( أربعينية) _____ مو كل السوالف سولفتهن اخافن خويه تزعل لو گلتهن أشفنه بسفرة الشام شسوت بينه الأيام اخافن خويه تزعل لو گلتهن ـــــــــــــــــــــــــــ اخاف احچيلك وتزعل يبو الغيره اسكت احچي يمك صايره بحيره چم ديره بسفرتي شفت چم ديره واقع صار يسري وصعب تغييره عگب الخدر والصيوان صرنه يساره وشمتت الناس بيسرنه والدرب المشيناه والسب السمعانه اخافن خويه تزعل لو گلتهن ـــــــــــــــــــــــــــــ يم گبرك گعدنه ومن گعدنه صعبه نگول كل الحچي العدنه يخويه عله الهزل لمن صعدنه شلون بدونكم نمشي وحدنه بنات الخدر يمشن للسبي شلون مو عباس حارس هاي الضعون المشي يصعب علينه الشمر من يحدي بينه اخافن خويه تزعل لو گلتهن ــــــــــــــــــــــــــــــــ الجره عليهن يخويه يصعب تشوفه من طب الضعن يحسين للكوفه شافو بت علي البالخدر معروفه تمنيت الكفيل بسيفه وچفوفه ردته يشوفنه بياحال صرنه يدري بالخدر كافل خدرنه صاير فرجه للناس يدري بهاي عباس اخافن خويه تزعل لو گلتهن ــــــــــــــــــــــــــــــ سكتنه والدمع سولف سوالفنه بدرب الشام خويه شصار وشفنه نتمنه الظلام يصير ويلفنه نخاف من الصبح يطلع ويكشفنه ما ردنه الشمس تطلع علينه عن سهم النظر تسترنه ادينه وحتار بخواتك ويتاماك وبناتك اخافن خويه تزعل لو گلتهن ــــــــــــــــــــــــــ يخويه عيلتك من تنشد عليهه بدرب اليسر بعيوني اباريهه لچن تعذرني خافن قصرت بيهه ما رجعت رقيه ولا تراچيهه التراچي سلبوهه بلا مهابه ورقيه دفنتهه بالخرابه اجيت بلا رقيه تسلم عليك هي اخافن خويه تزعل لو گلتهن ــــــــــــــــــــــــــــ خادم الحسين ابو اسحاق الفحام