
              كلفه رجال الاصعاب
                عزاز وكلهم احباب
                لدماكم نطلب الثار




خادم الامام الحسين ع
الشاعر علي الزيداوي

السيدة رقية ع


آثار حبل السبي         وآثار ســــوط الشمر

صارن امتوني زرگ   وچفوفي صارن حمر

مـــــحتارة بآلامي  _     وبراسك يالضامي




انه يابــويه عليله من اهـــــد ذاك الــــــمســه
ويه طيحت عمي شفتك حزنك بروحك رسه
ولنك اتبعته بمنيه والــــــــوعـــــــد ذاك انسه
بويه من عفتوني وحدي عمتي صارت حارسه


    يحدون بينه زجر لاشيمه لا من بخت 
وجدامي بويه التون   وعمتي بأسمكم نخت
        محتاره بآلامي ــــ وبراسك يالضامي




رحنه للكوفه وسبونه راسك يرتل الكهف
گلنه لابن زياد وسفه تدري شنهي الي اختلف
هذا كرسي الچان جدي بيه علي حاكم هتف
كلا للباطل لحد ما .. بمسجد الكوفه نزف


النبي الاكرم ذكر     مايجري في كربله
نحور تجري وسبي  تتعذب العايله
     محتاره بآلامي ... وبراسك يالضامي






بويه وعره بلايه رحمه والدرب كلش خطر
صعبه ياحاله انتوصف لا شمسنه ولا بدر
كعبـــة لمتنه وحــوتنه عمتي ذيچ ام الخدر
گالت الروس ابعدوها والنذر يفدي الستر


مكتوب لآلك علي      قـــــــربان دم وحرگ
الشيب بيه اشتعل   ياعودي مالي خلگ
     محتاره بآلامي .. وبراسك يالضامي





بويه باب الساعة شامت لا رحم بينه الجره
ألتفت بعيونه راسك والرمح بز منحره
طبت السوگ شكبرها لحظة چنها الاخره
كلها الاعيون إتّـهضمنه الـــدره والما دره


بين الحجاره وشتم   منظرنه ما ينوصف
بالشام ذاب الگلب   بترابهم نلتحف
   محتاره بآلامي .. وبراسك يالضامي



مجلس الشام الهضمنه بويه بيه ضاگ النفس
شفته بشفافك يلاعب بالهضم دمعي انحبس
احضنت طشتك يغالي بأذني من راسك همس
بنيه وتشم راس ابوها موتي وي موته التبس

بنص الخرابه الضعن  لا خيمه لا من من اهل
والراس لينه يصد ويهون بينه الحصل
محتاره بآلامي ـــــ وبراسك يالضامي




نسألكم الدعاء
خادم الامام الحسين ع
الشاعر علي الزيداوي

يبتدي الفـــراق  **  يبتدي الآلم

من على النياق  **  أتودع الحرم

                رحــلة الأباء
               أبكت السماء


دمعة دمعة ذابت شموع الضعن والعايله
يوجع فــــــــراگ النحبهم ياگلب يتحمله
ياوداع احباب روحـــــي اء ينبله حرمله
حسين شمس الله وضواها طفت گمره كربله


ليلة الوداع    **    ليلة الحزن
اعلن الضياع **   حلمي بالجفن
        ياحالة الضماء
         أبكت السماء


ابتدت رحلت سبيها تهيئت بت حيدره
گيدوها خوف منها اسد بس هيئة مره
بينها اتحس بنفسها لحظه چنها الاخره
رسمو لهيبتها ذله لچن صارت مفخره


علنو المسير   **   تسبى القافله
چثة الامـير   **    بوادي كربله
           النسوه بالعراء
            أبكت السماء 


خفت دمعتها الغريبة ونشفت دمعاتهن
اعتنت ضعن الفواطم عدلت شيلاتهن
اء يكلفات النوايب ذني اجن ساعاتهن
زارعه حسين بفكرهن بالگلب عباسهن


ليلي ما يهيد    **  وحشه بلا هلي
شكوه من اريد ** اصد وجهي لـ علي
             وأنشدت نداء
              أبكت السماء


جمعت كل ذكرياتي ذكـــــرى جاسم والنهر
ذكرى الاكبر والرضيع وجف تهاوه من الگمر
وذكرى لحسين افجعتني بيها كل عمري انعصر
امتاع صارن ذكرياتي بلكي ويهـــون السفر


موكب الخلود   **   مايحدي بكفيل
سيد الوجـود    **  فــــارق الرحيل
             تضحية وفداء
             أبكت السماء


شلون اعوفن ذكرياتي وإحدي براس ورمح
ياحســــــــــين انه ابدالك ثق تمنيت انذبح
الي ذكره وي اخوتي جـــــرح متربي بجرح
اخواني تربات الصميده وين من عدهم يصح


اوِحي البلاء  **  رفع الامـــل
ذبحو الصلاه **  ياخير العمل
            فاجعة ورثاء
            أبكت السماء




... علي الزيداوي

ليلة الوحشة



امسه المسه وضعوني وحشه
وابني امي راسه بلايه نعشه
وين الگه گلب حسين ارشه
بماي وهلبت يبرد لهيبه



امسه المسه بضعون اهلنه
ودم كربله شتت شملنه
من الهيبة.. مسبي اصبح ضعنه
وحداي ضعني منين اجيبه


حداي ضعني مصوب الهام
لا يمنته ولا يسرته اسلام
راح الذي فّينه اعله الاخيام
الحادي عشر ليلة رهيبة



الحادي عشر وحشتنه كلفه
فوگ الترب والجمر نغفه
وعدوانه بعيون صلفه
وسجادنه يمرد نحيبه



نشدت رقية ارجوچ عمه
وديني يم نعشه ارد اشمه
وخلي الرمح ينزلي اضمه
محبوب مشتاگ لحبيبه




خادم الحسين ع
الشاعر علي الزيداوي

صورة تعب ـ بينت بالاضعون
نظرة عتب ـ ترجمتهه العيون
بين العقيلة وبين
راس الشهيد حسين


يسرح البال ويشاهد مصحف وصورة
ركب اقمار المدينة بيه وهج نـــــــوره
حـــرز چفين ابو فاضل محملي إدوره
بس بعد ليلة العاشر ذبحو الســـــــورة


نزفت فجر ـ والضحى والنور
شفــع وتّْـر ـ قدموها نحــــور
انطى الگمــــر چفين
راس الشهيد حسين


رحلتي للطف عزيزة وطلعتي صعبه
اسبعطش ال النبوه وصبحت غربه
گلبي يتنطر كفيلي يزيح اله كربه
ولني تالي الليل ادور للنحر شربه


خوف وعطش ـ والضعن تلوه
ليـــل اهدعش ـ راحت الاخوه
ياروحي وشتنسين
راس الشهيد حسين



فرق مو كل حادي يحدي بضعني ويسافر
من بعد صدر النبوه البيه الف حــــــــــافر
حيره ياحيرتنه كلفه وقلة الناصـــــــــــــر
اخ ياحامي الضعينه لو چنت حاضـــــــــر


خويه الضعن ـ هزل الحدنه
يـ أم الحسن ـ فرقوا شملنه
صوب السبي ماشين
راس الشهيد حسين


انظر الراس ويصدلي وتشبح عيوني
مره صوب الحرم مره لكافل ضعوني
چنت من انوي واسافر هُم يشيعوني
هسه شمر الخنه اليحدي وخابت ظنوني


نار وضمه ـ ومارحمنه الليل
ستر وحمه ـ صرت نجم سهيل
لارض الغرب ناوين
راس الشهيد حسين



بين الاديار الغريبة بكل كتر ليلة
ردت اشوفن راعي حلمي يمي واشكيلة
ذاك اخوي الدنيا كلها گايله دخيلة
حتى البالي وخيالي چنت اله احچيله


بـ الله العوض ـ والصبر متاعي
حزن ومرض ـ اعلنت ضياعي 
غفلة وغزاني البين
راس الشهيد حسين


اخ بوابة الساعة وشامها شعامل
بينه وعيون الشماته بروحنه شتاكل
زجر وحجار ومسبه وسلف متحامل
شگد تمنيت اعله ساعة يگعد الكافل


مجلس ظلم ـ جاروا البغايه
بيه نحتكُم ـ  احنه اهل ولاية
ال النبي الطُهرين
راس الشهيد حسين




خادم الحسين ع
الشاعر علي الزيداوي

نعي السيدة زينب ع ليلة العاشر



بس هل الليلة هاي اخيامك تضوي
باچر موحشه بيها الجمر يچوي
لصوب الشام باچر هل الضعن ينوي
بلياكم يباچر مدري شلونه


مدري شلون باچر شسد لضعوني
اباري اطفالكم اشگف عن اموتني
احامي الحرم من العده يلفوني
اصد للراس ذاك المنخطف لونه

اصد للراس واندب والگلب لاهب
وچانون الهضم يحسين الك ناشب
وچفيلي اعله النهر عن ناضري غايب
واعداكم شماته بهضم يولونه


اعداكم بلايه اعهود لا رحمه
لا يرعون النه لجدنه لا حرمه
ميصون الضعون الماعرف زحمه
لبن زياد باچر غصب گادونه



الطف من بعد ذبحك    يار حزني
الدمع والهــم تجاور     يار حزني
راح الچـــان يـــعلم      يرى حزني
تعال وشوف زينبكم سبيه

1- جار  ذبحني
2- جيران حزني
2-يشوف حزني




علي الزيداوي